Yosiya A A Swi Rhandza Ku Djondza Hi Yehovha

Nkama lowu Yosiya a a ni 8 wa malembe a ve hosi ya Yuda. Ka nkama wolowo vanhu a va yendla swilo leswi Yehovha a a nga swi tsakeli, vona a va rhandza swilo swa wuloyi ni ku gandzela swikwembu swa mavunhwa. Loko a ni 16 wa malembe Yosiya a lave ku tiva ndlela yayinene ya ku gandzela Yehovha. Loko a ni 20 wa malembe a helise swifaniso ni maaltari ya swikwembu swa mavunhwa lawa a ma li kona aYuda. Se ka nkama lowu a a ni 26 wa malembe Yosiya a pfuxete tempele.

Nkama lowu a ku pfuxetiwa tempele muprista wamukulu Hilikiya a kume a buku leli a li ni minawu ya Yehovha, swi nga yendleka a ku li buku leli a li tsaliwile hi Moxe. Se Xafani sekretariyu wa hosi a teke buku leli a famba na lona ka Yosiya, a fika a mu lerhela hi rito la ku tlakuka. Nkama lowu Yosiya a nga twa leswi a swi lerhiwa a game a kwata hintamu hikusa a vone leswaku a vanhu a va nga yendli leswi nawu wa Yehovha a wu swi vula. Se a byele Hilikiya a ku:

— Yehovha a hi kwatelile hintamu, famba u ya vulavula na yena, leswaku a ku byela leswi hi faneleke hi swi yendla.

Yehovha a hlamule a ku:

— Leswi vanhu va Yuda va kalaka va nga ni yingisanga, mina ni ta va khatisa, kambe leswo ni ta swi yendla loko Yosiya se a ta va a file. Hikusa yena a lerhe minawu ya mina funtshi a tikarhatele ku yendla swilo leswi nga swinene.

Nkama lowu Yosiya a nga twa leswi Yehovha a nga swi vula, a byele vanhu hinkwavu leswaku va ya atempeleni, a gama a va lerhela minawu ya Yehovha hi rito la ku tlakuka. Se Yosiya ni vanhu hinkwavu va tshembise Yehovha leswaku a va ta mu yingisa hi mbilu hinkwayu.

Yosiya a vone leswaku ka minawu leyi, Yehovha a a rhume vanhu va yena leswaku va mu yendlela a Paxkwa lembe ni lembe. Kambe vanhu va Yuda se a va ni malembe ya manyingi na va nga yendli Paxkwa. Se Yosiya a sungule ku lunghiselela a Paxkwa la Yehovha yena a nyikele hi swifuyu swa swinyingi leswaku swi va magandzelo a tlhela a veka vanhu leswaku va yimbelela a tinsimu atempeleni. Loko se ku hundze Paxkwa a xitshungu xi yendle a fexta lalikulu leli nga teka 7 wa masiku leli vitaniwaka Fexta la Mapawu ya Ku Kala Fermentu. A khambi la wugamu leli xitshungu xi nga yendla fexta la ku fana ni leli a ve ka minkama ya Samuwele. Phela Yosiya a a swi rhandza hintamu ku djondza hi Yehovha ni minawu ya yena. Se wena ke wa swi rhandza ku djondza hi Yehovha?