Xikhongelo Xa Ana

A ku ni wanuna lweyi a a vitaniwa Elkana, yena a a famba ni ndjangu wa yena lembe ni lembe leswaku va ya gandzela Yehovha ka doropa la Xilo lani a ku ni tabernakela. Yena a a ni vasati vambirhi, Ana na Penina, kambe a a rhandza hintamu Ana. Penina a a ni vana va vanyingi kambe Ana a a nga na n’wana. Minkama hinkwayu Penina a a hlupha Ana hi mhaka ya leswi a a nga na n’wana. Siku lin’wani na va li aXilo, Elkana a vone Ana na a kwatile, se a mu tshinelela a fika a bula na yena a ku:

— U nga rili Ana, phela u na mina funtshi ni ku rhandza hintamu.

Ana a game a suka a ya khongela na a rila, a kombela a ku:

— Yehovha Hosi ya mina, loko u ni nyika n’wana na ku tshembisa leswaku ni ta mu teka a ta a ta tirha ka tabernakela la wena wutomi la yena hinkwalu.

Nkama Muprista Wamukulu Eli a nga vona Ana, a nga pimisanga swaku Ana a wo khongela kambe a pimise swaku a a yo dakwa. Se Ana a mu byele a ku:

— A ni dakwanga hosi ya mina, hambi ku phuza a ni zanga hi ku phuza nchumu kambe ni yo karhateka swinene. Hi mhaka leyo, ni tile lani leswaku ni ta vulavula na Yehovha.

Eli a game a swi vona swaku a a phazamile, se a byele Ana swaku Yehovha a a ta mu nyika leswi a nga swi kombela. Ana a game a famba na a tsakile. Na ku nga se hundza nkama wa wunyingi, Ana a ve ni n’wana naswona va mu chule vito la Samuwele. U vona swaku Ana a titwise ku yini nkama a nga va ni n’wana lweyi? A tsakile a hi swona?

Indjhe Ana a xi khohlwile xitshembiso lexi a nga xi yendlela Yehovha? Nada, hikusa nkama Samuwele a nga tshika ku yan’wa a mu tekile a mu yisa ka tabernakela a ya mu nyikela ka Muprista Wamukulu Eli, a gama a ku:

— Wa ha khumbuka swaku ku ni leswi ni nga swi kombela ka Yehovha? Yena a ni twile se a ni nyika n’wana. Yena a ta tirhela Yehovha wutomi la yena hinkwalu.

Lembe ni lembe, Ana na Elkana a va ya pfuxela Samuwele va tlhela va mu nyika mpahla ya nyuwani. Yehovha a tlhele a nyika Ana vana vanharhu va xinuna ni vana vambirhi va xisati.