Ku Dlayiwa Ka Hosi Ya Xisati

Loko Akabu a li ka yindlo ya wuhosi aYezreyeli, a swi koteka kuva a vona nsimu ya wanuna lweyi a a vitaniwa Naboti. Akabu a a yi lava hintamu nsimu liyani naswona a zame ku yi xava. Kambe Naboti a nga mu xaviselanga hikusa nawu wa Yehovha a wu nga swi pfumeleli leswo. Leswi Naboti a nga swi yendla a swi li swinene, kambe Akabu a kwate hintamu a za a tsukula ni swakudla naswona hambi hi ku huma ndlwini a a nga ha humi hi mhaka ya ku kwata. Se nsati wa yena Jezabele a mu byele a ku:

— Akabu, phela wena u hosi. Hi wena u fumaka aIsrayele, u nga tikumela leswi u swi lavaka. Swi tshiki na mina, ni ta yendla swaku nsimu yi va ya wena.

Se Jezabele a yendla planu swaku va dlaya Naboti ni swaku a nsimu yi va ya nuna wa yena. A rhume vavanuna lava a va tiviwa hintamu adoropeni swaku va hembela Naboti va vula swaku a rhuke Xikwembu, hi mhaka leyo Naboti a dlayiwile. Se Jezabele a game a byela Akabu a ku:

— Naboti a file. U nga titekela nsimu ya yena.

Naboti a nga vanga yexe ka vanhu vavanene lava Jezabele a nga va dlaya. Jezabele a yendle leswaku ku dlayiwa vanhu va vanyingi lava a va tirhela Yehovha. Phela yena a a gandzela swikwembu swa mavunhwa funtshi a a yendla swilo swa ku biha. Kambe Yehovha a a swi vona swilo hinkwaswu leswi Jezabele a a swi yendla. Indjhe swi lava ku vula swaku Yehovha a a nga ta yendla nchumu?

Loko ku hundze nkama, Akabu a file se Yehorama mun’we wa vana va Akabu a ve hosi. Ka nkama wolowo, Yehovha a rhume wanuna lweyi a vitaniwaka Yewu swaku a ya dlaya Jezabele ni vanhu hinkwavu va ndjangu wa yena. Yewu a khwele ka movha wa yena wa nyimpi a ya ka Jezabele. Na yena Yehorama a khwele ka movha wa yena wa nyimpi a ya kumana na Yewu. Loko va kumanile a mu vutisile a ku:

— Indjhe u ta hi swaswinene?

Yewu a hlamulu a ku:

— Nada, a ni tisi swaswinene. A hi nge vi ni ku rhula loko mamani wa wena Jezabele wa ha tama a yendla swilo swa ku biha.

Nkama Yehorama a nga twa leswo, a zame ku djikisa movha wa yena a baleka. Kambe Yewu a tlhave Yehorama a fa.

Se Yewu a game a famba a ya kaya ka Jezabele. Nkama Jezabele a nga tiva swaku Yewu a kusuhi, a timakiyarile, a lunghisa misisi a gama a ya nyima ka janela la yindlo ya yena. Se nkama Yewu a nga fika, Jezabele a sungule ku mu rhuketela. Se Yewu a byele vatirhi va Jezabele lava a va nyime tlhelweni ka yena a ku:

— Mu txukumeteleni hi ka janela.

Se vatirhi va yena va mu txukumetela a wa hansi a fa.

Loko se ku hundze leswo, Yewu a dlaye 70 wa vana va Akabu. A tlhele a helisa wugandzeli la Bali aIsrayele. Hi djondza yini ka hinkwaswu leswi? Hi djondza swaku Yehovha a vona hinkwaswu naswona loko ku fika nkama a ta helisa hinkwavu lava yendlaka minchumu ya ku biha.