Yehovha A Vulavula Na Moxe

Moxe a hanye 40 wa malembe aMidiyani, a tlhela a chada ni ku va ni vana. Siku lin’wani na a li ka Ntshava ya Sinayi na a lusa tinyempfu, a vone nchumu wa ku hlamalisa. A vone xinsinyani na xi pfurha kambe a xi nga pshi! Se leswi Moxe a a lava ku swi vona hi le kusuhi leswi a swi humelela, a tshinelile ka xinsinyani lexi a xi pfurha a gama a twa rito li ku:

— Moxe! U nga tshineli lani. Hlivila masandaliya ya wena hikusa ndhawu leyi u nga nyima ka yona ya kwetsima.

Phela a ku li Yehovha lweyi a a vulavula na Moxe. Se leswi Moxe a a chava hintamu a timbhonye kara. Se Yehovha a ku:

— Na swi tiva swaku Vayisrayele va hluphiwa aGibita, ni lava ku va susa aGibita swaku va ya ka ndhawu ya kahle. Funtshi mina ni lange wena leswaku u va susa aGibita.

Moxe a a chava hintamu hi mhaka ya leswi Yehovha a nga mu byela swona. Se a gama a mu vutisa a ku:

— Loko va ni vutisa swaku i mani a nga ni rhuma ni ta va hlamula swa ku yini?

Yehovha a mu hlamula a ku:

— U ta va byela swaku hi mina Xikwembu xa Abrahamu, Xikwembu xa Izaki, Xikwembu xa Yakobe lweyi a nga ku rhuma.

— Se Moxe a tlhela a vutisa a ku:

Loko va nga pfumeli ke?

Yehovha a vone swaku Moxe a a chava hintamu, se a mu rhuma swaku a txukumetela nhonga ya yena ahansi. Se nhonga yi txintxa yi va nyoka. Moxe a gama a khoma nyoka hi ntxila se yona yi tlhela yi txintxa yi va nhonga. Se Yehovha a gama a byela Moxe a ku:

— Loko Vayisrayele va swi vona hinkwaswu leswi va ta kholwa swaku hi mina ni nga ku rhuma.

Se Moxe a ku:

— Phela swa ni karhatela ku vulavula phambheni ka vanhu.

Yehovha a mu byela a ku:

— Ni ta ku byela leswi u faneleke u swi vula, naswona makwenu wa wena Aroni a ta famba na wena.

Se ku sukela kolanu Moxe a a tiyiseka swaku Yehovha a ta mu pfuna. Hi mhaka leyo a teke nsati wa yena ni vana va yena va tlhelela ka tiko la Gibita.