Elizabeti A Kuma Nyimba

Se a ku hundza kolomu ka 400 wa malembe mimuru ya Yerusalema na yi pfuxetiwile. Kusuhi ni doropa la Yerusalema a ku tshama a muprista lweyi vito la yena a ku li Zakariya ni nsati wa yena Elizabeti. Vona se a va ni malembe ya manyingi na va chadile kambe a va nga na n’wana. Siku lin’wani Zakariya a nghene atempeleni ka ndhawu ya ku kwetsima leswaku a hisa a insensu, se ku game ku humelela ntsumi leyi vitaniwaka Gabriyele. Nkama lowu Zakariya a nga yi vona a chavile hintamu. Kambe yona yi mu byelile yi ku:

— U nga chavi Zakariya, Yehovha a ni rhumile leswaku ni ta ku byela mahungu ya ku tsakisa, nsati wa wena a ta va ni n’wana naswona a ta chuliwa vito la Yohani. Yehovha a mu langile n’wana lweyi, leswaku a yendla ntirho wa lisima hintamu.

Kambe Zakariya na Elizabeti se a va gugile hintamu swaku va va ni vana, se Zakariya a nga kholwanga leswi ntsumi yi nga mu byela swona. Se ntsumi Gabriyele yi te:

— I Xikwembu lexi nga ni rhuma leswaku ni ta ku byela leswo. Kambe wena a wu kholwanga ka xona, se u ta va mbeveve anze n’wana lweyi a psaliwa.

Zakariya a tshame nkamanyana ndzeni ka tempele ya ku kwetsima. Nkama lowu a nga huma vanhu va lave ku tiva leswi a swi humelelile. Kambe Zakariya a a nga ha swi koti ku vulavula, a wo kota ku vulavula hi majextu. Se vanhu va swi twisisile leswaku Xikwembu a xi vulavule na Zakariya.

Loko se ku hundze nkamanyana, leswi ntsumi yi nga swi vula swi yendlekile, Elizabeti a kume nyimba naswona a ve ni n’wana. Vanghanu va yena ni maxaka va yile leswaku va ya vona n’wana naswona a va tsakile hintamu. Elizabeti a va byelile leswaku n’wana lwiyani a a ta chuliwa vito la Yohani, kambe vona va te:

— A ku na munhu ka maxaka ya wena lweyi a nga ni vito lelo, mu chule vito la Zakariya ku fana ni papayi wa yena.

Se Zakariya a khome xipulangwani a tsala a ku:

— Vito la yena ku ta va Yohani.

Se ka nkama wolowuyani Zakariya a game a sungula ku vulavula, vanhu hinkwavu va Yuda, va swi tivile leswi nga yendleka. Se a va tivutisa va ku:

— Hi wihi ntirho lowu n’wana lweyi a nga ta wu yendla?

Yehovha a yendle leswaku Zakariya a tala hi moya wa ku kwetsima a sungula ku profeta a ku:

— Yehovha i Xikwembu xa ku hlamalisa yena a tshembise Abrahamu swaku a a ta rhumela Mesiya leswaku a ta hi ponisa. Yohani a ta va muprofeta, ntirho wa yena i ku lunghiselela vanhu leswaku ku ta Mesiya.

Ku ve ni nchumu xa ku hlamalisa lexi nga humelela wansati mun’wani lweyi a a li xaka la Elizabeti lweyi a a vitaniwa swaku i Mariya. I yini? Hi ta swi vona ka xitoriya lexi landzelaka.