Ruti Na Nawomi

Ku ve ni nkama lowu a ku ni ndlala aIsrayele, se wansati lweyi a a vitaniwa Nawomi a rhurhile ni nuna wa yena ni vana va yena vambirhi leswaku va ya tshama Mowabu. Kambe nuna wa yena a game a fa. Se vana va yena va chadile ni vavasati vambirhi va Mowabu lava a va vitaniwa Ruti na Orpa. Kambe hi ku famba ka nkama, vana va Nawomi na vona va file.

Nkama Nawomi a nga tiva swaku aIsrayele se a ku ni swakudla a tlhele a ya Israyele, yena na Ruti na Orpa. Se nkama na va famba, Nawomi a byele Ruti na Orpa a ku:

— N’wina mi ni yendlele swilo swaswinene mina ni vana va mina se a ni mi navelela kuva mi tlhela mi chada. Kambe seniyani Israyele hi yaka kona a ni mi tshembisi swaku leswo swi ta koteka, se tlhelani mi ya ka tiko la n’wina aMowabu.

Se Ruti na Orpa va ku:

— Hina hi ku rhandza hintamu Nawomi, a hi nge ku tshiki.

Nawomi a tame a byela Ruti na Orpa leswaku va tlhela va ya ka tiko la vona. Se Orpa a game a tlhela a ya ka tiko la yena ni ka swikwembu swa yena. Nawomi a byele Ruti leswaku a famba na Orpa, kambe leswi a a mu rhandza hintamu Nawomi, Ruti a yalile. A mu hlamulile a ku:

— Mina a ni nga ta ku tshika ni ta famba na wena, naswona vanhu va wena va ta va vanhu va mina ni Xikwembu xa wena xi ta va Xikwembu xa mina.

Ruti na Nawomi va game va fika aIsrayele. Se siku lin’wani Ruti a ye a ya tirha ka masimu ya Bowazi n’wana wa Rahabi, a rholela a sevhada. Leswi Bowazi a a twe swaku Ruti a a mu hlayisa kahle Nawomi, a byele vatirhi va yena leswaku va mu tshika a rholela sevhada hinkwalu leli a a li lava.

Nkama Ruti a nga muka niwusiku, Nawomi a mu vutise a ku:

— A wu tirha ka masimu ya mani namuntlha?

Se Ruti a ku:

— A ni tirha ka masimu ya Bowazi.

Nawomi a gama a ku:

— Bowazi i xaka la nuna wa mina. Tama u tirha ka masimu ya yena xikan’we ni majovhem man’wani lawa ma tirhaka kona, a wu nga ta hluphiwa hi munhu.

Ruti a tame a tirha ka masimu ya Bowazi anze ku hela nkama wa ku tshovela. Bowazi a vone swaku Ruti a a li wansati wa ku tiveka hansi funtshi a a rhandza ku tirha. Bowazi a chade na Ruti naswona va ve ni n’wana lweyi vito la yena a ku li Obede, lweyi hi ku famba ka nkama a nga va vhovho wa Hosi Davhida. Vanghanu va Nawomi va tsake hintamu swinene, lani va nga za va ku:

— Ku sunguleni Yehovha a ku nyike Ruti lweyi a nga hanyisana kahle na wena, swoswi u ni ntukulu. Se a hi khenseni Yehovha hi mhaka ya hinkwaswu leswi.