Gwardu Wa Djele A Djondza Ntiyiso

Ka doropa la Filipiya a ku tshama jovhem la wansati leli a li ni dimoni. A dimoni lelo a li yendla leswaku jovhem leli li vulavula leswi nga ta yendleka ka nkama lowu taka. Vapatrao va lona a va kuma male ya yinyingi hi leswo. Loko Pawulo na Silasi va ye Filipiya, jovhem leli a li va landzelela na li huwelela li ku:

— Vavanuna lava, i va tirheli va Xikwembu Xa Ku Tlakuka Hintamu.

Se Pawulo a byele dimoni lolelo a ku:

— Hi vito la Yesu huma ka jovhem leli.

Hi nkama wolowo dimoni li humile ka jovhem leliyani. Loko vapatrao va lona va vone leswaku a va nga ha ta kuma male va kwate hintamu. Se vona va khome Pawulo na Silasi, va va yisa ka tihosi, va fika va ku:

— Vavanuna lava, a va yingisi minawu. Funtshi va yendla leswaku ku va ni confusão ka doropa hinkwalu.

Tihosi ti rhumise leswaku ku biwa Pawulo na Silasi, va tlhela va petiwa adjele. Se gwardu a va pete djele, a va veka ka ndhawu ya ku mphuma hintamu, a tlhela a va manya minenge hi swigodo.

Pawulo na Silasi va sungule ku yimbelela tinsimu ta Yehovha, funtshi swib’ochwa swin’wani a swi va twa. Na va nga swi nyimelanga, xikarhi ka wusiku adjele hinkwalu li sungule ku tsekatseka hintamu, a swipfalu swa djele swi pfuleka, ni leswi a va bohiwe hi swona swi tlhantlheka. Se gwardu wa djele a tsutsuma a ya lomu a va li kona. A fika a vona leswaku swipfalu hinkwaswu a swi pfulekile. Yena a a pimisa leswaku swib’ochwa hinkwaswu swi balekile. Se a teke xipada leswaku a tidlaya. Hi nkama wolowo Pawulo a huwelelile a ku:

— U nga tidlayi, hina hi kona.

Gwardu lwiyani, a tsutsumile a fika a khizama phambheni ka Pawulo na Silasi, a ku:

— Ni fanele ni yendla yini leswaku ni ponisiwa?

Vona va ku:

— Wena ni ndjangu wa wena mi fanele mi kholwa ka Yesu.

Se Pawulo na Silasi, va game va mu chumayela naswona gwardu lwiyani ni ndjangu wa yena va ve Vakreste.