Masonchwa Ya Matimba Ya Yehovha

Benadadi hosi ya Siriya a zame makhambi ya manyingi ku dumela Vayisrayele. Kambe muprofeta Elixa minkama hinkwayu a a byela hosi ya Israyele leswi Benadadi a a lava ku swi yendla. Benadadi a game a rhuma masonchwa ya Siriya leswaku ma famba anze ka doropa la Dotani leswaku ma ya khoma Elixa.

Masonchwa ya Siriya ma fike niwusiku ka doropa la Dotani. Se ka siku li nga landzela nimixo, nkama mupfunisi wa Elixa a nga huma handle a vone swaku a doropa a li tale hi masonchwa ya manyingi. Yena a sungule ku chava hintamu, a huwelela a ku:

— Elixa, hi dumeliwile. Hi ta yendla yini swoswi?

Elixa a hlamula a ku:

— U nga chavi hikusa i vanyingi lava nga na hina ku tlula lava nga na vona.

Ka nkama wolowo, Yehovha a yendle leswaku mupfunisi wa Elixa a vona nchumu wa ku hlamalisa. Yena a vone swaku ka tintshava hinkwatu a ku yo tala hi makavhalu ni tinyolo ta nyimpi leti a ti pfurha ndzilu.

Nkama masonchwa ya Siriya ma nga lava ku khoma Elixa, yena a khongele ka Yehovha a ku:

— Yehovha, ni kombela u yendla leswaku vavanuna lava va fa matihlo.

Masonchwa lawayani a ma fanga matihlo, kambe Yehovha a yendle leswaku ma nga ha ku tivi lomu a ma li kona. Se Elixa a ma byela a ku:

— Mi lahlekile, a hi lona doropa leli mi li lavaka, a hi fambeni ni ya mi komba munhu lweyi mi mu lavaka.

Se masonchwa ya Siriya ma fambe na Elixa anze Samariya lani hosi ya Israyele a yi tshama kona. Loko Vasiriya va swi tsumbulile swaku va kwini, va vone leswaku a va nga ha na xa ku xi yendla. Hosi ya Israyele yi vutise Elixa yi ku:

— Ni ma dlaya masonchwa lawa?

Phela Elixa a a ta va a tirhise nkama wolowo swaku a va hakelisa. Kambe wa swi tiva leswi a nga swi yendla? Yena a te:

— Mi nga va dlayeni vavanuna lava. Va nyikeni swakudla, u gama u va byela va famba.

Hosi ya Israyele yi rhume vanhu swaku va lunghiselela meza lowu nga tala hi swakudla leswaku ku dla masonchwa ya Vasiriya. Se hi wugamu a va byele leswaku va famba.