Xitshembiso Xa Yefta

Vayisrayele va tlhele va nyima ku gandzela Yehovha, va sungula ku gandzela swikwembu swa mavunhwa. Kambe swikwembu leswi a swi nga va pfuni swaku va hlula loko va ya ku lweni ni Vaamoni. Hi mhaka leyo swilo a swi nga va fambeli kahle. Se va kombele ku pfuniwa hi Yehovha, va ku:

— Yehovha, leswi hi nga ku yendlela swona swi bihile. Kambe hi kombela u hi pfuna.

Se Vayisrayele va helise swikwembu hinkwaswu swa mavunhwa va gama va sungula ku gandzela Yehovha. Hi mhaka leyo Yehovha a lave ku va pfuna.

Kambe leswaku Vayisrayele va ya hlula ka nyimpi leyi a va ta yi lwa ni Vaamoni, va lange wanuna lweyi a a ta va rhangela ka nyimpi yoleyo, ku nga Yefta. Kambe na va nga se ya nyimpini, Yefta a tshembise Yehovha a ku:

— Loko hi hlula Vaamoni, munhu wa ku sungula lweyi a nga ta huma hi le kaya swaku a ni tlhangaveta, a ta tirha ka tabernakela ya wena wutomi la yena hinkwalu.

Se hi ku pfuniwa hi Yehovha, Vayisrayele va hlulile a nyimpi.

Loko Yefta a vuyile kaya, munhu wa ku sungula lweyi a nga huma hi le kaya ka yena ku ve n’wana wa yena wa ntombhi na a chaya xingomani a tlhela a txina. Se Yefta a khumbuke leswi a nga swi tshembisa, leswo swi mu tshove mbilu hikusa Yefta a a nga na n’wana mun’wani. Se i mpsini leswi a a ta swi yendla? Yena a game a tlhamusela n’wana wa yena a ku:

— N’wananga, ni yendle xitshembiso ka Yehovha hi mhaka leyo swi ta lava ni ku rhumela leswaku u ya tirha ka tabernakela ya Xilo.

Se n’wana wa yena a hlamula a ku:

— Papayi loko u tshembise leswo, u fanele u swi yendla. Kambe na ni nga se famba ni kombela nchumu xin’we, ni lava ku ya tshama ni vanghanu va mina ka tintshava ku ringana tiwheti timbirhi.

N’wana wa Yefta a tirhe ka tabernakela wutomi la yena hinkwalu. Se vanghanu va yena a va famba kan’we hi lembe leswaku va ya mu pfuxela.