Ezra A Djondzise Minawu Ya Yehovha

Se a ku hundze kolomu ka 70 wa malembe na Vayisrayele van’wani va tlhelelile aYerusalema. Kambe van’wani a va ha tshama ka tindhawu ta ku hambanahambana leti a ti fumiwa hi mfumu wa Persiya. Mun’we wa Vayisrayele lava a ku li muprista Ezra, lweyi minkama hinkwayu a a djondzisa vanhu Minawu ya Yehovha. Nkama lowu Ezra a nga tiva leswaku vanhu aYerusalema a va nga ha yi yingisi Minawu ya Yehovha, a lave ku ya va pfuna. Se Artaxexe hosi ya Persiya a byele Ezra a ku:

— Xikwembu xi ku nyike wutivi leswaku u kota ku djondzisa Minawu ya xona. Se famba u ya Yerusalema naswona lava va swi lavaka ku famba na wena, na vona va nga famba.

Se Ezra ni hinkwavu lava a va swi lava ku ya Yerusalema va tlhanganile leswaku va khongela va kombela Yehovha leswaku a va vhikela ka liyendzo la vona.

Loko se ku hundze 4 wa tiwheti va fikile aYerusalema. Nkama lowu va nga fika seniyani, varhangeli va byele Ezra leswaku Vayisrayele van’wani a va chadile ni vavasati lava a va gandzela swikwembu swa mavunhwa. Nkama lowu Ezra a nga twa leswo a khizamile phambheni ka vanhu a khongela a ku:

— Yehovha phela u hi yendlele swilo swa swinyingi swaswinene. Kambe hina ho ku yendlela swilo swa ku biha ntsena.

Vayisrayele va tisolile, kambe va tame va yendla swilo swa ku biha. Hi mhaka leyo Ezra a lange madoda ni vayavanyisi leswaku va lulamisa timhaka leto. Loko se ku hundze 3 wa tiwheti vanhu lava a va nga mu gandzeli Yehovha va hlongoliwile.

Kambe loko se ku hundze 12 wa malembe, muru wa Yerusalema se a wu pfuxetiwile. Se Ezra a hlengelete vanhu va vanyingi leswaku a va lerhela minawu ya Yehovha. Loko a pfule buku, vanhu hinkwavu va pfuke va nyima, Ezra a dzunise Yehovha naswona vanhu hinkwavu va pfumelelane na yena. Se nkama lowu a a lerha ni ku va tlhamusela minawu a vanhu a va yingisela kahle naswona va rilile va vula swidjoho swa vona va tlhela va pfumela swaku a va nga mu yingisi Yehovha. Ka siku leli nga landzela Ezra a tlhele a va lerhela minawu yin’wani ya Yehovha. Vayisrayele va vone leswaku a ku chota katsongo leswaku ku sungula a Fexta la Minchacha. Vona a va ha tekanga nkama va yo sungula ku ya tilunghiselela leswaku va ta tlangela fexta.

Ka 7 wa masiku ya Fexta la Minchacha Vayisrayele a va tsakile hintamu, naswona va khense Yehovha hileswi a nga katekisa masimu ya vona. Khambi la wugamu leli a ku yendliwe fexta la ku fana ni leli ku ve ka minkama ya Yoxuwa. Nkama lowu fexta li nga hela vanhu hinkwavu va tlhanganile leswaku va khongela ka Yehovha va ku:

— Yehovha u hi susile ka tiko la Gibita, u tlhela u hi nyika swakudla amananga, naswona u hi nyike ndhawu leyi ya ku saseka swinene, kambe hina minkama hinkwayu hi tshamela ku yendla swilo swa ku biha. Hambileswo wena a wu rhumela vaprofeta leswaku va hi pfuna. Kambe hina a hi nga na mhaka na vona, wena u tame u hi lehisela mbilu u hetisisa leswi u nga swi tshembisa Abrahamu. Se swoswi ha ku tshembisa leswaku hi ta ku yingisa.

Va tsale hinkwaswu leswi va nga swi tshembisa, se ku kombisa leswaku a va ta swi landzela leswi va nga swi tshembisa, a varhangeli, vaprista ni Valevhi va swi karimbarile.