Mariya A Yendzeliwa Hi Ntsumi Gabriyele

Mariya a a li jovhem leli a li tshama ka doropa la Nazareta aGalileya. Yena a a li xaka la Elizabeti naswona a a lava ku chada ni karpinteru lweyi a a vitaniwa Yosefa. Nkama lowu Elizabeti a a ni nyimba ya 6 wa tiwheti, ntsumi Gabriyele yi vulavule na Mariya yi ku:

— Awuxeni Mariya, Yehovha a ku langile leswaku u yendla nchumu wa lisima swinene.

Mariya a nga swi twisisanga leswi ntsumi a yi lava ku swi vula. Se ntsumi yi mu tlhamusele yi ku:

— Wena u ta va ni n’wana, vito la yena ku ta va Yesu, naswona a ta va Hosi ya Mfumu lowu nga ta tshama hi masiku ni masiku.

Kambe Mariya a karhateke hintamu nkama lowu a nga twa leswo. Hikusa yena a a nga se tshama a yetlela ni wanuna, se a swi ta kotekisa ku yini swaku a va ni n’wana? Kambe ntsumi yi mu byelile yi ku:

— Mariya, ka Yehovha swilo hinkwaswu swa koteka, hi matimba ya yena swi ta koteka leswaku u va ni n’wana. Elizabeti lweyi a nga xaka la wena na yena a ni nyimba.

Se Mariya a game a byela ntsumi a ku:

— Hi swona a swi yendleki ka mina leswi Yehovha a swi lavaka.

Mariya a game a famba a ya pfuxela xaka la yena Elizabeti. Nkama lowu Mariya a nga fika a vulavula na Elizabeti, n’wana lweyi a a li ka khwirhi la Elizabeti a sungule ku tlulatlula. Se Elizabeti a byele Mariya a ku:

— Mariya phela u wansati lweyi a nga katekisiwa swinene hi Yehovha, ni tsake hintamu hileswi ni nga ku yamukela wena mamani wa Mesiya a kaya ka mina.

Se Mariya a ku:

— I ntiyiso Elizabeti, ni mu khensa hintamu Yehovha hi mhaka ya leswo.

Mariya a hete 3 wa tiwheti na a li kaya ka Elizabeti a gama a tlhelela aNazareta. Nkama lowu Yosefa a nga twa swaku Mariya a a ni nyimba a a nga ha swi lavi ku chada na yena. Kambe na Yosefa a li ku yetleleni ku humelele ntsumi yi ku:

— U nga chavi ku chada na Mariya, yena a nga yendlanga nchumu xa ku biha.

Se Yosefa a chade na Mariya a mu teka a ya tshama na yena kaya ka yena.