Prediyu La Babele

A nkama Ndhambi yi nga hundza, vana va Nowa va game va va ni vana. Naswona hi ku famba ka nkama ku ve ni vanhu va vanyingi amisaveni. Se va sungule ku hangalaka va ya tshama ka tindhawu ta ku hambanahambana, ku nga leswi Yehovha a a swi lava.

Kambe ku ni vanhu van’wani lava a va nga swi lavi ku yingisa Xikwembu. Va sungule ku byelana va ku:

— Hi nga sukeni lani hi nga kona. A hi tshameni ka ndhawu yin’we hinkwerhu. Funtshi a hi yakeni prediyu lalikulu la ku leha swinene la ku fika ni tilweni leswaku hi ta tiviwa hintamu.

Kambe Yehovha a nga tsakanga hi leswi va nga swi yendla. Wa swi tiva swaku a game a yendla yini? A yendle swaku vanhu va sungula ku vulavula tirimi ta ku hambana. Se ku va ni confusão lalikulu hintamu swinene lakakuva ni ku twanana va nga ha twanani. Leswo swi yendle swaku va nyima ku yaka. Hi leswo swi nga yendla prediyu leliya li vitaniwa swaku i Babele, leswi vulaka “Confusão.” Hi ku famba ka nkama, vanhu va game va hangalaka va ya ka tindhawu tin’wani amisaveni, ku nga leswi Yehovha a a swi lava. Kambe, a va tshikanga ku yendla swilo swa ku biha. Se swi lava ku vula swaku a ku nga na munhu ni wa mun’we lweyi a a tsakisa mbilu ya Yehovha? Hi ta swi vona ka xitoriya lexi landzelaka.