Yehovha A Vulavula Na Samuwele

Muprista Wamukulu Eli a a ni vana vambirhi lava a va tirha tabernakeleni, ku nga Hofini na Feniyasi. Vona a va nga mu yingisi Yehovha naswona a va nga va yendleli swaswinene vanhu van’wani. Loko Vayisrayele va ya ka tabernakela va ya nyikela magandzelo ka Yehovha, vona a va teka nyama leyi ya lisima ya kona yi va ya vona. Eli a swi tivile leswi vana va yena a va swi yendla kambe a nga yendlaka nchumu. Se u pimisa swaku Yehovha na yena a nga yendlaka nchumu?

Samuwele a a li mutsongo, naswona vanhu vavatsongo va swi rhandza ku tekelela leswi vavakulu va swi yendlaka kambe Samuwele a nga xi tekelelanga xikombiso xa Hofini na Feniyasi, se Yehovha a mu tsakele hintamu Samuwele. Siku lin’wani na a li ku yetleleni a twe rito na li mu vitana, se a pfuka a ya ka Eli, se Eli a ku:

— A ni ku vitananga, tlhela u ya yetlela.

Leswo swi yendleke kanharhu. Ka wunharhu Eli a swi tsumbulile swaku a ku li Yehovha lweyi a a lava ku vulavula na Samuwele, se a mu byele leswi:

— Loko u tlhela u twa rito li ku vitana u fanele u hlamulisa xileswi: ‘Vulavula Yehovha hikusa mina mutirhi wa wena na ku twa.’

Nkama Samuwele a nga tlhela a ya ku yetleleni a tlhele a twa rito li mu vitana, se yena a hlamulise xileswi Eli a nga mu byela swaku a hlamulisa xiswona. Se Yehovha a ku:

— Byela Eli swaku yena ni ndjangu wa yena va ta khatisiwa, hikusa Eli wa swi tiva swaku Hofini na Feniyasi va yendla minchumu ya ku biha kambe yena o va tshika a nga mahi nchumu.

Se hi siku li nga landzela Samuwele a yendle leswi a a swi yendla masiku hinkwawu, a pfuke nimixo a ya pfula swipfalu swa tabernakela kambe a a chava ku byela Eli leswi Yehovha a nga mu byela swona. Se Eli a mu kombelile swaku a mu byela. Samuwele a game a mu byela hinkwaswu leswi Yehovha a nga mu byela swona.

Samuwele a tame a kula, naswona Yehovha a tame a va munghanu wa yena. Se vanhu hinkwavu va Israyele va swi tivile swaku Yehovha a a lange Samuwele swaku a va muprofeta a tlhela a va muyavanyisi.