Yehovha A Khatise Lava Nga Tshika Ku Mu Yingisa

Loko se ku hundze nkamanyana Vayisrayele na va li amananga, Kora Datani, Abirami ni 250 wa vavanuna va sungule ku kala va nga ha yingisi. Vona va byele Moxe va ku:

— Se hi karhalile hi n’wina, kasi hi mhaka muni u pimisa leswaku u nga hi fuma? Hi mhaka muni ku li Aroni ntsena lweyi a nga vaka muprista wamukulu? Phela Yehovha a nga na n’wina ntsena a na hina hinkwerhu.

Yehovha a swi mu tsakisanga leswi vavanuna lava va nga swi vula, phela ka Yehovha a swi fana ni loko va yala ku yingisa yena. Se Moxe a byele Kora ni vavanuna lavan’wani a ku:

— Tanani ka tabernakela mundzuku na mi ni swinun’hwelisu ku nga insensu leswaku mi ta swi hisa, se Yehovha a ta hi komba lweyi a nga mu langa.

Ka siku li nga landzela, Kora ni 250 wa vavanuna va fambile va ya kumana na Moxe ka tabernakela va gama va sungula ku hisa swinun’hwelisu. Phela a ku li vaprista ntsena lava a va pfumeleliwa ku yendla leswo. Se Yehovha a gama a byela Moxe na Aroni a ku:

— Mi nga mu tshineleli Kora ni vanganhu va yena.

Kambe Datani na Abirami a va li ka matende ya vona, a va yingisanga leswi Moxe a nga va byela swona swaku va ya kumana ka tabernakela. Yehovha a game a byela vanhu hinkwavu leswaku va nga tshineli ka matende ya Kora, Datani na Abirami. Vanhu hinkwavu va swi yendlile leswo, kambe Datani na Abirami ni va ndjangu wa vona va tame va tshama ka matende ya vona. Se hi ku hantlisa, Yehovha a pfula xikhele xaxikulu lexi nga minta vanhu hinkwavu lava kalaka va nga yingisanga. Naswona a tlhele a rhumela ndzilu hi le tilweni wu fika wu hisa Kora ni 250 wa vavanuna hinkwavu lava a va li ka tabernakela.

Yehovha a tlhele a byela Moxe a ku:

— Teka nhonga ya lixaka lin’wani ni lin’wani la Vayisrayele u ti tlhanganisa ti va 12 wa tona. Ka nhonga hi yin’we tsala vito la murhangeli wa lixaka la kona, kambe ka nhonga ya lixaka la Levhi tsala vito la Aroni. U gama u teka tinhonga leti u ti veka ka tabernakela, se ku ta huma a maflor ka nhonga ya lweyi ni nga mu langa swaku a va muprista wamukulu.

Se ka siku li nga landzela, Moxe a ye ka tabernakela a ya teka tinhonga leti a a ti vekile. Wa swi tiva swaku a ku yendleke yini? A ku hume maflor ka nhonga ya Aroni. Se Moxe a teke tinhonga a ya ti kombisa ka lava a va rhangela ka tinxaka hinkwatu ta Israyele. Se hinkwavu va swi vonile swaku hikakunene Yehovha a a lange Aroni leswaku a va muprista wamukulu.