Mfumu Lowu Nga Ta Tshama Hi Masiku

Ka wusiku lin’wani, Nebukadinazara a lorhe swilo swa ku chavisa. Leswi a nga swi lorha swi mu yendle a nga li kumi ni wurhongo. Se Nebukadinazara a vitane tintlharhi ta yena leti a ti tirhisa masalamusi a ku:

— Ni byeleni swaku leswi ni nga swi lorha swi vula yini.

Se vona va ku:

— Ina hosi hi ta ku byela. Kambe ku sungula hi byeli leswi u nga swi lorha!

A ku:

— Ihim, n’wina mi fanele mi ni byela leswi ni nga swi lorha. Loko mi nga ni byeli ni ta mi dlaya hinkwenu.

Kambe va ku:

— We hosi ho kombela u hi byela leswi u nga swi lorha, hina hi ta ku byela leswi swi lavaka ku vula swona.

Nebukadinazara a ku:

— N’wina mi zama ku ni kanganyisa. Ni tlhamuseleni leswi norho lowu wu vulaka swona.

Vona va ku:

— Phela a swi nge koteki wena hosi, a nga kona lweyi a nga kotaka ku swi yendla leswo.

Nebukadinazara a kwate hintamu lakakuza a rhumela swaku ku dlayiwa vavanuna hinkwavu lava a va ni wutlharhi aBabilona. Phela leswo swi veke wutomi la Daniyele, Xadraki, Mexaki na Abedinigo a nghozini. Daniyele a fambe a ya vulavula na hosi Nebukadinazara a kombela nkamanyana. Daniyele ni vanghanu va yena va khongelile va kombela ku pfuniwa hi Yehovha. Se i mpsini leswi Yehovha a a ta swi yendla?

Yehovha a byele Daniyele leswi Nebukadinazara a nga swi lorha ni leswi a swi vula swona. Se hi siku leli li nga landzela Daniyele a byele mun’we wa vatirhi va hosi a ku:

— Mi nga dlayeni ni mun’we ka vavanuna lava va ku tlhariha. Mina ni nga swi kota ku tlhamusela leswi hosi yi nga swi lorha.

Se mutirhi lwiyani wa hosi a tekile Daniyele a famba na yena ka Nebukadinazara. Nkama Daniyele a nga fika ka hosi a te:

— Xikwembu xi ku kombe leswi nga ta yendleka ka nkama lowu taka. Leswi u nga swi lorha hi leswi: Wena hosi ya mina u vone xitatuwa xaxikulu xa ku leha hintamu lexi a xi ni nhloko ya woru, xifuva ni mavoko ya xona a swi li swa prata. Ku sukela ka khwirhi, masenge ni henhla ka matsolo ya xona a swi li swa kobre. Minenge ya xona a yi hambiwe hi simbi. Minkondzo ya xona a yi hambiwe hi simbi leyi nga patsiwa ni vumba. Ku game ku khemiwa ribye ka ntshava, ribye leli li game li ya ba a minenge ya xitatuwa. Se xitatuwa hinkwaxu xi pfotloka xi va mpupu. Ku gama ku ba moya wawukulu lowu nga hangalasa mpupu lowuyani hinkwawu. Se ribye leliyani li game li hundzuka a ntshava yayikulu hintamu leyi nga tata misava hinkwayu.

Daniyele a tlhamusele Nebukadinazara a ku:

— A nhloko ya woru ka xitatuwa i mfumu wa wena. A prata i mfumu lowu nga ta landzela. Se ku ta va ni mfumu wun’wanyani wa ku fana ni kobre lowu nga ta fuma misava hinkwayu. Ku ta gama ku va ni mfumu wun’wani lowu nga ta va ni matimba ku fana ni nsimbi. Hi wugamu ku ta va ni mfumu lowu nga ta divhidirana. Mfumu lowu, ka tlhelo lelin’wani wu ta va ni matimba ku fana ni simbi kambe ka tlhelo lelin’wani a wu nga ta va ni matimba ku fana ni vumba. Ribye leli nga hundzuka ntshava i Mfumu wa Xikwembu. Mfumu wolowo wu ta helisa mimfumu hinkwayu se wona wu ta tshama hi masiku ni masiku.

Nkama Nebukadinazara a nga twa leswo a khizame a byela Daniyele a ku:

— I Xikwembu xa wena xi nga ku byela leswi ni nga swi lorha. A ku na Xikwembu xin’wani lexi fanaka na xona.

Handle ka ku dlaya Daniyele, Nebukadinazara a mu veke swaku a va xefe wa tintlharhi hinkwatu a tlhela a va govhernadori wa Babilona. Wa swi vo, Yehovha a xi hlamulile xikhongelo xa Daniyele ni vanghanu va yena.