Moxe A Lange Ku Tirhela Yehovha

Wa khumbuka leswaku ndjangu wa Yakobe wu fambe wu ya tshama Gibita? A ndjangu wa Yakobe wu kulile hintamu wu tlhela wu sungula ku tiviwa hintamu aGibita. Loko se ku hundze malembe ya manyingi Yakobe na Yosefa na va file, ku fume hosi ya nyuwani aGibita leyi a yi vitaniwa Faru. Loko yi vone swaku Vayisrayele a va ya va tala hintamu ku tlula Vagibita yi sungule ku chava hintamu. Hi mhaka leyo yi nyikele nawu wa leswaku Vayisrayele a va fanele va tirhisiwa hintamu a masin’wini, va tlhela va tama va yendla matijolu ya manyingi. Kambe swoleswo a swi nga pfuni nchumu, Vayisrayele a va ya va tala. Se Faru a tlhele a nyikela nawu wa leswaku a ku fanele ku dlayiwa swivanani swa Vayisrayele swa vavanuna leswi a swa ha ku psaliwa. Leswo swi yendle leswaku Vayisrayele va chava hintamu.

Hi nkama wolowo, wansati mun’wani wa Muyisrayele, lweyi vito la yena a ku li Yokebedi a psale xin’wanani xa ku xonga hintamu. Se leswaku Faru a nga xi dlayi, Yokebedi a xi pete ka ndzhava, a gama a ya xi tumbeta kusuhi ni Riyu Nilu. Naswona makwavu wa kona Miriyamu a tshame kusuhi ni kolahayani a txuvukisela a vona swaku a ku ta yendleka yini.

Se nkama n’wana wa Faru a a li ku hlambeni ka Riyu Nilu, a twe xin’wanani na xi rila na xi li ndzeni ka ndzhava, se a xi yela. Loko a xi vona, a xi twela wusiwana. Se Miriyamu makwavu wa kona a tshinelela n’wana wa Faru, a gama a mu vutisa a ku:

— A wu swi lavi ni ku vitanela wansati leswaku a hlayisa n’wana lweyi?

N’wana wa Faru a hlamula a ku:

— Ina na swi lava, u nga mu vita.

Se Miriyamu a tsutsuma a ya vitana mamani wa kona. Se loko a fikile, n’wana wa Faru a ku:

— Ni kombela u ni hlayisela n’wana lweyi, ni ta ku hakela hinkwaswu leswi lavekaka.

Loko mufana a ya a kula, Yokebedi a mu tekile leswaku a ya mu nyikela ka n’wana wa Faru, n’wana wa Faru a fike a mu chula swaku i Moxe a tlhela a mu hlayisa ingi hi loko a hlayisa n’wana wa yena. Moxe a kulisiwe hi ndlela ya kahle swinene, funtshi a a ni hinkwaswu leswi a a swi lava. Kambe yena a a swi tiva swaku a a li Muyisrayele, hi mhaka leyo, a lange ku nyima ni vanhu va Yehovha.

Nkama lowu a a ni 40 wa malembe, Moxe a lange ku pfuna vanhu va Yehovha. Siku lin’wani, a vone Mugibita na a ba Muyisrayele, se Moxe a fika a ba Mugibita. A mu ba hintamu swinene a za a fa, a gama a mu seletela ka misava. Se Faru a game a swi tsumbula, se loko a swi tsumbulile a lave ku dlaya Moxe. Moxe a game a baleka a ya ka tiko la Midiyani, kambe Yehovha a tame a mu hlayisa.