Ni Fanele Ni Khongela Ka Vakwetsimi?

Nhlamulu ya Bibele

Ihim. Bibele li kombisa swaku hi fanele hi khongela ka Xikwembu hi vito la Yesu. Yesu a byele vadjondzisiwa va yena a ku: “Mi fanele mi khongelisa xileswi: Papayi wa hina lweyi a nga matilweni, vito la wena a li kwetsimisiwi.” (Matewu 6:9) Yesu a nga zanga a byela vadjondzisiwa swaku a va fanela va khongela ka vakwetsimi, tintsumi kumbe munhu mun’wana handle ka Xikwembu.

Yesu a tlhele a byela valandzeli va yena a ku: “Hi mina ndlela ni ntiyiso ni wutomi. A ku na munhu lweyi a nga yaka ka Papayi loko ku nga li hi mina.” (Yohani 14:6) Yesu hi yena ntsena lweyi a nga pfumeleliwa hi Xikwembu swaku hi tshinela ka xona hi ku tirhisa vito la yena. — Vaheberu 7:25.

Ni nga khongela ka Xikwembu ni tlhela ni khongela ka vakwetsimi?

Ka Minawu ya 10, Xikwembu xi li: “Mina Yehovha, Xikwembu xa wena, ni Xikwembu lexi lavaka kugandzeliwa xoxe.” (Eksoda 20:5) Swi vula yini kuva Xikwembu xi lava ku gandzeliwa xoxe? Xikwembu xi lava swaku minchumu hinkwayu leyi yi yelanaka ni wugandzeli, ku patsa ni ku khongela, hi yentxela xona ntsena. — Esaya 48:11.

Hi ta kwatisa Xikwembu loko hi khongela ka munhu mun’wana hambi ku li ka vakwetsimi kumbe tintsumi. Nkama mupostolo Yohani a nga lava ku gandzela ntsumi yona yi mu tsimbisile yi ku: “U nga yentxi leswo! Mina no va xikarawa ku fana na wena ni vamakwenu lava nga ni ntirho wa ku vula ntiyiso hi ta Yesu. Gandzela Xikwembu.” — Nhlawutelo 19:10.