Mareferensiya Ya Xibukwana Xa Mintlhanganu Ya Mahanyelo Ni Ntirho
1 KU YA KA 7 KA MARÇO
XUMA XI NGA KA RITO LA XIKWEMBU | TINHLAYO 7-8
“Hi Nga Djondza Yini Hi Vayisrayele Nkama A Va Li Mananga?”
Perspicaz vol. 1 paj. 540 par. 7
Bandla
A Israyele, tindhuna hi tona leti a ti nyimela vanhu. (Ezr 10:14) Hi mhaka leyo tindhuna toleto ti nyikele magandzelo loko ku yakiwe tabernakela. (Tin 7:1-11) Naswona ka masiku ya Nehemiya lava a va yentxa a ntwananu wa ku tsaliwa hi ku nyimela a tiko hinkwalu, a ku li vaprista, valevhi ni varhangeli va vanhu. (Neh 9:38–10:27) Ka liyendzo la Vayisrayele a mananga, a ku ni “tindhuna ta xitshungu, leti a ti tiviwa hintamu.” Naswona 250 wa tona ti nyime na Kora, Dathani, Abirama na Oni, ti lwisana ni wurhangeli la Moxe na Aroni. (Tin 16:1-3) Hi ku landza a nkongomiso wa Xikwembu, Moxe a hlawule 70 wa madoda a Israyele swaku ma mu pfuna ku rhangela Vayisrayele, hikusa a a nga ta swi kota ku va rhangela a li yexe. (Tin 11:16, 17, 24, 25) Levhitika 4:15 yi vulavula hi madoda ya xitshungu naswona swi tikomba ingaku lava a va nyimela Vayisrayele a ku li madoda ya tiko, tindhuna, ni vayavanyisi. — Tin 1:4, 16; Yx 23:2; 24:1.
Perspicaz vol. 3 paj. 467 par. 4
Rubeni
Ka matende ya Vayisrayele, a Varubeni lava a va rhendzeliwile hi Vasimiyoni ni Vagadi a va tshama ka tlhelo la sul ka tabernakela. Loko tinxaka leti tinharu ti li ku fambeni ku nga lixaka la Yuda, la Zebuloni ni la Isakari leti a ti rhangeliwa hi Rubeni, a ti nga patsani. Lixaka lin’wana ni lin’wana a li famba hi xi lona. (Tin 2:10-16; 10:14-20) Yendlelo leli, hi leli a li tirhisiwa loko tinxaka hinkwatu ta Israyele ti nyikela magandzelo hi siku leli a ku sunguliwa ku tirhisiwa tabernakela. — Tin 7:1, 2, 10-47.
Murindzi 01/08/04 paj. 25 par. 1
Tipontunkulu Ta Buku La Tinhlayo
8:25, 26. Leswaku ku tiyisekiwa leswaku a ku vekiwa vavanuna lava fanelekaka ka ntirho wa Valevhi, ni ku pimisela tintanga ta vona hi leswi se va nga guga, vavanuna lava nga guga a va lerhisiwa ku tshika ntirho lowu bohaka. Hambiswilitanu, a va pfumeleliwa ku tirha hi ku tirhandzela leswaku va pfuna Valevhi van’wana. Phela namuntlha ka ntirho wa ku chumayela a hi reformari kumbe ku humula, kambe mhaka leyi yi nga hi djondzisa nchumu wa lisima swinene. Loko Mukreste a nga ha swi koti ku hetisisa a mintirho ya yena abandleni hi mhaka ku guga, a nga ha yentxa mintirho yin’wana ya ku vevuka leyi a yi kotaka.
Lavetela Xuma Ka Rito La Xikwembu
Perspicaz vol. 3 paj. 328
Mativula
Leswi vana hinkwavu va mativula va vanuna va Israyele a va ta va tinhloko ta mindjangu, a va nyimela tiko hinkwalu. Hi mhaka leyo, Yehovha a vitane tiko hinkwalu la Israyele a ku i “mativula”, leswi vulaka swaku i tiko la yena la ku sungula hi mhaka ya xipfumelelwanu xa yena na Abrahamu. (Eks 4:22) Leswi Yehovha a nga ponisa a wutomi la vona a te: “Ni basiseli vavanuna hinkwavu va mativula va Israyele. A wa ku sungula ku psaliwa, kumbe i munhu kumbe i xihari i wa mina”. (Eks 13:2) Hi mhaka leyo mativula hinkwawu ya vavanuna a ma nyikeliwa ka Yehovha.
8 KU YA KA 14 KA MARÇO
XUMA XI NGA KA RITO LA XIKWEMBU | TINHLAYO 9-10
“Yehovha A Va Rhangelisa Ku Yini Vanhu Va Yena?”
Perspicaz vol. 1 paj. 39 par. 6
Matende
Ndlela leyi Vayisrayele a va rhurha hi yona va ya ka ndhawu yin’wana a swi kombisa swaku i vanhu va ku hleleka. Naswona Moxe a vulavula hi kolomu ka 40 wa mayendzo ya Vayisrayele ka buku la Tinhlayo ndzima 33. Loko rhefu li nyima a henhla ka tabernakela, na vona Vayisrayele a va nyima kolano va gwimba matende ya vona kambe loko rhefu li suka na vona a va suka va famba. Phela Vayisrayele, “a va gwimba matende xileswi Yehovha a nga va byelisa xiswona naswona a va ma susa loko Yehovha a va byela.” (Tin 9:15-23) A ku chayiwa timhalamhala timbirhi ti twala ka vanhu hinkwavu leswaku ti nyikela nawu lowu taka hi ka Yehovha. (Tin 10:2, 5, 6) Loko timhalamhala ti chayiwa hi ndlela ya ku hlawuleka Vayisrayele a va fanele va rhurha. Leswo swi sungule ku yentxeka hi 1512 hi wheti ya wumbirhi hi siku la wu 20 na Yesu a nge se ta lani misaveni. Nkama va nga suka, a arka la xipfumelelwanu a li li frenti, na li landzeliwa hi 3 wa tinxaka, ku nga Yuda, Isakari na Zebuloni. Ku landzela Vagerixoni ni Vamerari lava a va tlakula swilo leswi a ku yentxiwa tabernakela hi swona. A ku tlhela ku landzela 3 wa tinxaka, ku nga Rubeni, Simiyoni na Gadi. Ku tlhela ku landzela Vakohata na va khome swilo swa ndhawu ya ku kwetsima. Ku tlhela ku landzela 3 wa tinxaka, ku nga Efrayimi, Manasi na Benjamini. Hi wugamu a ku landzela 3 wa tinxaka ku nga Dani, Azer na Nafitali. A va yentxa swaku tinxaka timbirhi leti ti nga ni vanhu va vanyingi naswona ti nga ni matimba swinene lin’we la tona liva frenti kasi lin’wana li va la wugamu. — Tin 10:11-28.
Murindzi 15/04/11 mapaj. 4-5
Wa Swi Vona Swaku Hi Yehovha A Hi Rhangelaka?
Hi nga swi kombisa ku yini leswaku ha li tlangela a wurhangeli la Xikwembu? Mupostolo Pawulo a te: “Yingisani lava rhangelaka xikarhi ka n’wina mi tlhela mi tiveka hansi”. (Heb. 13:17) Minkama yin’wana swi nga ha karhata ku yentxa leswo. Hi xikombiso: A hi nge a wu li Muyisrayele ankameni wa Moxe. Loko se wu fambe mpfhuka wa ku leha, a rhefu li nyima. A wu swi tivi leswaku li ta nyima nkama wa ku fikela kwini kolanu, kumbe li ta nyima siku, kumbe vhiki kumbe tiwheti ta tinyingi. U gama u tivutisa leswi: ‘Ni fanele ni tlhantlha swidjumba swa mina hinkwaswu?’ Kumbexana a wu ta rhanga hi ku pfula xidjumba lexi nga ni swilo leswi u swi lavaka hi nkama wolowo. Kambe loko se ku khalute masiku, u lavetela nchumu u nga xi kumi, u gama u tlhantlha swidjumba hinkwaswu u swi veketela kahle. Kambe loko wa ha ku heta ku swi lunghiselela, u vona rhefu li tlakuka. Phela hi nkama wolowo u fanele u sangula ku rumarela u tlhela u tsimbelela swidjumba swa wena u ta famba. Phela a tivuya hi ku yentxa leswo. Hikusa “loko rhefu li suka na vona ava suka.” — Tinhl. 9:17-22.
Hina ke? Hi nga yentxa yini loko hi kuma nkongomiso wa Xikwembu? Ku nga va swaku hi ta zama ku wu tirhisa loko se hi wu twile? Kumbe hi tama hi yentxa swilo hi ndlela leyi hi nga yi tolovela? Ku nga va swaku ha yi tirhisa minkongomiso ya nyuwani leyi hi yi kumaka ya ku fana ni leyi vulavulaka hi ku fambisa swidjondzo swa Bibele? Ku chumayela vanhu lava vulavulaka lirimi lin’wana? Ku va ni djondzo ya ndjangu vhiki ni vhiki? Ku tirhisana ni Comissão la ku Vulavulisana ni Swibedlele kumbe ku landzela minkongomiso loko u li kongresu? Hi nga tlhela hi kombisa leswaku ha wu tlangela nkongomiso wa Yehovha loko hi pfumela ku layiwa. Loko hi lava ku yentxa swiboho swa lisima, a hi fanelanga hi tshemba a wutlhari la hina kambe hi fanele hi tshemba Yehovha ni nkongomiso wa nhlengeletanu ya yena. Naswona ku fana ni n’wana lweyi a tsutsumelaka ka papayi wa yena loko ku va ni xidzedze, na hina loko hi kumana ni swikarhatu hi fanele hi yingisa nkongomiso wa Yehovha lowu a hi nyikaka hi ku tirhisa nhlengeletanu ya yena.
Lavetela Xuma Ka Rito La Xikwembu
Perspicaz vol. 1 paj. 253 par. 5
Ku Tlhangana
Lisima La Ku Tlhangana. A lisima la ku tlhangana leswaku vanhu va ta djondza hi Yehovha a li kombisiwa kahle hi Paxkwa leli a li tlangeliwa lembe ni lembe. Wanuna mun’wana ni mun’wana lweyi a a basile wa ku kala a nga yendzanga kambe a nga yi ka ntlhanganu wa Paxkwa a a fanele a dlayiwa. (Tin 9:9-14) Loko Hosi Ezekiya a vitana vanhu hinkwavu lava a va tshama Yuda ni Israyele swaku va ya Jerusalema va ya tlangela a Paxkwa, a vule leswi: “N’wina Israyele, tlhelelani ka Yehovha . . . mi nga tiwomisi tinhloko ku fana ni vavhovho va n’wina. Yingisani mi ta ka yindlu ya yena leyi a nga yi yentxa yi kwetsima hi laha ku nga heliki, mi tirhela Yehovha Xikwembu xa n’wina leswaku ku kwata ka yena ku nga mi weli. Yehovha Xikwembu xa n’wina a ni ntwelawusiwana ni musa, a nge mi tshiki loko mi tlhelela ka yena”. (2Tk 30:6-9) Loko hi maxivomu munhu a nga yi ka Paxkwa, a swi kombisa swaku a nga na mhaka ni Xikwembu. Hambileswi Vakreste namuntlha va kalaka va nga li tlangeli a Paxkwa, Pawulo a vule leswaku a hi fanelanga hi tshika ku tlhangana ni vanhu va Xikwembu nkama ni nkama loko a ku: “A hi hlayisaneni leswaku hi tiyisana, hi rhandzana hi tlhela hi yentxa mintirho ya yinene, hi nga tshikeni ku tlhangana ku fana ni leswi van’wana va yentxisaka xiswona kambe hi tiyisana naswona hi yentxa leswo ngopfungopfu leswi mi vonaka leswaku siku li le kusuhi.” — Heb 10:24, 25; vona CONGREGAÇÃO.
15 KU YA KA 21 KA MARÇO
XUMA XI NGA KA RITO LA XIKWEMBU | TINHLAYO 11-12
“Hi Mhaka Muni Hi Nga Fanelenga Hi Ngurangura?”
Murindzi 15/06/01 paj. 17 par. 20
U Nga Vi Mutwi Lweyi A Hantlaka A Khohlwa
Vakreste va vanyingi a va wanga ka ntlhamu wa ku yentxa masangu ya kula ma nga li nawini. Kambe, hi fanele hi tivonela leswaku hi nga tshameli ku khalakhala hikusa Yehovha a nga huma ka hina. Pawulo a vule lewi: “Hi nga ringeni Yehovha ku fana ni leswi van’wana va vona va nga yentxisa xiswona kutani va dlayiwa hi tinyoka. Naswona mi nga ngurangureni ku fana ni leswi van’wana va vona va nga ngurangura kutani va dlayiwa hi ntsumi ya Xikwembu.” (1 Vakorinto 10:9, 10) Vayisrayele a va tshamela ku ngurangura hi Moxe na Aroni. Phela hambi hi ka Xikwembu va ngurangurile, va rivala mana leyi xi nga va nyika hi singita. (Tinhlayo 16:41; 21:5) Ku nga va swaku Yehovha a kwatisiwe swinene hi ku ngurangura ka vona ku tlula nsila ya swa masangu leyi va nga yi yentxa? Phela Bibele li kombisa leswaku va ku tala lava nga ngurangura kumbe ku khalakhala va dlayiwe hi tinyoka. (Tinhlayo 21:6) Naswona vanhu va ku tlula 14.700 va dlayiwile hi mhaka ya ku ngurangura. (Tinhlayo 16:49) Hi mhaka leyo a hi fanelanga hi ringa Yehovha hi ku kala hi nga ma hloniphi malulamiselo ya yena.
Murindzi 15/07/06 paj. 15 par. 7
‘Tshika Ku Ngurangura’
Vaisrayele a va txintxile mapimiselo ya vona hikakunene! Ku tlangela loku a va li na kona ku sunguleni ku va yentxe va yimbelelela Yehovha va mu khensa hi mhaka ya leswi a nga va humesa aGibita ni ku va ponisa aLwandle la ku Pshuka. (Eksoda 15:1-21) Hambileswo, leswi a va kumana ni swikarhatu a mananga naswona a va chava Vakanana, va game va sungula ku ngurangura. Handle ka ku va khensa Xikwembu hileswi xi nga va ponisa, va sungule ku xi nyika nandzu hi mhaka ya leswi a va pimisa swaku xi va tsona minchumu yin’wana. Hi mhaka ya leswo, ku ngurangura ka vona a swi kombisa swaku a va nga ma tlangeli hi ku helela malulamiselo ya Yehovha. A swi hlamalisi leswi Yehovha a nga te: “Vanhu lava va ku kala va nga yingisi va ta ni ngurangurela ku fikela kwini?” — Tinhlayo 14:27; 21:5.
Perspicaz vol. 1 paj. 100 par. 3
Ku Ngurangura
Ku Ngurangura. Ku ngurangura swa godolisana ni ku hetana matimba. Loko Vayisrayele va ha ku huma aGibita va ngurangureli Yehovha, hi ku solasola a wurhangeli la Moxe na Aroni. (Eks 16:2, 7) Phela leswi swi game swi godolisa Moxe la ka kuva a vona swaku a swi yampsa a fa. (Tin 11:13-15) Lweyi a nguranguraka a tilavela lifu hi yexe. Lava a va ngurangurela Moxe, ka Yehovha a swi fana ni loko va delela a wuhosi la yena Yehovha. (Tin 14:26-30) Vanhu va vanyigi va file hi mhaka ya ku ngurangura ka vona.
Lavetela Xuma Ka Rito La Xikwembu
Perspicaz vol. 2 paj. 748
Mana
Ntlhamuselo. A mana a yi basile ku fana ni nyingi ya coentro naswona a yi voneka ku fana ni bdélio ku nga muxaka wun’wana wa xinsinyani xi humesaka swilo swa ku vonekela ku fana ni diamante. A mana a wu nandzika ku fana ni mabulaxa ya ku hambiwa hi wulombe la tinyoxi. Loko mana se yi siliwili kumbe yi kandziwa, a va gama va yi sweka kumbe va hamba mabolu kumbe va yi woxa. — Eks 16:23, 31; Tin 11:7, 8.
22 KU YA KA 28 KA MARÇO
XUMA XI NGA KA RITO LA XIKWEMBU | TINHLAYO 13-14
“Lipfumelo Li Hi Pfunisa Ku Yini Ku Va Ni Xivindzi?”
Murindzi 01/10/06 mapaj. 16-17 mapar. 5-6
Ku Va Ni Xivindzi Hi Mhaka Lipfumelo Ni Ku Chava Xikwembu
Hambileswo, swipiyawu swimbirhi ku nga Yoxuwa na Kalebe a va tinyimisele ku nghena aTikweni leli Tshembisiweke. Va te: Vakanana “i pawu la hina. Lexi va xi tshembaka xi sukile a henhla ka vona, funtshi Yehovha a na hina. Mi nga va chavi.” (Tinhlayo 14:9) Ku nga va swaku Yoxuwa na Kalebe a vo tikanganyisa loko va vula leswi? Nada! Phela vona ni Vayisrayele hinkwavu va swi vonile loko Yehovha a danisa tiko la matimba la Gibita ni swikwembu swa lona hi ku tirhisa 10 wa makhombo. Va tlhele va swi vona loko Yehovha a lovisa Faru ni masonchwa ya yena ka Lwandle la ku Pshuka. (Tipisalema 136:15) Phela a swipiyawu leswiyani swa 10, ni vanhu va’wana va nga kholwa mavunwa ya swona a va nga na xivangelo xa ku chava. Loko Yehovha a kombisa ku karhateka ka yena hi mhaka leyi, a te: “Vanhu lava va ta pfumala xihloniphu ka mina ku fikela kwini naswona va ta pfumala lipfumelo ka mina ku fikela kwini, hambileswi ni nga va yentxela swilo swa swinene?” — Tinhlayo 14:11.
6 Yehovha a nga djikadjikanga loko a va byela mhaka leyi a yi va karhata. Wutoya la vona a li kombisa swaku a va na lipfumelo. Phela lipfumelo ni xivindzi swa fambisana. Hi mhaka leyo, mupostolo Yohani a tsalele Vakreste leswi a va fanele va swi yentxa ka minzamu ya vona ya ku tshama va tshembekile, a ku: “Lipfumelo la hina hi lona li nga yentxa swaku hi kota ku hlula misava.” (1 Yohani 5:4) Namuntlha, lipfumelo la ku fana ni la Yoxuwa na Kalebe li yentxa leswaku mahungu ya ku tsakisa ya Mfumu ma chumayeliwa amisaveni hinkwayu hi Timboni ta Yehovha leti tlulaka 6 milhões. Xikarhi ka tona ku ni vanhu va vakulu, vatsongwana, majovhem, lava lwaka ni mavabyi ni lava hanyeke kahle. A nga kona nala lweyi a nga kotaka ku miyeta vachumayeli lava nga ni matimba ni xivindzi. — Varoma 8:31.
Lavetela Xuma Ka Rito La Xikwembu
Perspicaz vol. 1 paj. 644
Tiko Leli Xikwembu Xi Nga Li Nyika Vayisrayele
A TIKO leli Xikwembu xi nga li nyika Vayisrayele a li li linene hintamu. Loko Moxe a rhumele swipiyawu leswaku swi ya kambela Tiko leli nga Tshembisiwa ni swaku swi vuya ni swilo nyana swa tiko lolelo. Swipiyawu leswi, swi tise makuwa, mafruta ya maromana, ni mawuvha ya manyingi ya makulu ma nga tlakuliwa hi vanhu vambirhi hi ku tirhisa nhonga! Hambileswi swipiyawu leswi swi nga chava, hi mhaka ya ku pfumala lipfumelo, swi vule swaku tiko leliyani li tale hi leyiti ni wulombe la tinyoxi. — Tin 13:23, 27.
29 KA MARÇO KU YA KA 4 KA ABRIL
XUMA XI NGA KA RITO LA XIKWEMBU | TINHLAYO 15-16
“Tivoneli! U Nga Tibyeli”
Murindzi 15/09/11 paj. 27 par. 12
Ku Nga Va Swaku Yehovha Wa Ku Tiva?
Loko Vayisrayele va li ndleleni ya ku ya aTikweni leli Tshembisiweke, Kora a sungule ku pimisa swaku ndlela leyi Yehovha a a va rhangela hi yona vanhu va yena a yi hoxile. Hi mhaka leyo vanhu van’wana va 250 lava a va li tindhuna va nyime na Kora leswaku va zama ku lunghisa swilo hi ndlela ya vona. Phela Kora ni van’wana a va pimisa swaku va ni wunghanu la linene na Yehovha. Va byele Moxe va ku: “Hi karhalile hi n’wina, hikusa xitshungu lexi hinkwaxu xa kwetsima naswona Yehovha a le xikarhi ka xona”. (Tinhl. 16:1-3) Hi nga vona ndlela leyi a va titshemba ni ku tibyela hi yona! Kambe Moxe a va byele leswi: “Yehovha a ta tivisa lweyi a nga wa yena.” (Lerha Tinhlayo 16:5.) Hi mundzuku ka kona loko li pela, Kora ni hinkwavu lava nga nyima na yena va file hi leswi va nga delela Yehovha. — Tinhl. 16:31-35.
Murindzi 15/09/11 paj. 27 par. 11
Ku Nga Va Swaku Yehovha Wa Ku Tiva?
Moxe na Kora a va hambanile hintamu a mhakeni ya ku hlonipha malulamiselo ya Yehovha ni swiboho swa yena. Leswi va nga swi yentxa swi khumbe ndlela leyi Yehovha a a va vona hi yona. Kora a a li Mulevhi wa Mukohata funtshi a nyikiwe mintirho ya yinyingi ya lisima naswona swi nga yentxeka a vone Vayisrayele loko va ponisiwa ka Lwandle la ku Pshuka. A seketele wuyavanyisi la Yehovha la ku dlaya Vayisrayele lava a va nga yingisi aNhaveni ya Sinayi naswona a tlhele a tirhisiwa swaku a tlakula a arka la xipfumelelwanu. (Ekso. 32:26-29; Tinhl. 3:30, 31) Swi tikomba ingaku Kora a tshame a tshembekile ka Yehovha malembe ya manyingi naswona vanhu va ku tala aIsrayele a va mu hlonipha.
Lavetela Xuma Ka Rito La Xikwembu
Murindzi 01/09/98 paj. 20 mapar. 1-2
Rhangisa Swilo Swa Lisima A Wuton’wini!
Yehovha a swi vone ku li xihoxo xa xikulu swinene. Bibele yi li: “Hi ku famba ka nkama Yehovha a byela Moxe a ku: ‘Munhu lweyi a fanele a dlayiwa’”. (Tinhlayo 15:35) Hi mhaka muni Yehovha a a kwate hintamu hi leswi munhu lweyi a nga swi yentxa?
Vanhu a va ni 6 wa masiku swaku va hlengeleta tihunyi ni ku lunghiselela swakudla leswi lavekaka, timpahla ta vona ni ndhawu ya ku tshama. Siku la wu 7 a li fanele li hlayiseliwa wuxaka la vona na Yehovha. Hambileswi a swi nga bihanga ku hlengeleta tihunyi, kambe a swi bihi hintamu loko va swi yentxa hi siku leli a va li hlayisele ku gandzela Yehovha. I ntiyiso swaku namuntlha a hi le hansi ka Nawu wa Moxe, kambe mhaka leyi yi nga hi djondzisa swaku hi fanele hi rhangisa swilo swa lisima ka wutomi la hina. — Vafilipiya 1:10
5 KU YA KA 11 KA ABRIL
XUMA XI NGA KA RITO LA XIKWEMBU | TINHLAYO 17-19
“Hi Mina Ndzhaka Ya Wena”
Murindzi 15/09/11 paj. 13 par. 9
Wa Tshemba Swaku Yehovha A Ta Ku Hlayisa?
Pimisa hi Valevhi va ku a va yi kumanga ndhawu leyi a yi ta va ndzhaka ya vona. Leswi a va vona wugandzeli la Yehovha ku li nchumu wa lisima ka wutomi la vona, a va kholwa swaku Yehovha a ta va nyika leswi va swi lavaka hikusa a te: “Hi mina xiyavelo xa wena”. (Tinhl. 18:20) Hambileswi namuntlha hi kalaka hi nga tirhi ka tempele ya ku fana ni ya vaprista ni Valevhi, hi nga va tekelela hi ku tshemba swaku Yehovha a ta hi hlayisa. Leswi magamu ma nga kusuhi hintamu, i swa lisima ku tshemba swaku Yehovha a ta hi hlayisa. — Nhla. 13:17.
Murindzi 15/09/11 paj. 7 par. 4
Yehovha I Xiyavelo Xa Mina
A ku li yini xiyavelo lexi Valevhi a va ta xi kuma? Yehovha a vule swaku a a ta va xiyavelo xa vona hileswi a a ta va nyika ntirho wa ku hlawuleka swinene handle ka ku va nyika ndzhaka ya tiko. Wuprista la Yehovha a ku li ndzhaka ya vona. (Yoxu. 18:7) Tinhlayo ndzima 18 yi kombisa swaku Valevhi a va nga ta va swisiwana. (Lerha Tinhlayo 18:19, 21, 24.) Valevhi a va fanele va nyikiwa xiphemu xin’wana ni xin’wana xa wu 10 xi va ndzhaka leyi hakelaka ntirho wa vona. Leswi swi vula leswaku a va ta kuma xiphemu xa wu 10 ka ntshovelo ni ka swifuyu swa Vayisrayele. Kutani vona Valevhi a va fanele va nyikela xiphemu xa wu 10 ka leswi va nga nyikiwa swona. Ka leswi a va ta swi nyikela a va fanele va hlawula leswinene ku tlula hinkwaswu swaku va seketela ntirho wa wuprista. (Tinhl. 18:25-29) Vaprista a va yamukela minyikelo hinkwayu ya ku kwetsima leyi Vayisrayele a va yi tisela Xikwembu ka ndhawu ya xona ya wugandzeli. Hi mhaka leyo, vaprista a va ni xivangelo xa ku twala xa ku tshemba swaku Yehovha a a ta va hlayisa.
Lavetela Xuma Ka Rito La Xikwembu
Khindlimuka! 08/06/02 paj. 14 par. 2
Munyu! I Nchumu Wa Lisima
Munyu wu nga tirhiseliwa ku fanekisela nchumu xa ku tiya ni ku hlwela ku bola. Hi mhaka leyo, ka Bibele a ntwananu kumbe xipfumelelwanu xa ku a xi fanele xi tshama nkama wa ku leha a xi vitaniwa swaku i xipfumelelwanu xa munyu. Lava a va xi yentxa a va gama va dla xikan’we swakudla leswi nga ni munyu ku kombisa swaku se va pfumelelanile. (Tinhlayo 18:19) Nawu wa Moxe a wu vula swaku a munyu a wu fanele wu cheliwa ka magandzelo lawa a ma nyikeliwa ka altari, ku komba swaku magandzelo wolawo a ma nga bolanga.
12 KU YA KA 18 KA ABRIL
XUMA XI NGA KA RITO LA XIKWEMBU | TINHLAYO 20-21
“Tama U Va Wa Ku Rhula Hambi Swi Karhata”
Murindzi 02/19 paj. 12 par. 19
Lwela Kuva Munhu Wa Ku Rhula Leswaku U Tsakisa Yehovha
Loko hi va vanhu va ku rhula, a hi nga ta yentxa swihoxo. A hi tlheleni ka xikombiso xa Moxe. Ku ringana malembe ya ku tala a ve munhu wa ku rhula lweyi a a tsakisa mbilu ya Yehovha. Kambe ndzhaku nyana ka loko Vayisrayele va hete kolomuya ka 40 wa malembe na va tsendzeleka a dezertu, Moxe a tsandzekile ku hlayisa wumunhu leli a a li na lona. Meriyamu, makwavu wa yena wa wansati, a file a tlhela a lahliwa aKadexi. Leswo swi mu vavise swinene Moxe. Phela, swinga yentxeka kuve Meriyamu lweyi angamu ponisa aGibita loko a ha li mutsongo. Kungese hundza nkama wa ku fika kwini, Vayisrayele va tlhele va sungula ku khala, va vula leswaku a va nga hlayisiwi kahle. Ka khambi leli, va mu holovisile hi mhaka ya mati. Hambileswi a va swi vonile leswaku i Yehovha lweyi a a nyike Moxe matimba ya ku yentxa masingita ya ku tala ni leswaku Moxe a a va tirhela na a nga tifeleli, va khalile hi mhaka ya mati. Va kwatele Moxe ingi hi loko ku li yena lweyi a a va dlaya hi torha. — Tinhl. 20:1-5, 9-11.
Murindzi 02/19 paj. 13 mapar. 20-21
Lwela Kuva Munhu Wa Ku Rhula Leswaku U Tsakisa Yehovha
Moxe a kwate swinene la ka kuva a tsandzeka ku kombisa wumunhu la yena la ku rhula. Handle ka ku vulavula ni ribyi hilaha Yehovha a a mu rhume hi kona, Moxe a vulavule hi ndlela ya ku karhata swinene ni Vayisrayele a tlhela a vula leswaku hi yena a a ta yentxa singita la kuva nyika mati. A game a ba ribyi kambirhi se ku sungula ku huma mati. I yini lexi yentxeke Moxe a tsandzeka kuva munhu wa ku rhula ka xiyimu lexi? I ve ku kwata ni ku tibyela. (Pis. 106:32, 33) Hikolaho ka leswi a nga tsandzeka ku hlayisa wumunhu la ku rhula swa nkama nyana, a luzekeliwe hi mukhandlu wa ku nghena ka Tiko Leli Tshembisiweke. — Tinhl. 20:12.
Rungula leli li hi nyika tidjondzo ta lisima. Ya ku sungula, hi fanele hi lwa hi matimba leswaku hi tama hi va vanhu va ku rhula. Loko hi tshika ku yentxa minzamu ya ku hlayisa wumunhu leli, hi ku hantlisa hingaha sungula ku tibyela ivi hi vulavula swilo swa ku kala swinga na nhloko. Ya wumbirhi, a swi vevuki kuva munhu wa ku rhula loko u karhatekile. Hikolaho, loko hi li ka xiyimu lexo, hi fanele hi yentxa hinkwaswu leswi hinga swi kotaka leswaku hi va vanhu va ku rhula.
Murindzi 01/09/09 paj. 19 par. 5
Juwiji Lweyi A Julgaraka Hi Ku Lulama
Xa ku sungula Yehovha a nga mu rhumanga Moxe swaku a ya vulavula ni Vayisrayele hambi hi ku va byela swaku a va delela Xikwembu. Xa wumbirhi Moxe na Aroni a va xi dzunisanga Xikwembu. Yehovha a te: “A mi ni kwetsimisanga.” (Vhersikulu 12) Loko Moxe na Aroni va ku: “Hi ta mi humesela mati”. A swo yentxa ingi hi vona lava a va ta yentxa singita la ku humesa mati ka ribyi ku nga li Xikwembu. Xa wunharhu, a xikhatisu xa vona a xi fambisana ni wuyavanyisi la Xikwembu. Yehovha a nga pfumelelanga swaku Vayisrayele van’wana va ku delela va nghena a Kanana, hi mhaka leyo a yentxe swa ku fana ka Moxe na Aroni. (Tinhlayo 14:22, 23) Xa wu 4, Moxe na Aroni, hi vona a va rhangela a tiko la Israyele. Phela loko munhu a ni mintirho ya yinyingi na xona Xikwembu xi nyimela swa ku tala hi yena. — Luka 12:48.
Lavetela Xuma Ka Rito La Xikwembu
Murindzi 15/06/14 paj. 26 par. 12
Wa Ku Twisisa Ku Kala Ku Hetiseka Ka Van’wana Ku Fana Na Yehovha?
Yehovha a a tava a tekele ku mu khatisa Aroni hi nkama wolowo hi mhaka ya swihoxo leswi a nga swi yentxa. Kambe a swi vonile leswaku Aroni a a nga li munhu wa ku yentxa minchumu ya ku biha minkama hinkwayu. Swi tikomba ingi Aroni a pfumelele swiyimu kumbe ku xengiwa hi van’wana leswaku a tshika ku yentxa swa swinene. Kambe nkama lowu Aroni a nga swi vona swaku a a yentxe swihoxo, hi ku hantlisa a pfumelile swaku a phazamile naswona a tame a seketela a wuyavanyisi la Yehovha. (Ekso. 32:26; Tinhl. 12:11; 20:23-27) Yehovha a lange ku languta swa swinene ka Aroni, ku nga lipfumelo la yena ni ku tisola ka yena. Hi mhaka leyo, hambi se ku khalute malembe ya manyingi, Aroni ni vatukulu va yena a va ha khumbukiwa tanihi vanhu lava chavaka Yehovha. — Pis. 115:10-12; 135:19, 20.
19 KU YA KA 25 KA ABRIL
XUMA XI NGA KA RITO LA XIKWEMBU | TINHLAYO 22-24
“A Xi Kona Lexi Xi Nga Sivelaka Minkateko Ya Yehovha”
Chumayela Hi Rixaladza paj. 53 par. 5
Chumayela “Mahungu Ya Ku Tsakisa Hi Yesu”
Ku fana ni nkama wa vapostolo, namuntlha ku xanisiwa ka vanhu va Xikwembu a ku wu nyimisanga ntirho wa ku chumayela. Ku sindzisiwa ka Vakreste leswaku va ya ka tindhawu ta ku hambanahambana, ku nga ha va madjele kumbe ka matiko man’wana, swi yentxa swaku mahungu ya ku tsakisa ma fika ka tindhawu toleto. Hi xikombiso, hi nkama wa Nyimpi ya Wumbirhi ya Misava, Timboni ta Yehovha ti swi kotile ku chumayela loko ti li ka tindhawu ta ku xanisiwa hi Manazi a Alemanha. Muyuda lweyi a nga kumana ni Timboni ka yin’wana ya tindhawu toleto, a li: “Ku tiyisela ka Timboni ta Yehovha ku ni kholwisile swaku lipfumelo la tona li huma ka Bibele. Hi mhaka leyo na mina ni ve Mboni.”
Perspicaz vol. 2 paj. 717
Ku Hlanya
Wuphunta La Ku Lava Ku Lwisana Na Yehovha. Muprofeta Balama a a swi lava hintamu ku profeta swilo swa ku biha hi Vayisrayele, leswaku va ta mu nyika male hi Balaka hosi ya Vamowabu. Kambe Yehovha a nga swi pfumelelanga leswaku leswo swi yentxeka. Mupostolo Pedru a vule swaku Balama “a twe mbongolo na yi vulavula, yi mu pfalela ku yentxa swa ku biha.” Loko Pedru a vulavula hi wuphunta la Balama a tirhise rito la xigriki leli nge pa·ra·fro·ní·a, leli vulaka munhu wa ku hlanya. — 2Pe 2:15, 16; Tin 22:26-31.
Lavetela Xuma Ka Rito La Xikwembu
Murindzi 01/08/04 paj. 27 par. 2
Tipontunkulu Ta Buku La Tinhlayo
22:20-22 — Hi mhaka muni Yehovha a kwatele Balama? Yehovha a a mu byelile muprofeta Balama leswaku a a nga fanelanga a profeta swa ku biha hi Vayisrayele. (Tinhlayo 22:12) Kambe Balama a fambe ni vavanuna va Balaka hi xikongomelo xa ku profeta minchumu ya ku biha hi Vayisrayele. Balama a a lava ku tsakisa hosi ya Mowabu leswaku yi ta mu nyika male. (2 Pedru 2:15, 16; Yuda 11) Hambileswi Balama a nga katekisa Vayisrayele na a nga swi lavi, a zame ku lava tindlela ta ku va a tsakeliwa hi hosi ya Mowabu hi ku yi byela leswaku va tirhisa vavasati lava gandzelaka Bali leswaku va kanganyisa vavanuna va Israyele. (Tinhlayo 31:15, 16) Hi mhaka leyo, lexi nga yentxa swaku Yehovha a kwatela Balama, hi leswi a a rhandza swilo.
26 KA ABRIL KU YA KA 2 KA MAIO
XUMA XI NGA KA RITO LA XIKWEMBU | TINHLAYO 25-26
“Munhu Mun’we A Nga Yentxa Xa Nʼwanchumu”
Rhandza Xikwembu paj. 118 mapar. 1-2
“Baleka Wuntunga La Swa Masangu!”
MUPHASI wa tihlampfi a ya ka ndhawu leyi a tivaka leswaku a ta kuma muxaka wa tihlampfi leti a tilavaka. A tlhoma xinavetiso ka ndzovo ivi a xi hoxa matini. A rindzela ku vona leswi nga ta humelela. Kutani loko a vona leswaku a ndzovo yi phasile, hi ku hantlisa a koka hlampfi a yi humesa matini.
Hi ndlela leyi fanaka, vanhu na vona va nga phasiwa. Hi xikombiso, loko Vayisrayele va li kusuhi ni ku nghena ka Tiko Leli Tshembisiweke, va fike va gwimba matende ka Minkova ya Mowabu. Kutani Hosi ya Mowabu yi tshembise ku nyika Balama male ya yinyingi loko a ya rhukana Vayisrayele. Se Balama a kume ndlela ya ku yentxa Vayisrayele va tivitanela khombo hi voxe. A tirhise vavasati va Mowabu tani hi ntlhamu. A va rhumele ka matende ya Vayisrayele leswaku va ya hambukisa vavanuna va Israyele. — Tinhlayo 22:1-7; 31:15, 16; Nhlawutelo 2:14.
Rhandza Xikwembu paj. 119 par. 4
“Baleka Wuntunga La Swa Masangu!”
Hi mhaka muni Vayisrayele va ku tala va phasiwile hi ntlhamu wa Balama? Hikusa a va ni mhaka ni ku titsakisa ntsena kutani va khohlwa hinkwaswu leswi Yehovha a nga va yentxela swona. Vayisrayele a va ni swivangelo swa ku tala swaku va tshembeka ka Xikwembu. Yehovha a va chunsile ka wukarawa aGibita, a va hlayisile loko va li khwatini naswona a va khome hi mandla mambirhi anze va fika kusuhi ni Tiko Leli Tshembisiweke va hlayisekile. (Vaheberu 3:12) Kambe va hambukisiwile hi mhaka ya wuntunga la swa masangu. Mupostola Pawulo a te: “Naswona hi nga hanyeni hi ku yentxa nsila ya swa masangu”. — 1 Vakorinto 10:8.
Lavetela Xuma Ka Rito La Xikwembu
Perspicaz vol. 3 paj. 694 mapar. 8-9
Tiko
Swi tikomba ingi ku yaveliwa ka ndhawu ya ku tshama ka yona a ku ya hi swilo swimbirhi, ku nga ku hoxiwa ka tindjombo ni ku tiva swaku a lixaka la kona li kule ku fikela kwini. Swi nga yentxeka ku hoxiwa ka tindjombo leti a ku kombisa swaku lixaka lin’wana ni lin’wana li ta tshama kwini, ku nga va ka tlhelo la kusuhi ni mati kumbe ka tlhelo la kusuhi ni tinhava. Xiboho lexi a xi ta yentxiwa hi ku hoxa tindjombo a xi kongomisiwa hi Yehovha leswaku tinxaka ti nga nyenyani kumbe ti va ni wukwele. (Swiv 16:33) Hi ndlela leyi, Xikwembu a xi ta kongomisa minchumu swaku lixaka lin’wana ni lin’wana li tshama lomu a ku ta fambisana ni leswi nga profetiwa hi Yakobo loko a li kusuhi ni ku fa, xiprofeto lexi xi kumeka ka Genesa 49:1-33.
Loko se ku tiviwa swaku lixaka lin’wana ni lin’wana li ta tshama kwini a ku fanele ku pimiwa ndhawu leyi ringanaka lixaka la kona. “Mi fanele mi yavelana tiko hi ku hoxa tindjombo hi ku ya hi mindjangu ya n’wina. Ndjangu lowu nga ni vanhu va vanyingi wu ta va ni ndhawu ya yikulu, kambe lowu wu nga ni vanhu va vatsongo wu ta va ni ndhawu ya yitsongo. Lani tindjombo ta kona ti nga ta wela kona, hi lani va nga ta ya kona.” (Tin 33:54) Xiboho xa lani lixaka lin’wana ni lin’wana a li ta tshama kona a xi nga ta txintxa. Kambe a swi ta koteka ku xi txintxa hi ku ya hi swaku ndzhaka ya kona a yi li yikulu ku fikela kwini. Hi mhaka leyo loko ku voniwe leswaku lixaka la Yuda a li ni ndhawu ya yikulu, yi pumbiwili yi nyikiwa lixaka la Simiyoni. — Yx 19:9.