“Khumbukani Lava Rhangelaka Xikarhi Ka N’wina”

MARITO lawa ya mupostolo Pawulo ma tsaliwe ka Vaheberu 13:7, naswona ma nga ha tlhela ma hundzuluxeliwa hi ndlela leyi: “Khumbukani lava va mi fumaka.” Ku sukela hi Pentekoxta wa lembe la 33 E.C. vapostolo va ku tshembeka va Hosi Yesu Kreste va hetisise ntirho lowu wa ku rhangela hi ku va ntlawa lowu rhangelaka, lowu a wu kongomisa bandla la nyuwani leli a la ha li ku sunguliwa. (Min. 6:2-4) Kolomu ka lembe la 49 E.C., a ntlawa lowu rhangelaka se a wu ya wu kula naswona a wu patsa vanhu van’wani lava a va nga li vapostolo va Yesu. Nkama lowu ku nga yendliwa xiboho lexi fambisanaka ni ku tsema nsuvu kumbe circuncisão, ntlawa lowu rhangelaka a wu patsa “vapostolo ni madoda ya Yerusalema.” (Min. 15:1, 2) A ntirho wa vona a ku li ku bulisana hi timhaka leti a ti khumba Vakreste hinkwavu. A va posa makarta ni swiboho leswi va nga swi yendla swaku swi tiyisa mabandla swi tlhela swi pfuna vadjondzisiwa swaku va va ni mapimiselo man’we ni kuva va yendla swilo hi ku twanana. A mabandla a ma yingisa ma tlhela ma tiveka hansi ka nkongomiso lowu a wu ta hi ka ntlawa lowu rhangelaka, funtshi leswo swi yendle leswaku Yehovha a ma katekisa ma tlhela ma ya ma yengeteleka. — Min. 8:1, 14, 15; 15:22-31; 16:4, 5; Heb. 13:17.

² Nkama vapostolo va nga fa, a vanhu va vanyingi va sungule ku djikela Xikwembu. (2 Tes. 2:3-12) Hilani Yesu a nga vula hi kona ka xikombiso xa yena xa trigu ni mfava, ku byaliwe mfava (ku nga Vakreste va mavunhwa) ndzeni ka trigu (ku nga Vakreste lava nga totiwa). Ka malembe hinkwawu lawa, ku pfumeleliwe swaku mintlawa leyimbirhi yi kula xikan’we anze nkama wa ku tshovela wu fika, ku nga “nkama wa wugamu.” (Mat. 13:24-30, 36-43) Nkama hinkwawu lowu, na swa ha kula xikan’we a ku ni Vakreste van’wani va ku totiwa lani misaveni. Kambe a ku nga na ntlawa lowu rhangelaka lowu Yesu a a wu tirhisa swaku a nyikela minkongomiso ka valandzeli va yena. (Mat. 28:20) Hambileswo, Yesu se a a swi vulile swaku hi nkama wa ntshovelo a ku ta va ni ku txintxa.

³ Nkama Yesu a nga vula xifaniso mayelana ni “xikombiso” xa “ku fika ka nkama wa wugamu”, a rhange hi ku vutisa leswi: “Kasi i mani mutirhi wa ku tshembeka ni wa ku tlhariha?” (Mat. 24:3, 42-47) Yesu a kombise leswaku mutirhi wa ku tshembeka a a ta tirha hi matimba leswaku a phamela vanhu va Xikwembu “hi nkama wa kona.” Ku fana ni leswi Yesu a nga tirhisa ntlawa wa vavanuna, ku nga li munhu mun’we, leswaku a kongomisa bandla la Wukreste aminkameni ya vapostolo, mutirhi wa ku tshembeka lweyi Yesu a a ta mu tirhisa ka masiku ya wugamu na yena a a ta vumbiwa hi ntlawa wa vavanuna, ku nga li munhu mun’we ntsena.

I MANI “MUTIRHI WA KU TSHEMBEKA NI WA KU TLHARIHA”

⁴ I Mani lweyi Yesu a nga mu veka leswaku a phamela valandzeli va yena? A ku na van’wani loko ku nga li Vakreste lava totiweke lani misaveni. Bibele li kombisa swaku vona i “vaprista va le wuhosini” lava nga vekiwa leswaku va ‘chumayela mintirho ya ku hlamalisa ya Lweyi a nga va vitana va huma ka munyama va nghena ka ku vonakala ka yena ka ku hlamalisa.’ (1 Pe. 2:9; Mal. 2:7; Nhl. 12:17) Indjhe i hinkwavu lava nga totiwa lava vumbaka mutirhi wa ku tshembeka ni wa ku tlhariha? Ihim. Loko Yesu a phamele vanhu va ku tala hi ndlela ya singita, ku nga kolomuyani ka 5.000 wa vavanuna na ku nga kontiwi vavasati ni vana, a phakele swakudla vadjondzisiwa va yena, se vadjondzisiwa va phamela xitshungu. (Mat. 14:19) Yesu a phamele va ku tala hi ku tirhisa vanhu vavatsongo. Ninamuntlha Yesu a va phamela hi ndlela leyi fanaka vanhu va Yehovha.

⁵ Hi mhaka leyo, a “mutirhi wa ku tshembeka ni wa ku tlhariha” a vumbiwa hi ntlawa wawutsongo wa Vakreste lava nga totiwa, lava va lunghiselelaka va tlhela va nyikela mabuku, mavhidiyo ni swin’wani hi nkama wa ku vuya ka Kreste. (Luk. 12:42) Ka masiku lawa ya wugamu, a “mutirhi wa ku tshembeka ni wa ku tlhariha” a vumbiwa hi Ntlawa Lowu Rhangelaka wa Timboni ta Yehovha. Vamakwerhu lava, lava nga totiwa va tirha xikan’we a sede mundial ya Timboni ta Yehovha.

⁶ Kreste a tirhisa ntlawa lowu leswaku a hi komba ndlela leyi wuprofeta la Bibele li hetisekaka hi yona ni swaku hi nga ma tirhisisa ku yini matshinya ya minawu ya Bibele siku ni siku. Hinkwaswu leswi hi phameliwaka swona hi swi kuma mabandleni ya Timboni ta Yehovha. (Esa. 43:10; Gal. 6:16) Ka minkama ya khale na ku tsaliwa Bibele, mutirhi lweyi a a tshembiwa hi patrão wa yena, a a tlhela a rhangela swilo hinkwaswu swa yindlo. Hi ndlela leyi fanaka, mutirhi wa ku tshembeka a yamukele ntirho wa ku rhangela ndjangu wa Yehovha. Hi mhaka leyo, mutirhi wa ku tshembeka ni wa ku tlhariha a tlhela a vonelela swilo swa nhlengeletanu, ntirho wa ku chumayela, masembleya, makongresu ni ku veka madoda swaku ma vonelela mintirho ya ku hambanahambana ka nhlengeletanu. Ntlawa lowu wu tlhela wu yendla mabuku, hinkwaswu leswi leswaku swi ta pfuna “vatirhi.” — Mat. 24:45.

⁷ I vamani “vatirhi”? Hi marito ya ku kongoma, i vanhu hinkwavu lava phameliwaka. A ku sunguleni ka masiku ya wugamu, vatirhi a ku li Vakreste lava nga totiwa ntsena, kambe hi ku famba ka nkama vatirhi a va tlhela va patsa ni xitshungu xaxikulu xa “tinyempfu tin’wani.” (Yoh. 10:16) Mintlawa leyimbirhi yi pfuneka swinene hi swilo hinkwaswu leswi mutirhi wa ku tshembeka a hi phamelaka swona.

⁸ Hi nkama wa nhlomulu wawukulu, loko Yesu a ta ta, a ta yavanyisa misava leyi ya ku biha a ta nyika mutirhi wa ku tshembeka ni wa ku tlhariha ntirho wa ku hlayisa “swilo swa yena hinkwaswu.” (Mat. 24:46, 47) Mutirhi wa ku tshembeka ni wa ku tlhariha a ta kuma hakelo ya yena atilweni. Mutirhi lweyi ni lavan’wani hinkwavu va 144.000 va ta fuma na Yesu amatilweni. Lani misaveni a ku nga ha ta va ni mutirhi wa ku tshembeka ni wa ku tlhariha, kambe Yehovha na Yesu ku ta va vona lava va nga ta nyikela nkongomiso amisaveni hansi ka Mfumu wa Kreste hi ku tirhisa “varhangeli.” — Ps. 45:16.

HI MHAKA MUNI HI FANELE HI ‘KHUMBUKA LAVA RHANGELAKA’?

⁹ Hi ni swivangelo swa swinyingi swaku hi ‘khumbuka lava rhangelaka’ hi tlhela hi va tshemba. Hi mhaka muni swi li swinene ku yendla leswo? Mupostolo Pawulo a vule leswi: “Va mi hlayisa hileswi va nga ta tihlamulela, leswaku va nga yendli leswo na va karhatekile kambe na va tsakile, hikusa leswo swi nga mi vavisa.” (Heb. 13:17) Hi mhaka leyo, hi fanele hi tiveka hansi hi tlhela hi yingisa minkongomiso leyi hi nyikiwaka yona hi lava rhangelaka hikusa va hi hlayisa hileswi va hi rhandzaka, va tlhela va hi vhikela ka swilo leswi nga wonhaka wunghanu la hina na Yehovha.

¹⁰ Pawulo a vule leswi ka 1 Vakorinto 16:14: “Yendlani hinkwaswu hi lirhandzu.” Swiboho leswi yendliwaka leswaku swi pfuna vanhu va Xikwembu, swi yendliwa hi lirhandzu. Ka 1 Vakorinto 13:4-8 loko Pawulo a vulavula hi lirhandzu a te: “Lirhandzu li lehisa mbilu naswona li ni wumbilu. Lirhandzu a li na wukwele. A li tibyeli, a li tikulisi, a li yendli swa ku danisa, a li tilaveli leswi pfunaka lona ntsena, a li na ximbilwambilwani. A li veketeli swa ku biha. A li tsakisiwi hi swa ku kala swi nga lulamanga kambe li tsakisiwa hi ntiyiso. A li godoli hambi ko yendleka yini na yini, li kholwa swilo hinkwaswu, li tshemba swilo hinkwaswu, li tiyisela swilo hinkwaswu. Lirhandzu a li heli.” Tanihi leswi swiboho hinkwaswu swi yendliwaka hi ku kongomisiwa hi lirhandzu leswaku ku pfuneka malandza ya Yehovha, hi ni swivangelo leswi twalaka swa ku titwa na hi vhikelelekile hi nkongomiso lowu. Handle ka leswo, nkongomiso lowu wa lirhandzu i xikombiso xa lirhandzu leli Yehovha a nga na lona.

¹¹ Ku fana ni ka nkama wa vapostolo, vanhu lava Yehovha a va tirhisaka swoswi swaku va rhangela a va hetisekanga. Phela ni khale, vanhu lava Yehovha a nga va tirhisa swaku va hetisisa ku rhandza ka yena, a va nga hetisekanga. Hi xikombiso, Nowa a yake ngalava a tlhela a chumayela leswaku vanhu va ku biha va nkama wa yena a va ta helisiwa. (Gen. 6:13, 14, 22; 2 Pe. 2:5) Moxe a tirhisiwe hi Yehovha swaku a chunsa Vayisrayele lava a va li wukaraweni aGibita. (Eks. 3:10) Vanhu va ku kala va nga hetisekanga va tirhisiwile swaku va tsala Bibele. (2 Tm. 3:16; 2 Pe. 1:21) Ku va Yehovha a tirhisa vanhu va ku kala va nga hetisekanga namuntlha swaku a hetisisa ntirho wa ku chumayela ni wa ku djondzisa, a swi vuli swona swaku nhlengeletanu ya yena a hi nge yi tshembi, kambe swa hi tiyisa hikusa ha swi tiva swaku loko nhlengeletanu leyi a yi nga pfuniwi hi Yehovha, a yi nga ta swi kota ku yendla swilo hinkwaswu leswi yi swi yendlaka namuntlha. Leswi mutirhi wa ku tshembeka ni wa ku tlhariha a nga kota ku hlula swikarhatu swa swinyingi, swi kombisa swaku moya wa ku kwetsima wa Yehovha hi wona lowu kongomisaka swilo. Yehovha a karhi a katekisa nhlengeletanu ya yena ya lani misaveni namuntlha. Hi mhaka leyo, hi ta tama hi yi seketela hi tlhela hi yi tshemba hi mbilu hinkwayu.

HI NGA SWI KOMBISISA KU YINI LESWAKU HA VA TSHEMBA LAVA RHANGELAKA?

¹² Vamakwerhu lava nga nyikiwa ntirho wa ku rhangela ndzeni ka bandla va kombisa leswaku va mu tshemba Yehovha hi ku yamukela hinkwaswu leswi yelanaka ni ntirho wa vona va tlhela va swi hetisisa hi ku tshembeka. (Min. 20:28) Leswi hi nga vachumayeli va mahungu ya ku tsakisa ya Mfumu, hi chumayela hi ku hiseka hi munti ni munti, hi hamba marevhizita ni ku djondza ni vanhu Bibele. (Mat. 24:14; 28:19, 20) Leswaku hi pfuneka hi swilo hinkwaswu leswi hi phameliwaka swona hi mutirhi wa ku tshembeka, hi fanele hi lulamisela mintlhanganu hi tlhela hi va kona ka yona ku patsa ni masembleya ni makongresu. Phela hi pfuneka swinene hi tlhela hi tiyisiwa loko hi tlhangana ni vamakwerhu va hina amintlhanganwini. — Heb. 10:24, 25.

¹³ Hi kombisa swaku ha yi tshemba nhlengeletanu loko hi nyikela minyikelo. (Swiv. 3:9, 10) Loko vamakwerhu va hina va kumana ni swikarhatu, ha va pfuna na hi nga zanga hi hlwela. (Gal. 6:10; 1 Tm. 6:18) Hi yendla leswo hileswi hi va rhandzaka vamakwerhu. Minkama hinkwayu hi tirhisa nkama lowu hi pfulekelaka swaku hi komba Yehovha ni nhlengeletanu ya yena swaku ha swi khensa hinkwaswu leswi va hi yendlelaka swona. — Yoh. 13:35.

¹⁴ Hi tlhela hi kombisa swaku ha yi tshemba nhlengeletanu hi ku seketela swiboho leswi yi swi yendlaka. Leswo swi patsa ku tiveka hansi ni ku yingisa minkongomiso leyi taka hi ka lava “va rhangelaka,” lava hi faneleke hi va yingisa ni ku tiveka hansi ka vona, va ku fana ni vadjikelezi ni madoda ya bandla. (Heb. 13:7, 17) Hambiloko hi nga swi twisisi swiboho leswi va swi yendlaka, ha swi tiva swaku ku swi seketela minkama hinkwayu swi pfuna hina. Naswona loko hi yingisa Rito la yena ni nhlengeletanu ya yena, Yehovha a ta hi katekisa naswona hi kombisa leswaku ha tiveka hansi ka Hosi ya hina Yesu Kreste.

¹⁵ Impela, hi ni swivangelo leswi twalaka swa ku hi tshemba mutirhi wa ku tshembeka ni wa ku tlhariha. Sathana, Xikwembu xa misava leyi a yendla hinkwaswu leswi a nga swi kotaka swaku a chimisa vito la Yehovha ni nhlengeletanu ya yena. (2 Ko. 4:4) U nga kanganyisiwi hi mintlhamu leyi ya ku biha ya Sathana! (2 Ko. 2:11) Davulosi wa swi tiva swaku “ku yo sala nkama wawutsongo” swaku a txukumetiwa ka xikhele xa ku yenta. Hi mhaka leyo, a tinyimisele ku kanganyisa vanhu va vanyingi. (Nhl. 12:12) Leswi Sathana a yendlaka hinkwaswu swaku a hi hambukisa, a hi tameni hi tshinela kusuhi na Yehovha. A hi tshembeni Yehovha ni ndlela leyi a yi tirhisaka leswaku a kongomisa vanhu va yena namuntlha. Ku yendla leswo, swi ta yendla leswaku hi twanana.