“Fambani . . . Mivayendla Vajondzisiwa”

1-2. a) Hi kuya hi xilerhiso xa Yesu xinga ka Matewu 28:18-20, hi xihi xikongomelo xikulu xa Bandla la Wukreste? b) Hi swihi swivutiso leswi hingata bula hi swona ka nhlokomhaka keyi?

NDZHAKU ka loko Yesu a pfuxiwile a kombele vapostola vakwe leswaku va kumana na yena. Switikomba ingi ava tsake hintamu swinene loko va hlengeletanile antshaveni. (Mat. 28:16) Swinga yendlela kuve laha a humeleleke “hi nkama wun’we ka vamakwavu lavatlulaka ntlhanu wa madzana (500)”. (1 Kor. 15:6) Ingava leswaku Yesu a ava vitanela yini? A ava vitanela kuva rhuma. A te: “Hi kolaho, fambani ka tinxaka hinkwatu, mivayendla vajondzisiwa va mina”. — Lerha Matewu 28:18-20.

² Vadjondzisiwa lava tweke marito ya Yesu hi kufamba ka nkama vave xiyenge xa bandla la Wukreste a nkameni wa vapostola. Xikongomelo xikulu xa bandla lolelo akuli kupfuna vanhu van’wana leswaku vava vadjondzisiwa va Yesu.b Namuntlha wa siku amisaveni hinkwayu kuni mabandla yotala ya Vakreste va ntiyiso naswona xikongomelo xikulu xa wona axi cincanga. Ka nhloko mhaka leyi hita bula hi 4 wa swivutiso leswinge: Hayini kuyendla vadjondzisiwa swili swa lisima? Hinga maha yini leswaku hi kota kuyendla vadjondzisiwa? Kungava leswaku Vakreste hinkwavu vanga pfunisa ka ntirho wa kuyendla vadjondzisiwa? Hayini swilava kulehisa mbilu loko hi yendla vadjondzisiwa?

HAYINI KUYENDLA VADJONDZISIWA SWILI SWA LISIMA?

3. Hikuya hi Yohane 14:6 na 17:3, hayini ntirho wa kuyendla vadjondzisiwa wuli wa lisima hintamu?

³ Hayini kuyendla vadjondzisiwa swili swa lisima? I swa lisima hi mhaka i vadjondzisiwa va Kreste ntsena lava vanga kotaka kuva vanghanu va Xikwembu. Xin’wana hi leswaku lava va landzelaka Kreste va hanya wutomi laku yampswa swoswi naswona ka nkama lowu taka vata kuma wutomi lelinga heliki. (Lerha Yohane 14:6; 17:3.) Hakunene, i likulu hintamu wutihlamuleli leli Yesu ahi nyikeke lona, kambe a ntirho lowu a hi wu mahi hi ntamu wa hina ntsena. Mupostola Pawulo loko a vulavula hi yena ni lava a atirhisana na vona a te: “Hikuva hina hi vatirhikulobze ni Xikwembu”. (1 Kor. 3:9) I lunghelo lali kulu swinene leli Yehovha na Yesu Kreste vahi nyikeke lona hambi leswi hikalaka hinga hetisekanga.

4. Hinga djondza yini ka xikombiso xa Ivan na Matilde?

⁴ Ntirho wa kuyendla vadjondzisiwa wa tsakisa hintamu. Vona xikombiso xa Ivan ni nsati wa yena Matilde lava tshamaka atikweni la Colómbia. Siku lin’wana va chumayele jaha leli vange hi Davier. Jaha leli liva byele leswi: “Naswi navela kucinca wutomi la mina, kambe aningeswi koti.” Davier a ali mubi wa swibakela, a adzaha mbangi, a akukutlela byala funtshi a atshama ni namorada wa yena Erica. Ivan a hlamusela leswi: “Hi sungule kudjondza na yena Bibele. Kaya kakwe aku li kule hintamu lakakuva a hi famba mawora yotala hi mabasikeni, naswona ndlela ya kona ayini madaka. Loko Erica a vona leswaku Davier a sungule kucinca mahanyelo ya yena na yena a sungule kudjondza a Bibele na hina.” Hi kufamba ka nkama Davier a tshiki kudzaha mbangi, kuphuza ni kulwa ka ntlangu wa swibakela. Naswona, yena na Erica va chadile. Matilde a vule leswi: “Loko Davier na Erica va tsakamisiwa hi 2016, hi khumbuke marito ya Davier loko a te: ‘Naswi navela kucinca wutomi la mina, kambe aningeswi koti’. Ahingaha tikoti hi kutsaka, lakakuva hi xiririke ni minhloti. Hikakunene swa tsakisa swinene loko hi pfuna vanhu akuva vava vadjondzisiwa va Kreste.

KULAVEKA YINI LESWAKU HI YENDLA VADJONDZISIWA?

5. Hi xihi xilo xa kusungula lexi lavekaka leswaku hi yendla vadjondzisiwa?

⁵ Xa kusungula lexi lavekaka i kulavetela vanhu lava lavaka kudjondza hi Yehovha. (Mat. 10:11) Loko hi byela vanhu hinkwavu lava hi kumanaka na vona hi Yehovha, hi kombisa leswaku hi Timboni ta Yehovha. Loko hi yingisa leswi Yesu angahi rhuma swona, kunga kuchumayela, hi kombisa leswaku hi Vakreste va ntiyiso.

6. Hinga yendla yini leswaku vanhu vahi yingisa antirhweni wochumayela?

⁶ Van’wana lava hiva kumaka vaswi tsakela kudjondza ntiyiso wa Bibele, kambe van’wana va tikomba vanga na mhaka kusunguleni. Hi fanele hiva pfuna leswaku va navela kutiva swotala hi Yehovha. Leswaku swihi fambela kahle ka ntirho lowu swi lava hi tilunghiselela. Langa mhaka yokarhi leyingata tsakisa lava ungata bula na vona. U gama u pimisa hi ndlela ya kusungula bulu.

7. Unga sungulisa kuyini bulu ni vanhu antirhweni wochumayela naswona hayini swili swa lisima kuva yingisela ni kuva hlonipha?

⁷ Hi xikombiso, ungahamu vutisa leswi n’winyi wa munti: “Ni navela kutiva mavonelo ya wena ka mhaka leyi. U vona leswaku kungava kuni mfumu wa misava lowu wunga helisaka swikarhatu hinkwaswu leswi vanhu va kumanaka na swona namuntlha?” Ndzhaku ungaha bula na yena hi ndzimana ya Daniyele 2:44. Mayendlela man’wana lamanga tirhaka i kuva u vutisa n’winyi wa munti u ku: “Hinga yendla yini leswaku hi djondzisa vana va hina kuva ni xihlonipho?” Kutani bula hi Deteronoma 6:6, 7. Loko uli karhi u langa mhaka leyi ungata bula hi yona pimisa hi vanhu va kona ni ndlela leyi ungava pfunaka ha yona kutwisisa leswi Bibele liswi djondzisaka. Loko uli karhi u bula na vona va yingiseli loko va tiphofula u tlhela u hlonipha mavonelo ya vona. Loko u yendlisa xileswi, uta kota kuva twisisa kuyampsa, na vona vataswi yingisa leswi uva byelaka swona.

8. Hayini kulaveka hi lehisa mbilu loko hi yendla mayendzo yovuyela?

⁸ Loko ungase sungula kudjondza Bibele ni munhu wokarhi swingaha lava u tirhisa nkama ni ntamu wa wena leswaku umu yendzela hi kuphindhaphindha. Hi mhaka muni? Hi leswaku van’wana ahiva kumi makaya loko hiva tlhelela. Nakambe swingaha lava himu yendzela makhambi manyingi leswaku aza ahi tolovela akuva a pfumela kudjondza Bibele. Khumbuka leswaku xinsinyana xi hantla xi kula loko xi tshamela kukuma mati. Hilaha kufanaka, leswaku munhu lweyi a tsakelaka aya a rhandza Yehovha na Yesu, kulaveka hi bula na yena hi Rito la Xikwembu nkama ni nkama.

VAKRESTE HINKWAVU VANGA PFUNISA KA NTIRHO WA KUYENDLA VADJONDZISIWA

9-10. Hi mhaka muni hinga vulaka leswaku Vakreste hinkwavu va ntiyiso va katseka ka kulavetela lavangani timbilu letinene?

⁹ Vakreste hinkwavu va ntiyiso va katseka ka kulavetela lavanga ni timbilu letinene. Ntirho lowu hingawu fananisa ni kulavetela n’wana lweyi a lahlekeke. Hi ndlela muni? Vona leswi humeleleke n’wana wa 3 wa malembe lweyi anga lahleka ive a famba a yingayinga. Kolomuya ka 500 wa vanhu va fambe vamu lavetela. Hi wugamu, na se kulava kuhundza siku vali karhi vamu lavetela a kumiwile hi wanuna mun’we amasin’wini. Wanuna lweyi, hambi leswi a ali mun’we ka lava avali kulaveteleni anga pfumelanga ku ndhundhuzeliwa hileswi amu kumeke n’wana lweyi. Yena a te: “N’wana lweyi a kumeke hileswi vanhu vanyingi va katsekeke ka kumu lavetela.”

¹⁰ Vanhu vanyingi namuntlha va le ka xiyimu xa kufana ni xa n’wana lweyo. Ava na ntshembo, hi mhaka leyo, va lava kupfuniwa. (Efe. 2:12) Vanhu lava tlulaka 8 wa timiliyoni va tirhisana hi vun’we leswaku va kuma vanhu votanu. Swinga yendleka unga kumi munhu lweyi a tsakelaka kudjondza Bibele na wena. Hambileswo, vachumayeli van’wana lava hi tirhaka na vona ansin’wini vangaha kuma munhu lweyi aswi lavaka kudjondza ntiyiso lowu kumekaka ka Rito la Xikwembu. Loko makwerhu wokarhi a kuma munhu lweyi a pfumelaka kuva mudjondzisiwa wa Kreste, hinkwerhu ha tsaka hileswi hi katsekeke a kulaveteleni.

11. Hambiloko unga na munhu lweyi u djondzaka na yena Bibele, ungaswi kotisa kuyini kupfunisa ka ntirho wa kuyendla vadjondzisiwa?

¹¹ Hambiloko unga na munhu lweyi u djondzaka na yena Bibele swoswi, ungaswi kota kupfunisa ka ntirho wa kuyendla vadjondzisiwa hi tindlela tin’wana. Hi xikombiso, loko u vona munhu wa nyiwana a Salão do Reino ungahamu hoyozela u tlhela umu komba xinghanu. Loko umu komba lirhandzu hi ndlela leyi, utava umu pfuna kuvona leswaku hikakunene hi Vakreste va ntiyiso. (Yoh. 13:34, 35) Tinhlamulu ta wena aminhlanganwini, hambiloko ti gomile, tingaha djondzisa lavaha sungulaka kuta leswi vanga hlamulisaka xiswona leswaku va kombisa kupfumela ka vona. Xin’wana ungaxi yendlaka i kuhuma nsimu ni munhu lweyi ango sungula kuchumayela, ivi umu pfuna kutirhisa Matsalwa leswaku a djondzisa vanhu. Loko u yendla leswo, utava umu djondzisa kutekelela Yesu Kreste. — Luk. 10:25-28.

12. Hlamusela leswaku hayini swinga bohi hiva ni wuswikoti lohlawuleka akuva hi pfuna vanhu leswaku vava vadjondzisiwa va Yesu.

¹² Hinga pimiseni leswaku kulaveka hiva ni wuswikoti lohlawuleka akuva hi pfuna vanhu leswaku vava vadjondzisiwa va Yesu. Hi mhaka muni? Vona xikombiso xa Faustina lweyi a tshamaka aBolívia. Aanga tivi kulerha loko a sungula kuhlangamela ni Timboni ta Yehovha. Swoswi se waswi kota nyana. A tsakamisiwile naswona waswi rhandza kudjondzisa van’wana. Hi ntolovelo a djondza Bibele ni 5 wa vanhu hi vhiki. Hambileswi van’wana lava a djondzaka na vona a Bibele vamu tlulaka hi kulerha, se a pfune 6 wa vona leswaku va tsakamisiwa. — Luk. 10:21.

13. Hambiloko hi khomekile swinene, hi yihi minkateko leyi hingayi kumaka loko hi yendla vadjondzisiwa?

¹³ Vakreste vanyingi va khomekile hileswi vanga ni swilo swotala swa lisima leswaku vaswi yendla. Hambileswo, va tinyika nkama wa ku fambisa tidjondzo ta Bibele naswona va tsaka hintamu hi kuyendla leswo. Vona xikombiso xa makwerhu waxisati lweyi a vitaniwaka Melanie a tshamaka Alaska. Makwerhu lweyi a awundla xintombhana xa yena xa 8 wa malembe na a li yexe. A boheka kutirha hintamu naswona a hlayisa papayi wa yena lweyi a avabya hi kankru. Ka xidoropana lexi a atshama ka xona akova yena yexe lweyi a ali Mboni ya Yehovha. A akhongela nkama ni nkama a kombela Yehovha leswaku amu nyika ntamu wa kuya kuchumayeleni hambileswi aku ni xirhami. Lexi aaxi lava hintamu akuli ku kuma munhu lweyi aata djondza na yena Bibele. Siku lin’wana a kume Sara lweyi anga tsaka swinene loko a djondza leswaku Xikwembu xi ni vito. Hi kufamba ka nkama Sara a kombele kudjondza Bibele. Melanie a vule leswi: “Hi ma sexta fera nimadlambu ani vuya na ni karhalile, kambe mina ni xintombhana xa mina ahi vuyeliwa swinene loko hiya fambisa xidjondzo lexo xa Bibele. Ahi tsakisiwa hi kulavetela tinhlamulu ta swivutiso swa Sara naswona ahi tsaka loko hi vona wunghanu la Sara na Yehovha li kula.” Sara a kombise xivindzi loko a kanetiwa naswona a tshike kuya kerekeni lomu a akhongela kona ivi a tsakamisiwa.

HAYINI SWILAVA KULEHISA MBILU LOKO HI YENDLA VADJONDZISIWA?

14. a) Hi mhaka muni ntirho wa kuyendla vadjondzisiwa wu fana ni wa kuphasa tinhlampfi? b) Marito ya Pawulo lama kumekaka ka 2 Timotiya 4:1, 2, maku khumbisa kuyini?

¹⁴ Hambi loko ungase kuma munhu lweyi a lavaka kuva mudjondzisiwa wa Yesu, unga godoli, tama u lavetela. Khumbuka leswaku Yesu a fananise ntirho wa kuyendla vadjondzisiwa ni ntirho wa kuphasa tinhlampfi. Vaphasi va tinhlampfi vangaha heta nkama wa wunyingi na vanga kumanga nhlampfi ni yin’we. Minkama ya kutala va tirha ni wusiku kumbe na kahali mpundzu swinene naswona minkama yin’wana va boheka kufamba mpfhuka wa kuleha hi maboti. (Luk. 5:5) Hi kufanana, hi kulehisa mbilu, vachumayeli van’wana va heta nkama wotala na va zama “kuphasa” vanhu hi minkama ni le ka tindhawu to hambanahambana. Hi mhaka muni va yendla leswo? Va yendla leswo leswaku va kuma vanhu va vanyingi. A vuyelo la kona hi leswaku va katekisiwa hikusa va kuma vanhu lava tsakelaka rungula la hina. Unga ringeta kuchumayela hi nkama lowu vanhu va kumekaka ha wona ni ka tindhawu leti va tolovelaka kukumeka ka tona? — Lerha 2 Timotiya 4:1, 2.

15. Hi mhaka muni kufambisa tidjondzo ta Bibele swi lava kulehisa mbilu?

¹⁵ Hi mhaka muni kufambisa tidjondzo ta Bibele swi lava kulehisa mbilu? Xivangelo hi leswaku hi lava kupfuna lweyi hi djondzaka na yena kudjondza ni kurhandza leswi Bibele liswi djondzisaka. Xin’wana hi leswaku hi lava kumu pfuna leswaku a tiva ni kurhandza Yehovha mumahi wa Bibele. A hi lavi kumudjondzisa ntsena leswi Yesu a byeleke vadjondzisisiwa leswaku vaswi maha kambe hi lava kumu pfuna kuvona leswaku angaswi tirhisisa kuyini awuton’wini la yena. Hi fanele hi lehisa mbilu loko himu pfuna kutirhisa matshinya ya minawu ya Bibele hi kutsongokutsongo. Van’wana ka lava djondzaka Bibele va hantla va cinca mapimiselo ni mahanyelo ya vona ndzeni ka tihweti nyana. Kasi kuni van’wana lava hlwelaka nyana.

16. U djondza yini ka leswinga humelela Raúl?

¹⁶ Misionariyu mun’wana wa le tikweni la Perú ave ni vuyelo lelinene hi mhaka kulehisa mbilu. Yena a te: “Ni fambisele djondzo wanuna wokarhi lweyi a vitaniwaka Raúl. Hi hete mabuku mambirhi, kambe a ahani swikarhatu swa swikulu awuton’wini la yena. A atshamela kuholova ni nsati wa yena naswona Raúl a ani nhlambha. Vana va yena avangahamu hloniphi hi mhaka mahanyelo ya yena. Kambe leswi a ata minhlanganwini nkama ni nkama ani tshikanga kumu yendzela leswaku nimu pfuna yena ni ndjangu wa yena. Swi teke 3 wa malembe leswaku a tsakamisiwa.”

17. Hita bula hi yini ka nhlokomhaka leyi landzelaka?

¹⁷ Yesu ahi rhume a ku: “Fambani ka tinxaka hinkwatu, mivayendla vajondzisiwa va mina”. Hi mhaka leyo, hi vulavula ni vanhu lava kholwaka ka swilo leswi hambaneke ni leswi hi kholwaka ka swona. Van’wana va khongela kasi van’wana ava kholwi leswaku Xikwembu xi kona. Ka nhlokomhaka leyi landzelaka hita vona leswaku hingava chumayelisa kuyini vanhu volavo.