2. Hi yini minkateko leyi Yehovha a yi nyikaka vanhu va yena lava va nga tsakamisiwa?

Loko u tsakamisiwa, u sungula ku lumba ndjangu wa Yehovha lowu tshamaka na wu tsakile. Naswona u ta sungula ku vona lirhandzu la Yehovha ka wutomi la wena hi tindlela ta tinyingi, nakambe wunghanu la wena na Yehovha li ta ya li kula hintamu. (Lerha Malakiya 3:16-18.) Yehovha a ta va Papayi wa wena, u ta tlhela u va ni vamakwerhu va xinuna ni va xisati amisaveni hinkwayu lava rhandzaka Yehovha va tlhela va ku rhandza. (Lerha Marku 10:29, 30.) I ntiyiso swaku na u nge se tsakamisiwa ku ni leswi u faneleke u swi yentxa. U fanele u djondza hi Yehovha, u mu rhandza u tlhela u va ni lipfumelo ka N’wana wa yena. Se hi kona u nga nyiketelaka wutomi la wena ka Yehovha. Loko se u yentxe leswo, kutani u tsakamisiwa, u ta va ni ntshembo wa ku hanya wutomi la ku tsakisa la ku kala li nga heli. Rito la Xikwembu li li: “Ntsakamiso . . . wa mi ponisa.” — 1 Pedru 3:21.

Yesu a a swi tiva swaku a hi minkama hinkwayu maxaka ya hina ma nga ta swi tsakela swaku hi tirhela Yehovha. Lerhani Matewu 10:34-36, mi gama mi bula hi xivutiso lexi landzelaka:

• I mpsini leswi maxaka ma nga swi mahaka loko munhu a sungula ku tirhela Yehovha?

VHIDIYO: Yehovha A Hi Yamukelile (5:13)

• A wu ta maha yini loko xaka, kumbe munghanu wa wena a zama ku ku tshikisa ku tirhela Yehovha?

Lerhani Tipisalema 27:10 na Marku 10:29, 30. Loko mi gama ku lerha ndzimana ha yin’we, bulani hi xivutiso lexi landzelaka:

• Leswi tindzimana leti ti swi tshembisaka swi nga ku pfunisa ku yini loko maxaka kumbe vanghanu va wena va zama ku ku tshikisa ku tirhela Yehovha?