Twela Van’wana Wusiwana

Leswi Yentxaka Swi Karhata

Loko hi tshamela ku pimisa hi ku hambana loku ku nga kona ka hina ni vanhu van’wana, hi ta gama hi va ni xikheto. Leswo swi nga yentxa swaku hi va tekela hansi vanhu lava va kalaka va nga fani na hina. Loko hi sungula ku titwisa xileswo a hi nga ta va twela wusiwana vanhu van’wana, hikusa ku pfumala ntwelawusiwana swi yentxa vanhu va va ni xikheto.

Leswi Bibele Li Swi Vulaka

“Tsakani ni lavatsakaka, mirila ni lavarilaka.” — VARHOMA 12:15.

Swi vula yini leswi? Nawu lowu wa Bibele wu vula swaku hi fanele hi va ni ntwelawusiwana. Ntwelawusiwana i ku kota ku tiveka ka xiyimu xa munhu mun’wana. U titwisa xileswi a titwisaka xiswona.

Ntwelawusiwana Wu Nga Hi Pfunisa Ku Yini?

Loko hi mu twela wusiwana munhu mun’wana, hi ta vona swaku ka hina na yena ku ni leswi hi fanaka hi swona. Hi ta vona swaku munhu yelweyo a nga ha titwisa xileswi na hina hi titwisaka xiswona ni ku yentxa swilo hi ndlela leyi na hina hi yentxaka hi yona. Ntwelawusiwana wu nga hi pfuna ku vona swaku hinkwerhu hi maxaka hambiloko hi nga tshami ka tindhawu ta ku fana. Loko hi tshamela ku pimisa hi leswi hi fanaka hi swona ni vanhu van’wana swi ta hi pfuna swaku hi nga va tekeli hansi.

Ntwelawusiwana wu ta hi pfuna swaku hi hlonipha vanhu van’wana. Anne-Marie wa Senegal, a a nga swi hloniphi swisiwana leswi a swi tekeliwa hansi a tikweni la yena. Kambe a tlhamusela leswi ntwelawusiwana wu nga mu pfunisa xiswona loko a ku: “Nkama ni nga vona leswi a va hluphekisa xiswona vanhu lava, ni tivutisile swaku mina a ni ta titwisa ku yini loko a ni li ka xiyimu xa vona. Leswo swi ni pfunile ku vona swaku a ni va tluli hi nchumu vanhu lava hikusa hambi leswi ni nga na swona a ni swi kumanga hi ntamu wa mina.” Loko hi zama ku twisisa swikarhatu leswi vanhu van’wana va kumanaka na swona, hi ta swi kota ku va twela wusiwana, ku hambana ni ku tshamela ku va sola sola.

Leswi U Nga Swi Yentxaka

Loko ku ni vanhu lava u va tekelaka hansi, zama ku vona leswi wena na vona mi fanaka hi swona. Hi xikombiso, pimisa hi leswi va titwisaka xi swona

Ntwelawusiwana wu hi pfuna ku vona vanhu hinkwavu na va li maxaka ya hina

loko va dla swakudla ni ndjangu wa vona
loko va vuya hi ntirhweni na va karhalile
loko va tlanga ni vanghanu va vona
loko va yingisela muzika lowu va wu rhandzaka

U gama u tivona na u li ka xiyimu xa vona. Se u tivutisa leswi:

‘A ni ta titwisa ku yini loko vanhu van’wana va ni vona na ni nga li wa nchumu?’
‘A ni ta titwisa ku yini loko vanhu van’wana va ni yavanyisa ni ku ni tiva na va nga ni tivi?’
‘Loko a ni lumba ntlawa wa vona a ni ta lava swaku vanhu va’wana va ni khomisa ku yini?’

Mulungu ni Mubaniyana na va kombana mafoto ya mindjangu ya vona, leswi va rhandzaka ku swi yentxa ni lomu va tirhaka kona.

Leswi Nga Humelela Vanhu Van’wana: Robert (Cingapura)

“A khale a ni pimisa swaku vanhu va ku fa tindleve a va li xitranyu, a va nga tivi funtshi a va nga hlweli ku kwata. Hi mhaka leyo, a ni nga swi rhandzi ku tshama na vona. Kambe leswi a ni nga va yentxeli nchumu xa ku biha, a ni nga tivoni na ni ni xikheto.

“Ku twela wusiwana vanhu va ku fa tindleve swi ni pfunile ku hlula xikheto lexi a ni li na xona. Hi xikombiso, a ni pimisa swaku vanhu va ku fa tindleve a tinga teki hikusa loko ni vulavula na vona a vo nyima va ni languta. Kambe ni game ni swi vona swaku a va ni razawu, hikusa hambi mina, loko munhu a wo vulavula na mina na ni fi tindleve a ni to nyima ni mu languta. Hambi loko a no vekela xinchinana ka ndleve xa ku ni pfuna ku yingisa, kambe loko ni nga swi twanga leswi nga hlayiwa a swi ta tikomba swaku a ni twisisanga nchumu.

“Leswi ni nga tiveka ka xiyimu xa vanhu va ku fa tindleve, xikheto lexi a ni li na xona xi nyamalalile.”