• Yi Nga Ku Pfunisa Ku Yini Mintlhanganu Ya Timboni Ta Yehovha?
    Tikhorisi Hi Wutomi La Ku Kala Li Nga Heli — Djondzo Ya Bibele
    • Djondzo 10. Wanuna lweyi a kombiwaka tsalwa hi Mboni ya Yehovha na va li ka Yindlo ya Wugandzeli.

      DJONDZO 10

      Yi Nga Ku Pfunisa Ku Yini Mintlhanganu Ya Timboni Ta Yehovha?

      U tshama u ya ka ntlhanganu wa Timboni ta Yehovha? Loko u nga se tshama u ya, swi nga yentxeka swi ku karhatela ku sungula ku ya mintlhanganwini. Swi nga yentxeka u tivutisa leswi: ‘Ku yentxeka yini ka mintlhanganu ya kona? Hi mhaka muni yi li ya lisima? Indje swi lava ni ya ka yona?’ Ka djondzo leyi, hi ta vona swaku mintlhanganu yi nga ku pfunisa ku yini swaku u tshinela kusuhi ni Xikwembu ni swaku yi nga ku pfunisa ku yini ka wutomi la wena.

      1. Hi mhaka muni swi li swinene ku ya ka mintlhanganu ya Timboni ta Yehovha?

      Mutsali mun’wana wa Bibele a kombise swaku hi mhaka muni swi li swa lisima ku ya ka mintlhanganu, a te: “Ni ta dzunisa Yehovha ka mintlhanganu ya yikulu.” (Tipisalema 26:12) Hi laha ku fanaka, amisaveni hinkwayu Timboni ta Yehovha ta tlhangana vhiki ni vhiki swaku ti dzunisa Yehovha, ti yimbelela ni ku khongela. Minkama yin’wana hi lembe ta tlhangana hi mintlawa ya yikulu swaku ti dzunisa Yehovha.

      2. U ta djondza yini ka mintlhanganu ya hina?

      Ka mintlhanganu hi djondza hintamu Bibele. Li ‘tlhamuseliwa kahle li twisiseka.’ (Lerha Nehemiya 8:8.) Loko u ya ka mintlhanganu leyi u ta djondza hi Yehovha ni wumunhu la yena la ku saseka. Loko u ya u djondza hi lirhandzu la Yehovha, u ta ya u tshinela ka yena. U ta tlhela u djondza swaku Yehovha a nga ku pfunisa ku yini swaku u va ni wutomi la ku tsakisa. — Esaya 48:17, 18.

      3. Swi ta ku pfunisa ku yini ku tiva vanhu van’wana a mintlhanganwini?

      Yehovha a hi byela swaku “a hi hlayisaneni leswaku hi tiyisana, hi rhandzana hi tlhela hi yentxa mintirho ya yinene, hi nga tshikeni ku tlhangana.” (Vaheberu 10:24, 25) A mintlhanganwini u ta kuma vanhu lava va nga ni mhaka ni van’wana hikakunene, u ta twa vanhu na va vulavula minchumu leyi kumekaka ka Bibele leyi nga ta ku pfuna. Ku fana na wena, swa va tsakisa ku tama va djondza hi Xikwembu. (Lerha Varoma 1:11, 12.) Naswona u ta kuma vanhu lava va nga chada ni va ku kala va nga chadanga kambe va tsakile hambileswi va kumanaka ni swikarhatu. U yi vonile minchumu ya yinene leyi yentxekaka a mintlhanganwini. Leswo i swikombiso ntsena swa leswi u nga ta swi kuma loko u ya mintlhanganwini!

      DJONDZA SWIN’WANA

      Vona leswi swi yentxekaka ka mintlhanganu ya Timboni ta Yehovha u tlhela u vona swaku swi nga ku pfunisa ku yini loko u tikarhata leswaku u ya ka yona.

      4. Mintlhanganu ya Timboni ta Yehovha yi tshamise ku yini

      Ka minkama ya vapostolo va Yesu, a Vakreste a va tlhangana swaku va djondza hi Yehovha. (Varoma 16:3-5) Lerhani Vakolosa 3:16, mi gama mi bula hi xivutiso lexi landzelaka:

      • Ka minkama ya vapostolo, Vakreste a va mu dzunisisa ku yini Yehovha?

      Ni namuntlha, Timboni ta Yehovha ta tlhangana swaku ti dzunisa Xikwembu. Leswaku u tiva swaku mintlhanganu yoleyo yi tshamise ku yini, sixtirani VHIDIYO. Loko mi gama, vonani foto leli li kombisaka mintlhanganu mi gama mi bula hi swivutiso leswi landzelaka.

      VHIDIYO: Ku Yentxiwa Yini Ka Yindlo Ya Wugandzeli? (2:12)

      • I mpsini u nga swi vona ka vhidiyo, leswi fanaka ni leswi nga tsaliwa ka buku la Vakolosa 3:16?

      • Ka vhidiyo kumbe ka mufoto u vone nchumu lexi nga ku tsakisa hi mintlhanganu?

      Lerhani 2 Vakorinto 9:7, mi gama mi bula hi xivutiso lexi landzelaka:

      • Hi mhaka muni Timboni ta Yehovha ti nga kombeli male ka mintlhanganu ya tona?

      Kombela lweyi a ku djondzisaka Bibele swaku a ku komba programa la mintlhanganu leyi landzelaka.

      • Ka programa la mintlhanganu i mpsini leswi swi nga ku tsakisa naswona u vonaka swaku swi nga ku pfuna?

      Indje a wu swi tiva?

      Ka jw.org, u nga kuma ndhawu ni nkama wa mintlhanganu ya bandla leli u li lavaka amisaveni hinkwayu.

      Mafoto: Leswi yentxekaka ka Yindlo ya Wugandzeli na mintlhanganu yi nge se sungula, loko se yi sungulile, ni loko se yi gamile. Leswi swi tlhela swi kombisiwa ka mafoto ya A ku ya ka D. A. Mboni ya Yehovha leyi vekaka dixkursu hi ku tirhisa Bibele. B. Makwerhu wa wansati a nyikela nhlamulu ya yena a mintlhanganwini. C. Mboni ya wanuna na yi vulavula ni ndjangu wun’wana loko se ku hele mintlhanganu. D. Mboni ya wanuna na yi pfulela xipfalu makwerhu lweyi a nga guga.

      1. Ka mintlhanganu ya hina u ta vona madixkursu, minkombisu, ni mavhidiyo. A mintlhanganu yi sungula yi tlhela yi pfala hi xikhongelo

      2. Minkama yin’wana ka mintlhanganu, vanhu va nga hlamula loko va swi tsakela

      3. Hinkwavu va hoyozeliwa, lava va nga chada, va ku kala va nga chadanga, va ku guga, ni swivanana

      4. Ka mintlhanganu ya Timboni ta Yehovha ku ngheniwa mahala, a ku hundzisiwi paratu leswaku ku kombeliwa male

      5. Swi lava u tikarhata swaku u ya mintlhanganwini

      Vona xikombiso xa ndjangu wa Yesu. Lembe ni lembe a va suka Nazareta va ya ka ntlhanganu wa ku hlawuleka a Jerusalema. Leswo a swi nga vevuki hikusa a swi lava va famba kolomu ka 100 wa makilometru hi minenge ka tindhawu leti nga ni tinhava. Lerhani Luka 2:39-42, mi gama mi bula hi swivutiso leswi landzelaka:

      • U pimisa swaku a va fanele va tikarhata swaku va yendza?

      • Hi mhaka muni minkama yin’wana swi lava u tikarhata swaku u ya mintlhanganwini?

      • U vona swaku swa pfuna? Loko swi pfuna hi mhaka muni?

      Mafoto: Yosefa, Mariya, Yesu ni mun’we wa vamakwavu va Yesu va tilunghiselela swaku va famba. 1. Yosefa na a ntlhanteka minkwama henhla ka mbongolo, Mariya na a lunghiselela swakudla. 2. Mapa lowu kombisaka ndlela leyi sukaka hi Nazareta yi ya Jerusalema.

      Bibele li li i swa lisima ku tlhangana ni van’wana swaku hi dzunisa Yehovha. Lerhani Vaheberu 10:24, 25, mi gama mi bula hi xivutiso lexi landzelaka:

      • Hi mhaka muni minkama hinkwayu hi fanele hi va kona mintlhanganwini?

      VAN’WANA VA LI: “A swi lavi u suka kaya swaku u dzunisa Xikwembu. U nga xi dzunisa hambiloko u tilerhela Bibele u li kaya.”

      • Hi yihi ndzimana kumbe xikombiso lexi nga ka Bibele lexi hi pfunaka ku twisisa vonelo la Yehovha hi mhaka leyi?

      LESWI HI NGA SWI DJONDZA

      Ku ya mintlhanganwini swi ta ku pfuna swaku u djondza hi Yehovha ni ku tiyisa wunghanu la wena na yena. Ku tlula leswo mintlhanganu yi ta ku nyika nkateko wa ku dzunisa Yehovha na u ni vanhu van’wana.

      Ku kambela leswi hi nga swi djondza

      • Hi mhaka muni Yehovha a lava swaku hi ya mintlhanganwini?

      • I yini leswi u nga ta swi djondza ka mintlhanganu ya Timboni ta Yehovha?

      • U pimisa hi minchumu yin’wana leyi mintlhanganu yi nga ku pfunaka hi yona?

      Zama ku yentxa leswi

      LOKO U LAVA KU TIVA SWIN’WANA

      Mhaka ya ku ya mintlhanganwini yi ku yentxa u karhateka? Leswo swi humelele wanuna mun’wana, vona leswi swi nga mu pfuna swaku a tsakela mintlhanganu.

      A Hi Nge Khohlwi Leswi Va Nga Hi Yamukelisa Xiswona (4:16)

      Vona swaku djaha lin’wana li yi rhandzise ku yini mintlhanganu, naswona i mpsini leswi li nga swi yentxa swaku li nga ha yi luzi.

      Ni Yi Rhandze Hintamu Mintlhanganu! (4:33)

      Vona leswi vanhu van’wana va swi vulaka hi ku ya mintlhanganwini.

      “Hi Mhaka Muni Swi Li Swinene Ku Ya Mintlhanganwini Ka Yindlo Ya Wugandzeli?” (Nhlokomhaka leyi nga ka site la jw.org)

      Djondza hi wanuna lweyi a a lumba ntlawa wun’wana wa swigevenga. Vona swaku li txintxise ku yini wutomi la yena loko se a ye ka mintlhanganu ya Timboni ta Yehovha.

      “A Ni Nga Humi Hi Kaya Na Ni Nga Na Xibamu” (Murindzi wa 1 ka Julho wa 2014)

  • Mfumu Wa Xikwembu Se Wa Fuma!
    Tikhorisi Hi Wutomi La Ku Kala Li Nga Heli — Djondzo Ya Bibele

    • 5. Misava yi txintxe ngopfu ku sukela hi 1914

      Sixtirani VHIDIYO.

      VHIDIYO: Misava Yi Txintxile Ku Sukela Hi 1914 (1:10)

      Yesu a profete leswaku misava a yi ta tshamisa ku yini loko a sungula ku fuma tani hi Hosi. Lerhani Luka 21:9-11, mi gama mi bula hi xivutiso lexi landzelaka:

      • Ka swilo leswi hinkwaswu, hi swini leswi u swi vonaka swi yentxeka namuntlha?

      Mupostolo Pawulo a tlhamusele leswi vanhu a va ta tshamisa xiswona ka masiku ya wugamu ya ku fuma ka vanhu. Lerhani 2 Timotiyu 3:1-5, mi gama mi bula hi xivutiso lexi landzelaka:

      • U pimisa swaku vanhu va swi yentxa leswi ka masiku ya hina?

      Mafoto: Mafoto lawa ma kombisaka leswi misava yi nga tshamisa xiswona ni leswi vanhu va swi yendlaka ka masiku ya wugamu. 1. Murhangeli wa masonchwa na a huwelela na a tlakuse mavoko. 2. Tiyindlo leti nga dilika hi mhaka ya ku tsekatseka ka misava. 3. Mavhiyawu ya nyimpi. 4. Vanhu lava va nga yambala mamaxkara. 5. Maprediyu mambirhi ya ku fana ya Nova York na ma hisiwa hi vaterorixta. 6. Wanuna lweyi a tirhisaka madroga. 7. Wanuna lweyi a bongelaka nsati wa yena a tlhela a lava ku mu ba. 8. Madroga ni mabyala ya ku hambanahambana. 9. Vavasati vambirhi va tisusa mufoto na va yambale mpahla ya ku dura ni ma cordão, switlan’wani ni mapulsera ya ku dura. 10. Vanhu lava va txinaka va tlhela va yimbelela. 11. Munhu lweyi a nga tereka a txukumetela xibolhelani lexi nga ni gasolina na xi pfurha.

      6. Hi lava ku seketela Mfumu wa Xikwembu

      Lerhani Matewu 24:3, 14, mi gama mi bula hi swivutiso leswi landzelaka:

      • Hi wini ntirho wa lisima lowu kombisaka leswaku Mfumu wa Xikwembu se wa fuma?

      • I yini leswi wena u nga swi yentxaka leswaku u va ka ntirho lowu?

      Mfumu wa Xikwembu se wa fuma. Naswona siku la leswaku wu fuma misava hinkwayu se li kusuhi. Lerhani Vaheberu 10:24, 25, mi gama mi bula hi xivutiso lexi landzelaka:

      • Leswi siku leli se li nga kusuhi, i mpsini leswi mun’wana ni mun’wana wa hina a faneleke a swi yentxa?

      Mafoto: 1. Xidjondzo xa Bibele na xi li ka mintlhanganu ya Timboni ta Yehovha. 2. Xidjondzo xolexi xa xin’we na xi chumayela munhu lweyi xi mu tivaka.

      Loko a wo tiva nchumu lowu a wu ta pfuna ni ku tlhela wu ponisa van’wana, a wu ta yentxa yini?