Tindlela ta Kukombisa Lirhandzu ni Wululami Abandleni la Wukreste (Xiyenge Xa Wumbirhi Ka 4 Wa Swona)

1. Hi swihi swilo swimbirhi leswi hinga tiyisekaka ha swona?

YEHOVHA XIKWEMBU wahi rhandza naswona a lava leswaku hi khomiwa hi ndlela leyi lulameke. (Pis. 33:5) Hi mhaka leyo, hinga tiyiseka hi swilo leswi: Xosungula a twa kuvava swinene loko hi khomiwa hi ndlela ya kubiha; xawumbirhi, ata yendla xokarhi leswaku hingaha tshuki hi khomiwa hi ndlela ya kubiha. Ka nhlokomhaka ya kusungula ka longoloko wa tinhlokomhaka leti vulavulaka hi lirhandzu ni wululami la Yehovha,b hi vulavule hi Nawu wa Moxe. Hi djondze leswaku Nawu lowu awu seketeliwe ka lirhandzu. Handle ka leswo, awu khutaza Vayisrayele leswaku va khoma van’wani hi ndlela leyi lulameke, ngopfungopfu lava avanga li na munhu wa kuva sirhelela. (Det. 10:18) Nawu lowuyani awuswi veka livaleni leswaku Yehovha a akarhateka hi vanhu va yena.

2. Hita hlamula swivutiso swihi ka djondzo leyi?

² Nawu wa Moxe wu game kutirha hi lembe la 33 E.C. loko kuvumbiwile bandla la Wukreste. Xana leswi swi lava kuvula leswaku bandla leli alaha kuvumbiwa alingata va ni nawu lowu awutali khutaza kukombisa lirhandzu ni kukhoma van’wani hi ndlela leyi lulameke? Ihim. Vakreste va nyikiwe nawu lowumpsha, kunga nawu wa Kreste. Ka djondzo leyi, hita kambisisa leswaku nawu lowu wu katsa yini naswona hita hlamula swivutiso leswi landzelaka: I ncini lexihi yendlaka hi kholwa leswaku nawu wa Kreste wu seketeliwa ka lirhandzu naswona wu khutaza vanhu leswaku va khoma van’wani hi ndlela leyi lulameke? Xana lavanga ni wutihlamuleli va fanele vava khomisa kuyini lavanga hansi ka vona?

LESWI “NAWU WA KRISTE” WU KATSAKA SWONA

3. Hikuya hi Vagalatiya 6:2, “Nawu wa Kriste” wu katsa yini?

³ Lerha Vagalatiya 6:2. Vakreste va le hansi ka “Nawu wa Kriste.” Hambileswo, nawu lowu ahi lixta la minawu leyi hi faneleke hiyi landzela. Kuhambana ni leswo, wuhi nyika swileleto leswi hi faneleke hiswi landzela. Wu katsa swilo hinkwaswu leswi Yesu aswi djondziseke. Maparagrafu lama landzelaka matahi pfuna leswaku hiwu twisisa kahle nawu lowu.

4-5. Hi tihi tindlela leti Yesu a adjondzisa hi tona naswona a yendle leswo hi nkama muni?

⁴ Yesu aava djondzisisa kuyini vanhu? Yin’we ya tindlela leti a atitirhisa aku li leswi aaswi vula. A djondzise vanhu ntiyiso hi Xikwembu; a pfune vanhu kutwisisa leswaku hayini Xikwembu xi vumbe vanhu naswona ava hlamuselile leswaku i Mfumu wa Xikwembu ntsena lowunga helisaka kuhlupheka hinkwaku. Kunene marito ya yena ama khumba mbilu ya lava avama yingisa. (Luk. 24:19) Ndlela yin’wana leyi aayi tirhisa leswaku a djondzisa vanhu aku li mahanyelo ya yena. Phela matikhomela ya yena ma pfune valandzeli va yena leswaku va vona leswi ava fanele va hanyisa xiswona. — Yoh. 13:15.

⁵ Yesu a djondzise vanhu hi nkama muni? Yesu a djondzise vanhu nkama lowu a ali laha misaveni. (Mat. 4:23) A tlhele a djondzisa valandzeli va yena ndzhaku nyana ka loko a pfuxiwile. Hi xikombiso, a humelele ka ntlawa wa vadjondzisiwa, lowu swinga yendlekaka awu li ni vanhu lava tlulaka 500, ivi awu nyika xileriso xa ‘kuyendla vadjondzisiwa’. (Mat. 28:19, 20; 1 Kor. 15:6) Tani hileswi anga nhloko ya bandla, Yesu a tame a djondzisa vapostola va yena hambileswi se a ali tilweni. Hi xikombiso, kolomuya ka lembe la 96 E.C., a kongomise mupostola Yohane kuva a bumabumela ni kulaya Vakreste lava totiweke va le nkameni wa yena. — Kol. 1:18; Nhla. 1:1.

6-7. a) Hingaswi kuma kwihi leswi Yesu aswi djondziseke? b) Hingaswi kombisa kuyini leswaku hawu yingisa nawu wa Kreste?

⁶ Hingaswi kuma kwihi leswi Yesu aswi djondziseke? Hingaswi kuma ka mabuku lawa ma tsaliweke hi Matewu, Marka, Luka na Yohane. Mabuku lawa ma hlamusela swilo swinyingi leswi Yesu aswi vuleke a tlhela aswi yendla loko a li laha misaveni. Mabuku laman’wani ya Matsalwa ya Xigriki na wona mahi pfuna kutiva ndlela leyi Yesu a vonaka swilo ha yona hikusa lavama tsaleke va huhuteliwe hi moya lowokwetsima naswona a va ni “miyakananyu ya Kriste”.

⁷ Leswi hiswi djondzaka: Nawu wa Kreste wu khumba swiyenge hinkwaswu swa wutomi la hina. Wungahi pfuna akaya, axikolweni, antirhweni ni le bandleni. Hinga djondza nawu lowu loko hi tinyika nkama wa kulerha ni kuyanakanyisisa hi Matsalwa ya Xigriki. Hi yingisa nawu lowu loko hi yendla hinkwaswu leswi kumekaka ka mabuku lawa ya Bibele. Loko hi landzela nawu wa Kreste, hita va hi yingisa Yehovha, Xikwembu xa hina xa lirhandzu, hikusa hinkwaswu leswi Yesu aswi djondziseke swi ta hi ka yena. — Yoh. 8:28.

NAWU WA KRESTE WU SEKETELIWE KA LIRHANDZU

8. Nawu wa Kreste wu seketeliwe ka yini?

⁸ Vanhu lava tshamaka ka yindlu leyi yakiweke kahle yi tlhela yi va ni masungulu lama tiyeke va titwa va sirhelelekile ndzeni ka yona. Hilaha kufanaka, nawu lowunga ni xisekelo lexi tiyeke wu yendla leswaku lavawu yingisaka va titwa va sirhelelekile. Nawu wa Kreste wu seketeliwe ka xisekelo lexi tiyeke swinene, kunga lirhandzu. Hayini hi vula tanu?

9-10. a) I mpsini leswi Yesu aswi yendleke leswi kombaka leswaku aava rhandza vanhu? b) Hingaxi tekelelisa kuyini xikombiso xa Yesu Kreste?

⁹ Xosungula, hinkwaswu leswi Yesu aaswi yendla aswi susumeteliwa hi lirhandzu. Yesu aava twela wusiwana vanhu hileswi aava rhandza. Hi xikombiso, hi mhaka ya leswi a ani ntwelawusiwana, a djondzise vanhu votala hi Yehovha, a hanyisa lava ava vabya, a dlisa lava a va ni ndlala hambi ni kupfuxa lava feke. (Mat. 14:14; 15:32-38; Marka 6:34; Luk. 7:11-15) Kuyendla swilo leswi aswimu tekela nkama ni ntamu. Hambileswo, hi kuswi rhandza Yesu a aveka swilaveko swa van’wani amahlweni ka swa yena n’winyi. A nyikele hambi hi wutomi la yena leswaku ahi fela. Kunene, aku na xikombiso xa lirhandzu xaxikulu hintamu kutlula lexi! — Yoh. 15:13.

¹⁰ Leswi hiswi djondzaka: Hinga tekelela Yesu hi kuveka swilaveko swa van’wani amahlweni ka swa hina ni hi kukombisa ntwelawusiwana ka vanhu lava hiva chumayelaka. Loko hi chumayela ni kudjondzisa vanhu Bibele, hita va hi landzela nawu wa Kreste.

11-12. a) Hiswi tivisa kuyini leswaku Yehovha a ni mhaka na hina? b) Hinga yendla yini leswaku hi kombisa lirhandzu la kufana ni la Yehovha ka van’wani?

¹¹ Xa wumbirhi, Yesu a pfune vanhu kuva va twisisa leswaku Yehovha wava rhandza. Ka ntirho wa yena wa kuchumayela, Yesu aswi veke livaleni leswaku Yehovha a ni mhaka ni vagandzeli va yena. Hi xikombiso, a djondzise leswaku mun’wani ni mun’wani wa hina i wa lisima ka Yehovha. (Mat. 10:31) A hlamusele leswaku Yehovha a tinyimiselile kuyamukela hinkwavu lava tisolaka naswona va navelaka kutlhelela bandleni. (Luk. 15:7, 10) A tlhele a kombisa leswaku Yehovha ava rhandza hintamu vanhu la kakuva a nyikele hi N’wana wa yena leswaku ava fela. — Yoh. 3:16.

¹² Leswi hiswi djondzaka: Hingamu tekelelisa kuyini Yehovha? (Efe. 5:1, 2) Hi kuvona vamakwerhu hilaha Yehovha ava vonaka ha kona, va li va lisima ka hina. Xin’wana lexi hingaxi yendlaka i kuyamukela “nyimpfu leyilahlekeke” leyi tlhelelaka ka Yehovha na hi tsakile. (Pis. 119:176) Hinga tlhela hi kombisa leswaku hava rhandza vamakwerhu hi kutirhisa nkama ni ntamu wa hina leswaku hiva pfuna, ngopfungopfu loko va kumana ni swiyimo swa kutika. (1 Yoh. 3:17) Loko hi rhandza van’wani, hita va hi landzela nawu wa Kreste.

13-14. a) Hilaha swi kombisiweke ha kona ka Yohane 13:34, 35, hi wihi nawu lowu Yesu awu nyikeke valandzeli va yena naswona hayini wu li wumpsha? b) Hingawu landzelisa kuyini nawu wa Kreste?

¹³ Xa wunharhu, Yesu a khutaze valandzeli va yena leswaku va rhandzana. (Lerha Yohane 13:34, 35.) Nawu lowu awu li wumpsha. Hayini hi vula leswo? Hikusa awu khutaza valandzeli va Yesu kukombisa muxaka wa lirhandzu lowu hambaneke ni lowu Yehovha a alava leswaku Vayisrayele vawu kombisa. Hikuya hi nawu lowu, vadjondzisiwa va Yesu ava fanele va rhandzana kukota ndlela leyi Yesu aava rhandzise xiswona. Leswo aswi katsa kuva va veka swilaveko ni kunavela ka van’wani amahlweni ka swa vona. Hi fanele hi rhandza vamakwerhu kutlula leswi hi tirhandzisaka xiswona. Hi fanele hiva rhandza swinene la kakakuva hinga pimisi kambirhi leswaku hiva fela loko swi laveka, hilaha Yesu a yendleke ha kona.

¹⁴ Leswi hiswi djondzaka: Hingawu landzelisa kuyini nawu wa Kreste? Hi marito matsongo, hi landzela nawu wa Kreste loko hi tirhisa nkama, ntamu ni swilo swa hina leswaku hi tsakisa kumbe kupfuna vamakwerhu. Phela lirhandzu leli hinga na lona hi vamakwerhu i likulu swinene la kakuva ahi pimisi kambirhi leswaku hiva fela. Hambiswilitanu, ku ni swilo switsongo leswi hingaswi yendlaka akuva hi komba vamakwerhu leswaku hava rhandza. Hi xikombiso, loko hi yendla minzamu leswaku hi pfuna makwerhu lweyi a gugeke leswaku a kota kuva kona xidjondzweni, loko hi titsona nchumu lexi hixi rhandzaka leswaku hi tsakisa makwerhu kumbe loko hi tirhisa maferiya ya hina leswaku hiya pfuna vamakwerhu lava weliweke hi tinghozi ta ntumbuluku, hita va hi landzela nawu wa Kreste. Leswo swita yendla leswaku xirho xin’wana ni xin’wana xa bandla xi titwa xi sirhelelekile.

NAWU LOWU TLAKUSAKA WULULAMI

15-17. a) Hilaha swiyendlo swa yena swi kombisaka ha kona, xana Yesu aali vonisa kuyini wululami? b) Hingamu tekelelisa kuyini Kreste?

¹⁵ Hilaha li tirhisiwaka ha kona aBibeleni, a rito: “Wululami” hakanyingi li vula kuyendla leswi Xikwembu xi vulaka leswaku swi lulamile ni kuswi yendla handle kova ni xikheto. Hayini hinga vulaka leswaku nawu wa Kreste wu tlakusa wululami?

¹⁶ Xosungula, vona ndlela leyi swiyendlo swa Yesu swiyi kombiseke ha yona ndlela leyi aali vonisa xiswona wululami. Amasikwini ya yena, a varhangeli va wukhongeli va Vayuda avava nyenya vanhu lava avanga li Vayuda; ava tekela hansi vayuda lava avanga djondzanga wukhongeli la Xiyuda naswona avangava hloniphi vavasati. Kambe kuhambana na vona, Yesu aanga na xikheto. A khome hinkwavu hi ndlela leyi lulameke. Ava yamukelile lava avanga li Vayuda lava kombiseke lipfumelo ka yena. (Mat. 8:5-10, 13) Aanga kheti munhu loko a chumayela. A chumayele swisiwana ni lava ganyeke. (Mat. 11:5; Luk. 19:2, 9) Anga zanga a khome vavasati hi ndlela yobiha. Kuhambana ni leswo, ava hloniphile a tlhela ava khoma hi ndlela leyinene. A yendle tanu hambi ka vavasati lava ava voniwa na vangali va nchumu. — Luk. 7:37-39, 44-50.

¹⁷ Leswi hiswi djondzaka: Hinga tekelela Yesu hi kukala hinga kheti munhu loko hi chumayela. Hita chumayela hinkwavu kunga khataliseki leswaku i swisiwana kumbe va ganyile ni leswaku va lumba wukhongeli lihi. Vavanuna lavanga Vakreste va tekelela xikombiso xa Yesu hi kuhlonipha vavasati. Loko hi yendla leswo, hiva hi landzela nawu wa Kreste.

18-19. I yini leswi Yesu aswi djondziseke hi wululami naswona hinga djondza yini ka swona?

¹⁸ Xa wumbirhi, vona nakambe leswi Yesu aswi djondziseke hi wululami. A djondzise valandzeli va yena matshinya ya minawu lawa amatava pfuna kukhoma van’wani hi ndlela leyi lulameke. Hi xikombiso, a djondzise swaku hi fanele hi khoma van’wana hi ndlela leyi hina hi lavaka kukhomiwa ha yona. (Mat. 7:12) Hinkwerhu hi lava kukhomiwa hi ndlela leyi lulameke. Hi mhaka leyo, hi fanele hi khoma van’wani hi ndlela leyi lulameke. Loko hi yendlisa xileswo, na vona vangaha susumeteleka kuhi khoma hi ndlela leyi lulameke. Kambe hinga kuyini loko hi khomiwe hi ndlela yobiha? Yesu a djondzise valandzeli va yena kutshemba leswaku ‘Xikwembu xitayendla vuyavanyisi lebyinene ka . . . lavahuwelelaka ka xona vusiku ni nhlekanhi’. (Luk. 18:6, 7) Entiyisweni, marito lawa ma tshembisa leswi: Xikwembu xa hina lexi lulameke xayi vona mindzingo leyi hi kumanaka na yona masikwini lawa ya wugamu, naswona xita lulamisa swilo hi nkama lowu faneleke. — 2 Tes. 1:6.

¹⁹ Leswi hiswi djondzaka: Loko hi landzela leswi Yesu aswi djondziseke, hi ta khoma van’wani hi ndlela ya kululama. Naswona loko ku li leswaku hi khomiwe hi ndlela yobiha ka misava leyi ya Sathana, hinga chaveleleka hi kutiva leswaku Yehovha ata lulamisa swilo.

LAVANGA NI WUTIHLAMULELI VA FANELE VAVA KHOMISA KUYINI LAVANGA HANSI KA VONA?

20-21. a) Lavanga ni wutihlamuleli va fanele vava khomisa kuyini lavanga hansi ka vona? b) Nuna a fanele amu khomisa kuyini nsati wa yena? c) Papayi a fanele ava khomisa kuyini vana va yena?

²⁰ Hikuya hi nawu wa Kreste, lavanga ni wutihlamuleli va fanele vava khomisa kuyini lavanga hansi ka vona? Tani hileswi nawu lowu wu seketeliweke ka lirhandzu, lavanga ni wutihlamuleli va fanele va hlonipha ni kunyika lisima lavanga hansi ka vona. Va fanele va khumbuka leswaku Kreste a lava leswaku va kombisa lirhandzu ka hinkwaswu leswi vaswi yendlaka.

²¹ Andjangwini. Nuna a fanele a rhandza nsati wa yena “hilaha na yena Kreste arhandzeke bandla hakona.” (Efe. 5:25, 28, 29) Nuna a fanele a kombisa lirhandzu la kufana ni leli Yesu ali kombiseke. A fanele a rhangisa swilaveko ni kunavela ka nsati wa yena. Vavanuna van’wani swava tikela kuyendla leswi. Hayini? Kumbexana hileswi va kulisiweke ka ndhavuku lowungaswi nyikiki lisima kurhandza ni kukhoma van’wani hi ndlela leyi lulameke. Swinga yendleka swingava vevukeli kucinca matshamela ya vona. Kunga khataliseki xivangelo xa kona, vavanuna va fanele va yendla leswi vangaswi kotaka leswaku va cinca ivi va landzela nawu wa Kreste. Phela nuna lweyi anga ni xihlonipho wa rhandziwa hi nsati wa yena. Papayi lweyi a rhandzaka vana va yena angava dlisi khayikhayi vana. (Efe. 4:31) Kuhambana ni leswo, wava komba leswaku wava rhandza naswona wava tsakela. Loko a yendla leswo, vana vata titwa va sirhelelekile naswona vatamu rhandza va tlhela vamu hlonipha.

22. Hilaha swi hlamuseliwaka ha kona ka 1 Petro 5:1-3, a “tinyempfu” ti lumba mani naswona ti fanele ti khomisiwa kuyini?

²² Abandleni. Madoda ma fanele ma khumbuka leswaku “tinyempfu” ahi ta wona. (Yoh. 10:16; lerha 1 Petro 5:1-3.) A marito lamange “ntlhambi wa Xikwembu”, ‘hilaha Xikwembu xiswilavaka hakona’ ni “lava minganyikiwa kuvarisa” ma khumbukisa madoda leswaku tinyimpfu i ta Yehovha, kunga lweyi a lavaka leswaku ti khomiwa hi lirhandzu. (1 Tes. 2:7, 8) Yehovha wama tsakela madoda lama kombisaka lirhandzu loko ma risa ntlhambi wa yena. Handle ka leswo, ma rhandziwa ma tlhela ma hloniphiwa hi vamakwerhu bandleni.

23-24. a) Madoda ma fanele ma yendla yini loko makwerhu bandleni a yendle xidjoho xaxikulu? b) I yini leswi madoda ma faneleke maswi khumbuka loko ma kambisisa timhata ta kutasi?

²³ Ntirho lowu madoda mawu yendlaka namuntlha loko ma tiva leswaku makwerhu a yendle xidjoho xaxikulu ni lexi chavisaka wu hambanile ni lowu awu yendliwa hi vayavanyisi ni madoda ahansi ka Nawu wa Moxe. Ankameni wa Moxe, a madoda ni vayavanyisi avanga khataleli timhaka leti yelanaka ni wugandzeli la Yehovha ntsena. Ava tlhela va tirha tani hi tihuvu ta wuyavanyisi. Kambe ahansi ka Nawu wa Kreste, madoda ma khatalela ntsena tlhelo leli yelanaka ni wuxaka la mudjohi na Yehovha ni bandla. Maswi tiva leswaku tlhelo lelin’wana li fanele li tshikeliwa tihuvu ta wuyavanyisi leti vekiweke hi mimfumu ya misava. Maswi tiva leswaku i Yehovha lweyi a nyikeke mimfumu ya misava wutihlamueleli leli. — Rhom. 13:1-4.

²⁴ Se ma fanele ma yendla yini madoda loko ma twa leswaku munhu wokarhi a yendle xidjoho lexi kulu? Ma fanele ma tirhisa Matsalwa loko ma kambisisa mhaka ya kona na mangase yendla xiboho. Ama fanelanga ma rivala leswaku nawu wa Kreste wu seketeliwe ka lirhandzu. Hi mhaka leyi, lirhandzu lita susumetela madoda kutivutisa leswi: I mpsini leswi hingaswi yendlaka akuva hi pfuna swirho swa bandla leswi karhatekaka hileswi swi khomiweke hi ndlela yobiha? Xana mudjohi yelweyo wa tisola ka leswi aswi yendleke? Hinga yendla yini akuva himu pfuna kulungisa wuxaka la yena na Yehovha?

25. Hita bula hi yini ka djondzo leyi taka?

²⁵ Ha tsaka swinene hileswi hinga hansi ka nawu wa Kreste! Loko hinkwerhu hi yendla minzamu leswaku hiwu landzela, bandla lita va ndhawu leyi sirhelelekeke naswona swirho hinkwaswu swita titwa swi sirhelelekile, swi rhandziwa ni kutlhela swi xiximiwa. Hambiswilitanu, hi hanya ka misava leyi ‘vanhu lavobiha vayaka mahlweni va yengeteleka kubiha’. (2 Tim. 3:13) Hi mhaka leyo, hi fanele hi tshama hi pfule matihlo. Bandla la Wukreste lingali kombisa kuyini wululami la Yehovha loko kupfinyiwe n’wana? Djondzo leyi taka yita hlamula xivutiso lexi.