BIBLIYOTEKA KA INTERNETI la Watchtower
Watchtower
BIBLIYOTEKA KA INTERNETI
xiChangana (Moçambique)
  • BIBELE
  • MABUKU
  • MINTLHANGANU
  • w21 Outubro pp 14-17
  • Pfuxeta Wunghanu La Wena Na Yehovha

Aku na vhidiyu lihlawuliweke.

Hivaleli, aswikotekanga kuchaya vhidiyu.

  • Pfuxeta Wunghanu La Wena Na Yehovha
  • Murindzi Atwalisa Mfumu wa Yehovha (Lweyi A Djondziwaka Bandleni) — 2021
  • Swihlokwana
  • Timhaka Tifanaka
  • SWIKARHATU LESWI U NGA KUMANAKA NA SWONA
  • PIMISA HI SWILO LESWI U NGA SWI YENTXAKA
  • U NGA GODOLI!
  • ‘Vitana Madoda’
    Murindzi Atwalisa Mfumu wa Yehovha (Lweyi A Djondziwaka Bandleni) — 2025
  • Yehovha A Ku Rhandza Hintamu!
    Murindzi Atwalisa Mfumu wa Yehovha (Lweyi A Djondziwaka Bandleni) — 2021
  • Madoda — Tamani Mi Tekelela Xikombiso Xa Pawulo
    Murindzi Atwalisa Mfumu wa Yehovha (Lweyi A Djondziwaka Bandleni) — 2022
  • Minkama Hinkwayu Yehovha A Na Wena
    Murindzi Atwalisa Mfumu wa Yehovha (Lweyi A Djondziwaka Bandleni) — 2021
Vona Swin'wana
Murindzi Atwalisa Mfumu wa Yehovha (Lweyi A Djondziwaka Bandleni) — 2021
w21 Outubro pp 14-17
Makwerhu a hela ntamu loko a pimisa hi minzamu leyi a faneleke a yi yentxa swaku a pfuxeta yindlo ya yena.

Pfuxeta Wunghanu La Wena Na Yehovha

LEMBE lin’wana ni lin’wana, ku ni vanhu va vanyingi lava va tlhelelaka bandleni. Pimisa hi ‘ku tsaka’ loku nga kona tilweni loko mudjohi mun’we a tisola. (Luk. 15:7, 10) Loko ku li swaku u tlhelele bandleni, tiyiseka swaku Yesu, tintsumi na Yehovha va tsaka hintamu hi leswi u nga tlhela u lumba bandla. Kambe nkama lowu u yaka u pfuxeta wunghanu la wena na Yehovha, u nga ha kumana ni swikarhatu. Hi swini swikarhatu leswi u nga kumanaka na swona, funtshi u nga swi hlulisa ku yini?

SWIKARHATU LESWI U NGA KUMANAKA NA SWONA

Vamakwerhu va vanyingi va hela ntamu loko va ha ku tlheliseliwa bandleni. Leswo swi nga hi pfuna ku twisisa leswi Hosi Davhida a a titwisa xiswona. Phela hambi hi nkama lowu Davhida se a a rivaleliwe swidjoho swa yena, a vule leswi: “Swidyoho swa mina swi ni talele hintamu.” (Pis. 40:12; 65:3) Loko munhu a ha ku tlhelela ka Yehovha, swi nga yentxeka a heta malembe ya manyingi na a ha titwa nandzu. Izabele, lweyi a nga heta 20 wa malembe ni ku tlula na a susiwe bandleni a vule leswi a a titwisa xiswona.a Yena a vula leswi: “Swi ni karhatelile ku kholwa swaku Yehovha a nga ni rivalela.” Loko u hela ntamu, u tlhela u titwa nandzu swi nga ha ku karhatela ku tlhela u tiyisa wunghanu la wena na Yehovha. (Swi. 24:10) Kambe u nga pfumeli swaku leswo swi ku yentxekela.

Van’wana va chava swaku va nga ta swi kota ku yentxa hinkwaswu leswi lavekaka leswaku va tlhela va va vanghanu va Yehovha. Na a ha ku tlheliseliwa bandleni, Antonio a te: “A ni khohlwe minchumu ya yinyingi leyi ni nga yi djondza ni tlhela ni yi yentxa nkama na ni li Mboni ya Yehovha.” Phela leswo swi nga yentxa swaku van’wana swi va karhatela ku yentxa hinkwaswu leswi lavekaka swaku va tlhela va va vanghanu va Yehovha.

Hi xikombiso, a hi nge ku ni munhu lweyi a yindlo ya yena yi nga wonheteliwa hi xidzedze. Phela munhu lweyi, a nga hela ntamu loko a tshamela ku pimisa hi nkama ni ntamu lowu a nga ta wu heta swaku a tlhela a lunghisa yindlo ya yena. Hi ku fanana, loko wunghanu la wena na Yehovha li wonhekile hi mhaka ya xidjoho xa xikulu lexi u nga xi yentxa, u nga ha karhateka hintamu hileswi swi lavaka u yentxa minzamu leswaku u tlhela u lunghisa wunghanu la wena na Yehovha. Kambe ku ni lexi nga ku pfunaka.

Yehovha a hi nyika xirhambo lexi: “Tanani, swoswi, hi ta lunghisa timhaka axikarhi ka hina.” (Esa. 1:18) Phela se u tikarhate hintamu swaku u “lunghisa timhaka” ta wena na Yehovha, naswona Yehovha a ku rhandza hintamu hileswi u nga yentxa leswo. Pimisa hi leswi: Leswi u nga tlhelela ka Yehovha, Yehovha a nga ku tirhisa swaku a komba Sathana leswaku i muhembi! — Swi. 27:11.

Leswi u nga tlhelela ka Yehovha swi ta ku pfuna swaku u va ni wunghanu la linene na yena, naswona yena a ta va munghanu wa wena. (Yak. 4:8) Phela van’wana va tsaka loko va vona swaku se u tlhelele bandleni, kambe ku ni swin’wana leswi u faneleke u swi yentxa. U fanele u pfuxeta lirhandzu leli u nga na lona hi Papayi ni Munghanu wa wena Yehovha. Kambe u nga swi yentxisa ku yini leswo?

PIMISA HI SWILO LESWI U NGA SWI YENTXAKA

Zama ku va ni swilo leswi u nga swi fikelelaka. Swi nga yentxeka u khumbuka tidjondzo ta lisima hi Yehovha ni xitshembiso xa yena xa ku hi nyika paradesi. Kambe swoswi u fanele u pfuxeta mahanyelo ya wena ya Wukreste, ku nga ku chumayela, ku ya mintlhaganwini vhiki ni vhiki u tlhela u heta nkama ni vamakwerhu. Swoswi a hi voneni swilo swin’wana leswi u nga swi fikelelaka.

Minkama hinkwayu khongela ka Yehovha. Papayi wa wena Yehovha wa swi twisisa swaku leswi u titwaka nandzu swi nga ku karhatela ku vulavula na yena hi xikhongelo. (Rom. 8:26) Hambileswo, ‘u nga tshiki ku khongela,’ byela Yehovha swaku u swi lava hintamu ku tlhela u va munganu wa yena. (Rom. 12:12) Andre a vula leswi: “A swi ni yentxa ni titwa nadzu swi tlhela swi ni danisa ku khongela, kambe loko se ni khongelile ni game ni titwa kahle ni tlhela ni rhula.” Loko u nga swi tivi leswi u nga ta swi hlaya loko u khongela, kambisisa swikhongelo leswi nga yentxiwa hi Hosi Davhida nkama a nga tisola, leswi nga ka Tipisalema ndzima 51 ni 65.

Djondza Bibele nkama ni nkama. Ku djondza Bibele swi ta ku pfuna ku tiyisa lipfumelo la wena swi tlhela swi ku pfuna ku kulisa wunghanu la wena na Yehovha. (Pis. 19:7-11) Filipe a te: “Leswi nga ni yentxa ni kwatisa Yehovha, hileswi a ni nga ha djondzi Bibele nkama ni nkama. A ni swi lavi ku tlhela ni kwatisa Yehovha, hi mhaka leyo ni bohe ku yentxa djondzo ya Bibele ya mina noxe”. Na wena u nga yentxa leswi fanaka. Loko u lava ku tiva swilo leswi u nga djondzaka hi swona, u nga kombela ku pfuniwa hi munghanu wa wena lweyi a mu rhandzaka hintamu Yehovha?

Pfuxeta a wunghanu la wena ni vamakwerhu. Van’wana lava nga tlhelela bandleni va pimisa swaku vamakwerhu a va ha va tsakeli. Larissa a vula leswi: “A ni titwa tingana hileswi a ni yentxe vamakwerhu va vaviseka. Naswona ni hete nkama wa wunyingi na ni titwisa xileswo.” Tiyiseka swaku madoda ni vamakwerhu van’wana bandleni, va swi lava hintamu ku ku pfuna leswaku u tlhela u pfuxeta wunghanu la wena na Yehovha. (Vona kwadru leli nge: “I Yini Leswi Madoda Ma Nga Swi Yentxaka?”) Phela va tsake hintamu hileswi u nga tlhelela ka Yehovha, naswona va swi lava hintamu swaku u tsaka! — Swi. 17:17.

I yini leswi nga ku pfunaka swaku u va kusuhi ni bandla? Zama ku va kona ka mintirho hinkwayu leyi vamakwerhu va yi yentxaka, yana ka mintlhanganu hinkwayu vhiki ni vhiki u tlhela u chumayela ni vamakwerhu. Kambe swi ta ku pfunisa ku yini leswo? Felix a te: “Phela a bandla a li swi nyimele hintamu swaku ni tlhelela ka Yehovha. Hi mhaka leyo, vamakwerhu va ni yamukele hi lirhandzu, va ni pfunile swaku ni titwa ni li kaya, ni swi vona swaku ni rivaleliwile ni swaku ni nga tama ni mu tirhela Yehovha.” — Vona kwadru leli nge “U Nga Yentxa Yini?”

U Nga Yentxa Yini?

Khongela, u djondza Bibele u tlhela u tipatsa ni vamakwerhu

Doda leli khongelaka ni makwerhu lweyi a ha ku tlhelelaka ka Yehovha.

MINKAMA HINKWAYU KHONGELA KA YEHOVHA

Byela Yehovha swaku u swi lava hintamu ku va munghanu wa yena. Madoda ma ta ku khongelela ma tlhela ma khongela na wena

Doda li tirhisa buku leli nge “Tshinela Eka Yehovha” swaku li djondza Bibele ni makwerhu lweyi.

DJONDZA BIBELE NKAMA NI NKAMA

Ku djondza Bibele nkama ni nkama swi ta ku pfuna ku kulisa wunghanu la wena na Yehovha

Makwerhu lweyi a bulaka ni vamakwerhu van’wana na va hungata.

PFUXETA A WUNGHANU LA WENA NI VAMAKWERHU

Zama ku tipatsa ni vamakwerhu, yana ka mintlhanganu hinkwayu vhiki ni vhiki u tlhela u chumayela

U NGA GODOLI!

Nkama lowu u zamaka ku pfuxeta wunghanu la wena na Yehovha, Sathana a ta tama a ku tata hi swikarhatu swaku a ku godolisa. (Luk. 4:13) Hi mhaka leyo, tinyimiseli ku tiyisa wunghanu la wena na Yehovha.

Yehovha a ti tshembisa leswi tinyempfu ta ntlhambi wa yena: “Leyi nga lahleka ni ta yi lavetela, leyi nga hambuka ni ta yi vuyisa, leyi nga vavisiwa ni ta yi bohelela, leyi nga hela ntamu ni ta yi tiyisa.” (Ezek. 34:16) Yehovha se a pfune vanhu va vanyingi swaku va tlhela va va ni wunghanu la linene na yena. Se tiyiseka swaku Yehovha a swi lava hintamu ku ku pfuna swaku u pfuxeta u tlhela u tiyisa a wunghanu leli u nga na lona na yena.

I Yini Leswi Madoda Ma Nga Swi Yentxaka?

Doda na li pfuna makwerhu ku pfuxeta yindlo ya yena.

Madoda ma nga yentxa swilo swa swinyingi swaku ma pfuna munhu lweyi a ha ku tlhelelaka bandleni swaku a pfuxeta a wunghanu la yena na Yehovha. Hi leswi swin’wana ma nga swi yentxaka.

Va rhuliseni mbilu. Mupostolo Pawulo a a swi tiva swaku munhu lweyi a nga tlhelela ka Yehovha, a ‘nga ha kwata hintamu a za a godola’. (2 Kor. 2:7) A nga twa tingana a tlhela a hela ntamu. Pawulo a byele bandla swaku munhu wa ku fana ni lweyo, a fanele a ‘rivaleliwa hi mbilu hinkwayu a tlhela a tiyisiwa.’ Munhu lweyi a ha ku tlhelelaka bandleni a fanele a tiyiseka swaku Yehovha ni vamakwerhu va mu rhandza hintamu. Loko madoda minkama hinkwayu ma byela lava va ha ku tlhelelaka bandleni marito lama tiyisaka ma tlhela ma va pfuna, swi ta va vhikela swaku va nga heli ntamu.

Khongelani na vona. “Xikhongelo xa munhu wa ku lulama xa pfuna hintamu.” (Yak. 5:16) Larissa lweyi hi nga bula hi yena ku sunguleni a te: “Ni byele madoda hi ku chava loku a ni li na kona. Ma ni khongelelile ma tlhela ma khongela na mina. Ni swi vonile swaku madoda a ma nga ni kwatelanga, kambe a mo lava ku ni pfuna swaku ni pfuxeta a wunghanu la mina na Yehovha.” Theo a li: “Swikhongelo swa madoda swi ni tiyisekise swaku Yehovha wa ni rhandza hikakunene naswona a vona swa swinene ka mina ku nga li swa ku biha ntsena.”

Vanani vanghanu va vona. Lava va ha ku tlhelelaka ka Yehovha va lava vanghanu bandleni. Makwerhu Justino lweyi a nga doda a li: “I swa lisima ku va vanghanu va vona hi tlhela hi va rhamba swaku hi chumayela na vona naswona i swa lisima hintamu ku va pfuxela makaya ka vona.” Makwerhu Hanry lweyi na yena a nga doda, a li: “Loko vamakwerhu van’wana bandleni va vona swaku madoda ma zama ku va vanghanu va munhu lweyi a nga tlhelela bandleni, na vona va ta lava ku va vanghanu va munhu yelweyo.”

Va pfuneni leswaku va rhandza ku djondza. Munghanu lweyi a nga ni wuxaka la linene na Yehovha a nga pfuna munhu lweyi a ha ku tlhelelaka bandleni swaku a tinyika nkama wa ku djondza. Makwerhu Darko lweyi a nga doda, a li: “Na swi rhandza ku bula ni lava va ha ku tlhelelaka bandleni hi leswi ni nga swi kuma ka djondzo ya mina ya Bibele ni tlhela ni va byela swaku swa ni tsakisa ku djondza Bibele. Naswona minkama yin’wana ni lava tinhlokomhaka leti ni nga bulaka na vona hi tona.” Makwerhu Clayiton lweyi na yena a nga doda, a li: “Ni byela lava ha ku tlhelelaka bandleni leswaku va djondza hi vanhu lava ku vulavuliwaka hi vona ka Bibele, lava na vona a va li ka xiyimu xa ku fana ni xa vona.”

Vanani varisi va vanene. Lava ha ku tlhelelaka bandleni a va fanelanga va vona madoda ma li vayavanyisi, kambe va fanele va vona madoda ma li varisi va vona. (Yer. 23:4) Mi nga hantliseli ku vulavula, kambe zamani ku va yingisela kahle. Tinyikeni nkama wa ku bula na vona. Vona leswi makwerhu Marcos lweyi a nga doda a swi yentxaka loko a yentxa mayendzo ya wurisi. Yena a li: “Hi va djondzela tindzimana ta Bibele naswona hi va tiyisekisa swaku hi tsaka hintamu hileswi va zamaka ku tlhela va va ni wunghanu la linene na Yehovha, hi tlhela hi va byela swaku Yehovha wa tsaka hi leswo. Loko hi gama liyendzo lin’wana ni lin’wana la wurisi, hi gama hi pimisa hi siku lin’wana leli hi nga ta va yendzela hi lona.”

a Mavito man’wana ma txintxiwile ka nhlokomhaka leyi.

    Mabuku ya xiChangana (2003-2025)
    Huma
    Nghena
    • xiChangana (Moçambique)
    • Rhumela
    • Hlawula
    • Copyright © 2025 Watch Tower Bible and Tract Society of Pennsylvania
    • Minawu ya Matirhiselo
    • Nawu wa Xihundla
    • Seta Swa Xihundla
    • JW.ORG
    • Nghena
    Rhumela