Tindlela Ta Ku Yengetela Ntirho Wa Hina Wa Ku Chumayela

LOKO ku fika nkama wa leswaku Yesu a rhuma vadjondzisiwa va yena leswaku va ya chumayela hi Mfumu wa Xikwembu, a te: “Phela ntshovelo i wukulu, kambe vatirhi i vatsongo.” A ku ni ntirho wawukulu lowu a wu fanele wu yendliwa, hi mhaka leyo a tlhele a ku: “Kombelani N’winyi wa ntshovelo swaku a rhumela vatirhi ka ntshovelo wa yena.” (Mat. 9:37, 38) Yesu a byele vadjondzisiwa va yena leswaku va fanele va wu yendlisa ku yini ntirho wa ku chumayela. Phela marito ya yena ma swi kombisile swaku a ntirho lowu a wu li wa xihantla, a te: “N’wana wa munhu a ta fika na mi nge se heta ntirho wa ku chumayela ka madoropa ni swidoropani swa Israyele.” — Mat. 10:23.

² Ninamuntlha ku ni swa swinyingi swa ku swi yendla ka ntirho wa ku chumayela. Mahungu ya Mfumu ma fanele ma chumayeliwa na magamu ma nga se fika naswona nkama lowu wu nga sala i wutsongo! (Mar. 13:10) Tanihi leswi misava yi nga nsimu ya hina hi langutana ni xiyimu xa ku fana ni lexi Yesu ni vadjondzisiwa va yena va nga langutana na xona, kambe ka hina a ntirho i wukulu hintamu. Hi vatsongo loko hi ringanisiwa ni vanhu va vanyingi amisaveni hinkwayu, kambe hi nga tiyiseka swaku Yehovha a ta hi pfuna naswona mahungu ma ta chumayeliwa amisaveni hinkwayu. Hi nkama wawunene lowu Yehovha a nga wu veka, magamu ma ta fika. Ku nga va swaku hi ta rhangisa Mfumu ka wutomi la hina swaku hi yengetela ntirho wa hina wa ku chumayela? Hi swini leswi u nga swi fikelelaka leswaku u hetisisa ntirho lowu?

³ Yesu a swi kombise kahle leswi Yehovha a nyimelaka swaku vanhu va yena va swi yendla. A te: “U fanele u rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu, hi mimpimiso ya wena hinkwayu ni hi matimba ya wena hinkwawu.” (Mar. 12:30) Hi fanele hi tirhela Yehovha hi mbilu ya hina hinkwayu, leswo swi vula swaku hi fanele hi yendla hinkwaswu leswi hi nga swi kotaka ka ntirho wa yena, hi mu komba swaku hi tinyiketelile ka yena hi ku swi rhandza ni swaku ku tinyiketela ka hina ku suka mbilwini. (2 Tm. 2:15) Ku ni mintirho ya yinyingi leyi hinkwerhu hi nga yi yendlaka hi ku ya hi swiyimu swa hina ni hi ku ya hileswi hi kotaka ku swi yendla. Vona mintirho yin’wani leyi u nga yi yendlaka u gama u tikambela ku vona swaku hi wini wa kona lowu u nga tikarhatelaka ku wu fikelela ka ntirho wa Yehovha.

KU VA MUCHUMAYELI ABANDLENI

⁴ Hinkwavu lava va yamukelaka ntiyiso va ni nkateko wa ku chumayela mahungu ya ku tsakisa. Phela lowo i ntirho wa lisima swinene lowu Yesu Kreste a nga wu nyika vadjondzisiwa va yena. (Mat. 24:14; 28:19, 20) Hi ntolovelo mudjondzisiwa wa Yesu a sungula ku chumayela mahungu ya ku tsakisa loko a sungula ku ma twa. Phela hi leswo swi nga yendliwa hi Andre, Filipi, Korneliyo ni vanhu van’wani. (Yoh. 1:40, 41, 43-45; Min. 10:1, 2, 24; 16:14, 15, 25-34) Indjhe leswo swi vula swaku munhu a nga sungula ku chumayela mahungu ya ku tsakisa hambiloko a nga se tsakamisiwa? Ina a nga swi yendla leswo! Loko munhu a pfumeleliwa ku va muchumayeli lweyi a kalaka a nga tsakamisiwanga a va ni lunghelo la ku chumayela mahungu ya ku tsakisa hi munti ni munti. Naswona hi ku ya hi leswi a kotaka ku swi yendla ni hi swiyimu swa yena a nga ha chumayela hi tindlela tin’wani.

⁵ Loko muchumayeli se a tsakamisiwile, ha tiyiseka swaku a swi navela hintamu ku pfuna van’wani swaku va tiva mahungu ya ku tsakisa. Vavanuna ni vavasati va ni nkateko wa ku va kona ka ntirho wa ku chumayela. I nkateko hintamu ka hina ku hlangamela ka ntirho wa ku chumayela mahungu ya ku tsakisa ya Mfumu. Loko hi wu tirhisa kahle mukhandlu lowu nhlengeletanu wu hi nyikaka wona leswaku hi yendla swa swinyingi ka ntirho wa ku chumayela, hi ta va ni ntsaku wawukulu.

KU TIRHA LANI KU NGA NI XILAVEKO XAXIKULU

⁶ Swi nga yendleka teritoriyu la bandla la wena li tirhiwa nkama ni nkama naswona mahungu ya Mfumu ma chumayeliwa. Ka xiyimu lexo, swi nga yendleka u pimisa swaku u nga yengetela ntirho wa wena hi ku rhurha u ya lomu ku nga ni xilaveko. (Min. 16:9) Loko u li doda kumbe mupfunisi wa bandla swi nga yendleka ku ni bandla la ku karhi leli u nga pfunisaka ka lona. Mudjikelezi wa sirkwitu la wena a nga ku nyika mavonelo ya leswi u nga swi yendlaka swaku u pfunisa ka bandla lin’wani la sirkwitu lolelo. Loko u lava ku pfunisa ka tiko lin’wani, Betele li nga ku nyika rungula leli nga ku pfunaka.

⁷ Wa swi lava ku ya tirha ka tiko lin’wani? Loko u swi lava u fanele u swi pimisa kahle leswi swi lavekaka swaku u rhurha. Swi ngo yini u bula ni madoda ya bandla la wena? Phela a ku rhurha a hi matlangwana hikusa swi nga khumba wena ni lweyi u nga ta rhurha na yena. (Luk. 14:28) Kambe loko u nga lavi ku ya tirha nkama wa ku leha, swi nga va swinene u tirha ka ndhawu yin’wani ka tiko la wena.

⁸ Ka matiko man’wani vamakwerhu lava va nyikiwaka mintirho ya ku rhangela abandleni va ha li ku tsakamisiwa. Se vamakwerhu va bandla lolelo lava va tivekaka hansi a va yali loko madoda lawa se ma nga ni xiperiyensiya ma ya ka bandla la vona leswaku ma rhangela. Kambe loko u li doda naswona u lava ku rhurha u ya ka tiko lin’wani leli nga ka xiyimu xa ku tshamisa xileswo, khumbuka leswaku a ntirho wa wena a hi ku wutlela vamakwerhu ntirho kambe i ku tirha xikan’we na vona. Kutxa vamakwerhu swaku va lwela ku fikelela mintirho abandleni va tlhela va yamukela swiyavelo leswi va nyikiwaka swona. (1 Tm. 3:1) Va lehiseli mbilu loko minchumu yi nga yendliwi hi ndlela leyi yi yendliwaka hi yona ka tiko la wena. Tirhisa xiperiyensiya xa wena xa ku va doda swaku u va pfuna. Loko u yendla leswo, hambiloko siku lin’wani swi lava u tlhela u ya ka tiko la wena, madoda lawa u nga ta ma siya abandleni ma ta va se ma li ka xiyimu xa kahle xa ku hlayisa bandla.

⁹ Na Betele li nga se rhumela mavito ya mabandla lawa u nga yaka u ya pfunisa ka wona, a Comissão la Ntirho wa Bandla la wena li fanele li tsala karta la swibumabumelo, ku nga karta leli vulavulaka hi wena li tlhela li ku pfumelela ku yendla mintirho yin’wani. Karta leli la laveka hambiloko se u tirha tanihi doda, mupfunisi wa bandla, mupfuli wa ndlela kumbe u li muchumayeli. A Comissão la Ntirho li ta rhumela karta lolelo ni xikombelo xa wena ka betele la tiko leli u lavaka ku ya pfunisa ka lona.

KU CHUMAYELA HI LIRIMI LIN’WANI

¹⁰ Leswaku u yengetela ntirho wa wena wa ku chumayela, swi nga yendleka swi lava u djondza lirimi lin’wani, leswo swi patsa lirimi la mavoko. Loko ku li swaku u lava ku chumayela hi lirimi lin’wani, swi ngo yini u vulavula ni madoda ni mudjikelezi wa sirkwitu? Swi nga yendleka vona va ku byela leswi u nga swi yendlaka ni ku tlhela va ku tiyisa. Hi ku landza nkongomiso wa betele, masirkwitu man’wani ma nga ha yendla malulamiselo leswaku vachumayeli ni vapfuli va ndlela va va ni ma aula lawa ma nga ta va pfuna swaku va ya chumayela hi lirimi lin’wani.

KU VA MUPFULI WA NDLELA

¹¹ Vachumayeli hinkwavu va fanele va tiva leswi lavekaka swaku va va vapfuli va ndlela va ku pfunisa, va nkama hinkwawu kumbe va ku hlawuleka ku patsa ni mintirho yin’wani ya nkama hinkwawu. Mupfuli wa ndlela a fanele a li Mukreste lweyi a nga tsakamisiwa a tlhela a li xikombiso, naswona swiyimu swi fanele swi mu pfumelela swaku a nyikela mawora lawa ma lavekaka ka ntirho wa ku chumayela mahungu ya ku tsakisa. A Comissão la Ntirho hi lona li pfumelelaka ma petição ya vapfuli va ndlela va ku pfunisa ni va nkama hinkwawu naswona vapfuli va ndlela va ku hlawuleka va pfumeleliwa hi betele.

¹² Vapfuli va ndlela va ku pfunisa va nga tirha ku ringana wheti yin’we, tiwheti ta tinyingi ta ku landzelelana kumbe va tirha hi nkama wa ku kala wu nga pimiwanga hi ku ya hi swiyimu swa vona. Vachumayeli va vanyingi va rhandza ku va vapfuli va ndlela va ku pfunisa hi minkama ya ku hlawuleka ya ku fana ni nkama wa Xitsundzuxu kumbe hi wheti leyi va pfuxeliwaka hi mudjikelezi. Van’wani va swi vona swi yampsa ku va vapfuli va ndlela va ku pfunisa loko va kuma maferiya antirhweni. Vachumayeli lava va nga tsakamisiwa naswona va ha yaka xikola va nga va vapfuli va ndlela va ku pfunisa loko va huma maferiya. Ka tiwheti ta Março ni Abril ni wheti leyi bandla li pfuxeliwaka hi mudjikelezi, vachumayeli va nga va vapfuli va ndlela va ku pfunisa na va nyikela mawora yamatsongo. Ku nga na mhaka swaku hi swihi swiyimu swa wena, loko u ni mahanyelo yamanene, u swi vona swaku u nga swi kota ku fikelela mawora lawa ma laviwaka ku ringana wheti yin’we kumbe ku tlula, madoda ma ta swi tsakela ku kambela petição la wena ku vona swaku wa faneleka kumbe a wu faneleki ku va mupfuli wa ndlela.

¹³ Leswaku u faneleka ku va mupfuli wa ndlela wa nkama hinkwawu, u fanele u swi kota ku fikelela mawora lawa ma lavekaka hi lembe. Loko u va mupfuli wa ndlela wa nkama hinkwawu u fanele u tirhisana kahle ni bandla la wena. Phela vapfuli va ndlela lava va hisekaka i nkateko wawukulu ka bandla la vona naswona va yendla swaku vanyingi va swi tsakela hintamu ku chumayela mahungu ya ku tsakisa. Naswona swi nga tlhela swi yendla swaku van’wani va navela ku nghenela ka ntirho wa ku va mupfuli wa ndlela wa nkama hinkwawu. Kambe na u nge se va mupfuli wa ndlela wa nkama hinkwawu u fanele u va muchumayeli lweyi a nga xikombiso xa kahle naswona u ni 6 wa tiwheti na wu tsakamisiwile.

¹⁴ Minkama yinyingi vapfuli va ndlela va ku hlawuleka va langiwa ka vapfuli va ndlela va nkama hinkwawu lava va wu yendlaka kahle ntirho wa ku chumayela. Va fanele va lunghekela ku ya tirha lomu betele li va rhumelaka kona. Hi ntolovelo va rhumeliwa ka teritoriyu leli kalaka li nga se tirhiwa lani va nga kumaka vanhu lava tsakelaka swaku ku sunguliwa mabandla. Minkama yin’wani vapfuli va ndlela va ku hlawuleka va yaveliwa ka mabandla lawa ma lavaka ku pfuniwa swaku ma fikelela teritoriyu hinkwalu. Vapfuli va ndlela van’wani va ku hlawuleka lava va nga madoda va yaveliwa swaku va ya pfunisa ka mabandla yamatsongo hambiloko ku nga na xilaveko xa vatirhi van’wani ka teritoriyu la vona. Vapfuli va ndlela va ku hlawuleka va nyikiwa malenyana swaku va tihlayisa. Van’wani va yaveliwa swaku va tirha hi nkama wawutsongo.

VAMISIYONARIYU

¹⁵ A Comissão la Ntirho la Ntlawa Lowu Rhangelaka li pfumelela vamakwerhu leswaku va va vamisiyonariyu naswona a Comissão la Betele la tiko leli va nga ta tirha ka lona, hi lona li va kongomisaka swaku va ta ya tirha kwini. Naswona hi ntolovelo va ya tirha lani ku tshamaka vanhu va vanyingi. Vamisiyonariyu va pfuna swinene leswaku mabandla ma tiya naswona va yendla swa swinyingi ka ntirho wa ku chumayela. Hi ntolovelo vamisiyonariyu va kuma trenamentu ka Xikola xa Vachumayeli va Mfumu. Va laveliwa ndhawu ya ku tshama va tlhela va pfuniwa hi malenyana swaku va tihlayisa.

VADJIKELEZI VA SIRKWITU

¹⁶ Vadjikelezi va sirkwitu va langiwa hi Ntlawa Lowu Rhangelaka. Vamakwerhu lava, va yamukela trenamentu naswona va kuma xiperiyensiya hi ku rhanga hi ku tirha tanihi vadjikelezi va sirkwitu va ku pfaleta. Va wu nyika lisima hintamu ntirho wa ku chumayela naswona va va rhandza hintamu vamakwerhu. I vapfuli va ndlela va ku hiseka, vadjondzi va ku hiseka va Rito la Xikwembu naswona i va veki va kahle va madixkursu ni vadjondzisi va kahle. Va yi kombisa kahle mihandzu ya moya wa ku kwetsima naswona mahanyelo ya vona ma kombisa swaku va pimisela van’wani naswona va ni ku twisisa. Loko mudjikelezi a chadile, nsati wa yena a tirha tanihi hi mupfuli wa ndlela naswona a ni mahanyelo yamanene ni lawa ma nga xikombiso. A hanyisana kahle ni van’wani naswona i muchumayeli wa kahle. A hlonipha wuhosi la Yehovha ni wunhloko la nuna wa yena, a nga tiyendli ingi i mudjikelezi loko a vulavula ni vanhu van’wani naswona a nga rhangeli ka mabulu. Mudjikelezi ni nsati wa yena va tshama na va khomekile. Hi mhaka leyo, lava va tsakelaka ku nghenela ka ntirho lowu va fanele va li ni lihanyu la kahle. Vapfuli va ndlela a va tsali ma petição ya ku va vadjikelezi, va nga ha bula ni mudjikelezi swaku va tsakela ku va vadjikelezi, se yena a va byela leswi va nga swi yendlaka.

SWIKOLA SWA NHLENGELETANU

¹⁷ Xikola xa Vachumayeli va Mfumu: Vachumayeli va Mfumu va laveka hintamu swinene leswaku ku fikeleliwa materitoriyu lawa ma kalaka ma nga tirhiwi hintamu ku tlhela ku pfuniwa vamakwerhu amabandleni. Hi mhaka leyo, vamakwerhu va xinuna kumbe va xisati lava va kalaka va nga chadanga kumbe lava va nga chada va nga prenxera petição leswaku va ya ka Xikola xa Vachumayeli va Mfumu. Loko xikola se xi helile, va nga rhumeliwa swaku va va vapfuli va ndlela va nkama hinkwawu lani ku nga ni xilaveko ka tiko la vona. Kambe minkama yin’wani lava va tinyiketelaka va nga nyikiwa mintirho yin’wani ka tiko la vona kumbe ka tiko lin’wani. Van’wanyani va nga ha rhumeliwa leswaku va va vapfuli va ndlela va ku hlawuleka va nkamanyana kumbe va nkama lowu kalaka wu nga pimiwanga. Vapfuli va ndlela lava lavaka ku ya ka Xikola xa Vachumayeli va Mfumu va nga tiva leswi va nga swi yendlaka hi ku va kona ka ntlhanganu lowu yendliwaka ka kongresu.

¹⁸ Xikola xa Bibele xa Jiliyadi: Vamakwerhu va xisati ni va xinuna va ku kala va nga chadanga kumbe lava va nga chada va langiwa leswaku va ya ka xikola lexi, naswona va fanele va khuluma Xinghiza funtshi va fanele va li ka ntirho wa nkama hinkwawu wa ku hlawuleka. Vamakwerhu lava va nga swi kota ku pfunisa swinene ka ntirho wa ku chumayela naswona va nga pfunisa swinene ka ntirho wa Betele. Vamakwerhu lava, se va swi kombisile swaku va swi navela ku tirhela vamakwerhu naswona va nga pfuna van’wani swaku va djondza va tlhela va landzelela nkongomiso wa Bibele ni wa nhlengeletanu. Vamakwerhu lava va fanelekaka swaku va ya ka xikola lexi, va nga nyikiwa petição hi Comissão la Betele swaku va li prenxera. Lava va yaka ka xikola lexi va yaveliwa leswaku va ya tirha ansin’wini kumbe va ya tirha abetele la tiko lin’wani kumbe ka tiko la vona.

NTIRHO WA BETELE

¹⁹ Ku tirha Betele i nkateko wa ku hlawuleka. Rito leli nge Betele li vula “Yindlo ya Xikwembu”, vito leli la fanela hi mhaka ya mintirho leyi yendliwaka ka ndhawu yoleyo. Vamakwerhu va xinuna ni va xisati lava va tirhaka Betele va yendla mintirho leyi fambelanaka ni ku hamba mabuku, ku ma hundzuluxela ni ku ma rhumela ka vamakwerhu. Ntirho lowu i wa lisima hintamu ka Ntlawa Lowu Rhangelaka lowu vonelelaka ni ku nyikela nkongomiso amabandleni amisaveni hinkwayu. Vamakwerhu va ku tala lava va tirhaka Betele tanihi vahundzuluxeli, va tirha na va tshama ka teritoriyu la Betele leli ku vulavuliwaka lirimi leli va li hundzuluxelaka. Leswo swi yendla swaku va twa lirimi leli vulavuliwaka siku ni siku naswona va nga swi kota ku kambela swaku vanhu va swi twisisa ke leswi va swi hundzuluxelaka ka mabuku.

²⁰ Mintirho ya yinyingi leyi yendliwaka Betele yi lava ntamu. Hi mhaka leyo, ku tala ka vamakwerhu lava va vitaniwaka swaku va ya tirha Betele, i majovhem lawa ma nga tinyiketela ma tlhela ma tsakamisiwa, lawa ma nga ni lihanyu la kahle ma tlhela ma ni ntamu. Se loko ku li leswaku wena wa swi lava ku tirha Betele, u nga tiva swin’wani leswi lavekaka swaku u ya tirha loko u bula ni madoda ya bandla la wena.

NTIRHO WA KU YAKA

²¹ Ku yakiwa ka tiyindlo leti tirhisiwaka swaku ku gandzeliwa Yehovha i ntirho wa ku kwetsima hilani a swi li hi kona nkama ku nga yakiwa a tempele ya Solomoni. (1 Tih. 8:13-18) Vamakwerhu va vanyingi va xinuna ni va xisati va wu hisekela swinene ntirho lowu wa ku yaka hi ku yendla hinkwaswu leswi va nga swi kotaka ni ku nyikela hi leswi va nga na swona swaku va seketela ntirho lowu.

²² Indjhe na wena u nga swi kota ku pfunisa ka ntirho wa ku yaka? Loko u li muchumayeli lweyi a nga tsakamisiwa naswona u swi navela ku nghenela ntirho wa ku yaka, vamakwerhu lava va vonelelaka ntirho lowu lomu u tshamaka kona va ta swi tsakela swinene ku ku pfuna, naswona va tinyimisele ku ku trenara swaku u yendla ntirho lowu hambiloko u nga na xiperiyensiya. Swi ngo yini u bula ni madoda ya lomu u tshamaka kona u ma tlhamusela swaku wa swi navela ku nghenela ntirho wa ku yaka? Vachumayeli van’wani lava va nga tsakamisiwa lava va fanelekaka, va wu nghenela ntirho lowu naswona va tinyimiselile ku yaka tindhawu ta nhlengeletanu hambi hi ka matiko man’wani.

²³ Ku ni swa swinyingi swa ku swi yendla ka ntirho wa ku yaka. Vachumayeli lava va nga tsakamisiwa lava va nga swikombiso swaswinene naswona va kotaka ku yendla ntirho wa ku karhi, lava swiyimu swa vona swi va pfumelelaka ku seketela a projetu la ku yaka ka ndhawu leyi va tshamaka ka yona, va nga tirha tanihi vavhuluntariyu va LDC (ku nga Departamento Local de Projeto/Construção). Van’wani va nga pfunisa ka tindhawu ta le kule hi nkama lowu pimiweke naswona Betele li va veka swaku va tirha tanihi vavhuluntariyu va ku yaka ku ringana mavhiki mambirhi ku ya ka tiwheti tinharhu. Lava va vekiwaka leswaku va tirha nkama wa ku leha va vitaniwa vatirhi va ku yaka. Vatirhi va ku yaka lava va yaveliwaka ku ya tirha ka matiko man’wani va vitaniwa vatirhi va ku yaka lava taka hi ka tiko lin’wani. Projetu lin’wani ni lin’wani la ku yaka li rhangeliwa hi Ntlawa wa Vamakwerhu va ku Yaka. Ntlawa lowu wu vumbiwa hi vatirhi va ku yaka va LDC. Vamakwerhu lava va pfuniwa hi vavhuluntariyu va LDC ni vavhuluntariyu va mabandla lawa va yakaka ka wona. Ntlawa wa ku yaka wu txintxatxintxa tindhawu leti wu yakaka ka tona ndzeni ka teritoriyu la Betele.

HI YINI MINTIRHO LEYI U LAVAKA KU MU YENDLELA YONA YEHOVHA?

²⁴ Loko se u tinyiketelile ka Yehovha, ha tiyiseka swaku u swi lava hintamu ku mu tirhela wutomi la wena hinkwalu. Kambe hi yini mintirho leyi u lavaka ku mu yendlela yona Yehovha? Ku tivekela mintirho swi ta ku pfuna kuva u tirhisa ntamu wa wena ni swilo swa wena hi wutlharhi. (1 Ko. 9:26) Ku tivekela mintirho leyi u lavaka ku yi fikelela swi ta ku yendla u kulisa wunghanu la wena na Yehovha naswona swi ta ku pfuna akuva u rhangisa swilo swa lisima hintamu ka wutomi la wena nkama u tikarhatelaka ku fikelela mintirho leyi u yi lavaka. — Filp. 1:10; 1 Tm. 4:15, 16.

²⁵ Mupostolo Pawulo i xikombiso xaxinene lexi hi nga xi tekelelaka ka ntirho lowu hi wu yendlelaka Yehovha. (1 Ko. 11:1) Yena a yendle hinkwaswu leswi a nga swi kotaka ka ntirho wa Yehovha. A a swi tiva swaku Yehovha a a mu pfulele swipfalu swa swinyingi. A va tsalele leswi vamakwerhu va le Korinto: “Xikwembu xi ni pfulele xipfalu xaxikulu swaku ni yendla ntirho wa Hosi.” Indjhe na hina a hi titwi hi ndlela leyi fanaka? Ku ni swipfalu swa swinyingi swi nga pfuleka swaku hi tirhela Yehovha xikan’we ni bandla ngopfungopfu ka ntirho wa ku chumayela mahungu ya ku tsakisa ya Mfumu wa Xikwembu. Kambe ku fana na Pawulo, na hina nkama hi nghenaka hi “xipfalu xaxikulu” hi nga ha kumana ni “valala va vanyingi.” (1 Ko. 16:9) Kambe Pawulo a a tinyimisele ku titsona swin’wani. Hi yona mhaka a nga vula leswi: “Ni ba muzimbha wa mina ni wu yendla wu va xikarawa.” (1 Ko. 9:24-27) Na hina hi fanele hi tinyimisela ku yendla leswi fanaka.

²⁶ Mun’wani ni mun’wani wa hina a kutxiwa ku tivekela mintirho leyi a nga kotaka ku yi fikelela hi ku fambelana ni swiyimu swa yena. Vanyingi namuntlha va ka ntirho wo karhi wa nkama hinkwawu hi mhaka ya leswi va nga tivekela mintirho leyi va lavaka ku yi fikelela na va ha li vatsongo. Loko va ha li vatsongo, va kutxiwile hi vapsali va vona ni hi vamakwerhu van’wani swaku va yendla leswo. Hi mhaka leyo, namuntlha va tirhela Yehovha na va tsakile naswona a va tisoli. (Swiv. 10:22) Ku ni mintirho yin’wani ya lisima ya ku fana ni ku va kona ka ntirho wa ku chumayela vhiki ni vhiki, ku sungula swidjondzo swa Bibele ni ku tlhela hi swi fambisa kumbe ku tinyika nkama wa ku yenela swaku hi lunghiselela mintlhanganu. Xa lisima i ku tshama hi tiyile naswona hi yendla leswi hi nga swi kotaka ka ntirho wa ku chumayela. Loko hi yendla leswo, hi ta dzunisa Yehovha naswona hi ta fikelela nchumu wa lisima hintamu, ku nga ku mu tirhela hi masiku ni masiku. — Luk. 13:24; 1 Tm. 4:7b, 8.