Twisisa U Tlhela U Yamukela Ntirho Lowu Xikwembu Xi Nga Wu Nyika Yesu

“A KU sunguleni Xikwembu xi tumbuluxe tilo ni misava,” naswona swilo hinkwaswu leswi xi nga swi yendla a swi “saseke ngopfu.” (Gen. 1:1, 31) Yehovha a yendle vanhu leswaku va va ni wutomi la ku tsakisa la ku kala li nga heli. Kambe, xidjoho xa Adamu na Evha a jardim la Edeni xi yendle swaku xikongomelo lexo xi nga hetiseki. Kambe leswo a swi vuli swona swaku xikongomelo xa Xikwembu hi misava ni vanhu xi txintxile. Xikwembu xi vule swaku a xi ta ponisa vana va Adamu lava yingisaka. Vanhu lava, a va ta tlhela va tirhela Xikwembu hi ndlela ya ntiyiso naswona Xikwembu a xi ta helisa va ku biha ni mintirho ya vona. (Gen. 3:15) A swilo a swi ta tlhela swi “saseka ngopfu.” Yehovha a a ta yendla leswo hi ku tirhisa N’wana wa yena Yesu Kreste. (1 Yo. 3:8) Hi mhaka leyo, hi fanele hi wu twisisa ntirho lowu Yesu a nga nyikiwa wona hi Xikwembu. — Min. 4:12; Filp. 2:9, 11.

HI WINI NTIRHO WA KRESTE

² Loko hi pimisa hi ntirho lowu Kreste a nga nyikiwa wona hi Xikwembu, hi fanele hi khumbuka swaku ka ntirho wolowo ku ni swilo swa swinyingi leswi Yesu a nga ta swi yendla. Yesu i Muponisi wa vanhu, i Muprista Wamukulu, i Nhloko ya bandla la Wukreste naswona swoswi i Hosi ya Mfumu wa Xikwembu. Ku pimisa hi mintirho leyi swi hi yendla hi ma khensa hintamu malulamiselo hinkwawu lawa Xikwembu xi nga ma yendla hi tlhela hi mu rhandza swinene Yesu Kreste. Bibele li hi tlhamusela mintirho yin’wani leyi Yesu a yi yendlaka.

³ Nkama lowu Yesu na a li lani misaveni a swi kombise kahle swaku vanhu lava a va yingisa, a va ta tlhela va va ni wunghanu lalinene ni Xikwembu hi mhaka ya yena. (Yoh. 14:6) Leswi a nga Muponisi wa vanhu hinkwavu a nyikele hi wutomi la yena leswaku a kutsula va ku tala. (Mat. 20:28) Se leswo swi kombisa swaku Yesu a ngo va xikombiso xaxinene xa ku va ni mahanyelo lama tsakisaka Xikwembu ntsena, kambe i munhu wa lisima swinene lweyi Xikwembu xi mu tirhisaka swaku xi hetisisa leswi xi swi lavaka hi vanhu. Hi yena ntsena lweyi a hi pfunaka swaku hi tlhela hi va vanghanu va Yehovha. (Min. 5:31; 2 Ko. 5:18, 19) Nkutsulu lowu a nga wu nyikela, ni leswi a nga pfuxiwa swi pfule ndlela leswaku vanhu lava yingisaka va kuma minkateko ya Xikwembu hansi ka Mfumu wa Xona.

⁴ Leswi a nga Muprista Wamukulu, Yesu “a nge tsandzeki ku hi twela wusiwana ka ku tsana ka hina” naswona a hi kombelela ka Xikwembu leswaku xi hi rivalela swidjoho swa hina. Mupostolo Pawulo a tlhamusele leswi: “Hikusa muprista wamukulu lweyi hi nga na yena a nge tsandzeki ku hi twela wusiwana ka ku tsana ka hina, hikusa a ringiwile hi tindlela hinkwatu ku fana na hina kambe a nga djohanga.” Hi ku landzela, Pawulo a kutxe Vakreste swaku va kombisa lipfumelo ka Yesu Kreste naswona va li londzovota kahle a lunghiselelo leli li va pfunaka swaku va tlhela va va vanghanu va Xikwembu, hi ku vula leswi: “A hi tshineleni kusuhi ni xitshamu xa wuhosi xa timpsalu tatikulu naswona hi khongela ka Xikwembu na hi chunsekile, leswaku hi ta kuma wunene ni timpsalu tatikulu, leswi nga ta hi pfuna loko hi lava ku pfuniwa.” — Heb. 4:14-16; 1 Yo. 2:2.

⁵ Yesu i Nhloko ya bandla la Wukreste. Ku fana ni ka minkama ya vapostolo, valandzeli va Yesu a va nga na murhangeli, se na hina namuntlha a hi na murhangeli lweyi a nga munhu. Yesu a nyikela minkongomiso hi ku tirhisa moya wa ku kwetsima ni madoda lawa ma nga langiwa, lawa ma nga ta tihlamulela ka yena ni ka Papayi wa yena hileswi va li khomisaka xiswona bandla. (Heb. 13:17; 1 Pe. 5:2, 3) Loko Yehovha a vulavula hi Yesu a vule leswi: “Phela ni mu yendle fakazi ka matiko, Murhangeli ni hosi ya matiko.” (Esa. 55:4) Yesu a tiyisekise wuprofeta leli nkama a nga byela vadjondzisiwa va yena a ku: “Mi nga vitaniwi varhangeli, hikusa Murhangeli wa n’wina i mun’we ntsena, ku nga Kreste.” — Mat. 23:10.

⁶ Yesu i munene naswona wa tiveka hansi a tlhela a lava ku hi pfuna. Leswo swa tikomba hi xirhambu lexi a nga xi yendla nkama a nga ku: “Tanani ka mina, n’wina hinkwenu lava nga karhala, ni lava tikeliwaka, ni ta mi pepisa. Tanani mi ta tirha na mina mi tlhela mi djondza ka mina, hikusa ni rhulile naswona ni ni mbilu ya ku tiveka hansi, kutani mi ta pepa. Hikusa swa vevuka ku tirha na mina naswona ni ndzhwalu wa mina a wu tiki.” (Mat. 11:28-30) Yesu Kreste a kongomisa bandla la Wukreste hi ndlela yayinene ni hi ndlela leyi yendlaka leswaku hi pepa. Leswo swi kombisa swaku yena i “murisi wamunene” naswona a tekelela xikombiso xa Papayi wa yena wa le matilweni, Yehovha Xikwembu. — Yoh. 10:11; Esa. 40:11.

⁷ Ka karta la ku sungula leli mupostolo Pawulo a nga li tsalela bandla la Korinto, a tlhamusele ntirho wun’wani lowu Yesu a nga na wona. A te: “A fanele a va hosi anze Xikwembu xi hlula valala va yena hinkwavu. Kambe loko swilo hinkwaswu se swi vekiwile hansi ka yena, N’wana na yena a ta tiveka hansi ka Lweyi a nga veka swilo hinkwaswu hansi ka yena, leswaku Xikwembu xi va swilo hinkwaswu ka vanhu hinkwavu.” (1 Ko. 15:25, 28) Na Yesu a nge se ta lani misaveni, a a li “mutirhi wa kahle swinene” wa Xikwembu naswona a ve matevula ya swilo hinkwaswu. (Swiv. 8:22-31) Nkama Xikwembu xi nga rhumela Yesu leswaku a ta lani misaveni, yena a yendle hinkwaswu leswi Xikwembu xi nga mu rhuma swona ka swiyimu hinkwaswu. A tiyisele ndzingo wawukulu ku tlula hinkwayu, a tlhela a fa na a tshembekile ka Papayi wa yena. (Yoh. 4:34; 15:10) Leswi N’wana wa Xikwembu a nga tshembeka anze a ya fa, Yehovha a mu pfuxile swaku a ya hanya tilweni a tlhela a mu nyika mfanelo ya ku fuma ka Mfumu wa Yena. (Min. 2:32-36) Leswi a nga Hosi, Yesu a nyikiwe a ntirho wa ku rhangela tintsumi leswaku va helisa mimfumu ya vanhu va tlhela va helisa a wubihi hinkwalu leli nga lani misaveni. (Swiv. 2:21, 22; 2 Tes. 1:6-9; Nhl. 19:11-21; 20:1-3) Hi mhaka leyo, a Mfumu wa Xikwembu lowu Hosi ya kona ku nga Yesu Kreste, hi wona ntsena lowu nga ta fuma misava hinkwayu. — Nhl. 11:15.

LESWI SWI VULAKA SWONA KU YAMUKELA NTIRHO LOWU YESU KRESTE A NGA NA WONA

⁸ Phela Yesu Kreste i Xikombiso xa kahle ka hina naswona a hetisekile. A yamukele ntirho wa leswaku a hi hlayisa. Leswaku Yesu Kreste a hi hlayisa ni ku hi vhikela hi ndlela ya lirhandzu, hi fanele hi tama hi tshembeka ka Yehovha hi tlhela hi longoloka ni nhlengeletanu ya Yena.

⁹ Valandzeli va Yesu va minkama ya vapostolo, a va wu twisisa hi ku helela ntirho lowu Yesu a a nyikiwe wona hi Xikwembu. Va swi kombisile leswo hi ku tirha swin’we hi ku twanana hi ku landza nkongomiso lowu a va nyikiwa wona hi ku tirhisa moya wa ku kwetsima. (Min. 15:12-21) Mupostolo Pawulo a vule leswi hi ku twanana loku Vakreste lava totiweke a va li na kona: “Hi fanele hi vulavula ntiyiso hi tlhela hi rhandzana, leswaku hi ta va vanhu va ku wupfa ka swilo hinkwaswu, leswaku hi ta hanya hi ku pfumelelana na Kreste lweyi a nga nhloko. Muzimbha hinkwawu wu tlhanganisiwa hi yena, naswona swirho hinkwaswu swa muzimbha swa tirhisana swaku swi yendla leswi lavekaka. Loko xirho xin’wani ni xin’wani xi tirha kahle, muzimbha hinkwawu wa kula na wu tiyaka hi lirhandzu.” — Efe. 4:15, 16.

¹⁰ Loko hinkwavu abandleni va tirhisana kahle hi ku landza nkongomiso wa Kreste, wunghanu la vona na Yehovha li ta ya li tiya, naswona va rhandzana hikusa “lirhandzu li yendla swaku vanhu hinkwavu va twanana hi ku helela.” — Yoh. 10:16; Kol. 3:14; 1 Ko. 12:14-26.

¹¹ Swilo leswi swi humelelaka lani misaveni leswi swi hetisisaka wuprofeta la Bibele, swi kombisa swaku Yesu Kreste a sungule ku fuma hi 1914. Swoswi wa fuma a xikarhi ka valala va yena. (Ps. 2:1-12; 110:1, 2) Se ku va Yesu a sungule ku fuma swi vula yini ka lava va nga lani misaveni? Swi vula swaku ku nga li khale, tanihi Hosi ya tihosi ni Mufumi wa vafumi, a ta helisa valala va yena lava va nga lani misaveni. (Nhl. 11:15; 12:10; 19:16) Se a xitshembiso lexi Yehovha a nga xi yendla nkama Adamu na Evha va nga tshika ku mu yingisa xi ta hetiseka leswaku ku pfuneka lava va nga ka tlhelo la xinene la Yesu ni lava va tsakeliwaka hi yena. (Mat. 25:34) Swa hi tsakisa ku twisisa ni ku yamukela ntirho lowu Yesu Kreste a nga nyikiwa wona hi Xikwembu! Ka masiku lawa ya wugamu hi lava ku tama hi yendla ku rhandza ka Xikwembu na hi tirhisana xikan’we ni vamakwerhu na hi tiveka hansi ka nkongomiso wa Kreste.