Ku Pfunisa Ka Mintirho Leyi Yendliwaka Hi Nhlengeletanu Amisaveni Hinkwayu

LESWAKU ku hetiseka leswi Yesu a nga swi vula mayelana ni masiku ya magamu, Timboni ta Yehovha ti rhangisa ntirho wa ku chumayela mahungu ya ku tsakisa “anze magamu ya misava.” (Min. 1:8; Mat. 24:14) Leswaku leswo swi yendleka, va tirhisa nkama wa vona ni ntamu wa vona hi ku swi rhandza leswaku va byela van’wani mahungu ya ku tsakisa. Leswi va kholwaka swaku Yehovha a ta va hlayisa vanhu va yena, va tama va rhangisa Mfumu ka wutomi la vona. (Mat. 6:25-34; 1 Ko. 3:5-9) Leswo swi kombisa swaku Yehovha wa va katekisa a tlhela a va yamukela vanhu va yena.

KU PFUNISA KA MINTIRHO LEYI YENDLIWAKA AMISAVENI HINKWAYU

² Nkama lowu vanhu va hi vonaka na hi nyikela Mabibele ni mabuku man’wani mahala, va tivutisa leswi: “Swi kotekisa ku yini leswo?” I ntiyiso swaku leswaku ku yendliwa Mabibele ni mabuku man’wani swi lava male. Ku laveka male ya yinyingi leswaku ku yakiwa ni ku hlayisa Mabetele leswaku vamakwerhu va tama va tirha hi michini ya ku yendla mabuku ni ku vonelela ntirho wa ku chumayela, yi tlhela yi tirhisiwa ka mintirho yin’wani leswaku ntirho wa ku chumayela wu tama wu ya mahlweni. Handle ka leswo, vadjikelezi va sirkwitu, vamisiyonariyu vapfuli va ndlela va ku hlawuleka ni van’wani lava nga ka ntirho wa nkama hinkwawu wa ku hlawuleka, va nyikiwa malenyana swaku va tihlayisa leswaku va tama va yendla ntirho wa vona. Swa tikomba swaku leswaku ntirho wa ku chumayela wu tama wu kula lomu hi tshamaka kona ni ka misava hinkwayu swi lava male ya yinyingi. Kasi male yoleyo hinkwayu yi ta hi kwini?

³ Vanhu va vanyingi va wu tlangela ntirho wa ku djondzisa Bibele lowu yendliwaka hi Timboni ta Yehovha, naswona va rhandza ku pfunisa ka ntirho wa misava hinkwayu, kambe ntirho lowu wu pfunisiwa ngopfungopfu hi Timboni ta Yehovha naswona van’wani ka vona va nyikela hi ku kongoma ka mabetele ya lomu va tshamaka kona, va kombisa moya wa ku fana ni wa malandza ya Yehovha ya nkama lowu nga hundza lawa hi ku swi rhandza ma nga nyikela ma tlhela ma seketela ka ku yakiwa ka tindhawu ta ku gandzela Yehovha. (Eks. 35:20-29; 1 Tik. 29:9) Van’wani va nyikela hi ku tsala karta va vula swaku loko va fa swilo swa vona swi ta sala ni nhlengeletanu. Minyikelo yin’wanyani yi ta hi ka vanhu lava tsakelaka, amabandleni, masirkwitu naswona hi ntolovelo male leyi yi nyikeliwaka i yitsongo kambe loko yi tlhanganisiwa ya swi kota ku hakela madixpeza swaku ntirho wa ku chumayela wu nga nyimi kambe wu ya mahlweni.

⁴ Phela ka Timboni ta Yehovha i nkateko wawukulu ku seketela ntirho wa ku chumayela hi ku humesa male kumbe hi ku tirhisa swilo swin’wani swa tona. Yesu ni vadjondzisiwa va yena a va ni kaxa la male, leswi kombisaka swaku a va yamukela male leyi a yi va pfuna leswaku va xava swilo leswi a va swi lava. (Yoh. 13:29) Bibele li tlhela li vulavula hi vavasati lava a va pfuna Yesu ni vadjondzisiwa va yena. (Mar. 15:40, 41; Luk. 8:3) Mupostolo Pawulo a khense swinene a tlhela a yamukela mpfunu lowu a a nyikiwa wona hi vamakwerhu lava a va lava leswaku ntirho wa ku chumayela wu ya mahlweni ni ku mu seketela ka ntirho wa yena. (Filp. 4:14-16; 1 Tes. 2:9) Timboni ta Yehovha namuntlha ti tama ti tekelela swikombiso swoleswo hi ku hisekela ku nyikela hi ku swi rhandza. Hi ndlela leyo, swa koteka swaku vanhu lava tsakelaka amisaveni hinkwayu va kuma “mati ya wutomi” mahala. — Nhl. 22:17.

MA HAKELISIWA KU YINI MADIXPEZA YA BANDLA?

⁵ Madixpeza ya bandla na wona ma hakeliwa hi ku tirhisa minyikelo. A ku hlengisiwi male naswona munhu a nga tsemeliwi male leyi a faneleke a yi humesa funtshi a nga londziwi. Kambe ka Yindlo yin’wani ni yin’wani ya Wugandzeli ku vekiwa kaxa la minyikelo leswaku munhu a ta kota ku nyikela “hi ku ya hi leswi a nga swi boha ka mbilu ya yena.” — 2 Ko. 9:7.

⁶ Male leyi nyikeliwaka ka Yindlo ya Wugandzeli hi ntolovelo yi tirhiseliwa ku hakela swilo leswi tirhisiwaka ka Yindlo ya Wugandzeli ni swaku ku xaviwa swilo swaku yi lunghisiwa. Ntlawa wa madoda wu nga yendla xiboho xa ku ku rhumeliwa male ya ku karhi ka Betele la lomu va tshamaka kona swaku yi pfunisa ka ntirho wa ku chumayela. Ka mhaka leyo, bandla li fanele li pfumelelana ni xiboho xolexo. Hi ku yendla leswo, mabandla ya manyingi ma nga humesa male nkama ni nkama swaku yi pfunisa ka ntirho wa ku chumayela. Loko vamakwerhu hinkwavu abandleni va vona swilo leswi lavaka ku lunghisiwa nkama ni nkama, swi nga ta lava leswaku vamakwerhu va tshamela ku kombeliwa swaku va humesa male ya minyikelo.

MINYIKELO YI TIRHISISIWA KU YINI

⁷ Loko mintlhanganu yi hela, vamakwerhu vambirhi va humesa male leyi nga kona ka makaxa ya minyikelo va gama va tsala swaku i male muni. (2 Tih. 12:9, 10; 2 Ko. 8:20) A ntlawa wa madoda wu ta tiyiseka swaku male yoleyo yi hlayisekile anze nkama lowu yi nga ta rhumeliwa betele, kumbe nkama lowu yi nga ta tirhisiwa swaku yi hakela madixpeza ya bandla. Makwerhu lweyi a vonelelaka tikonta, loko ku hela wheti a ta hamba relatoriyu la leswi male yi nga tirhisisiwa xiswona ku gama ku tivisiwa bandla. Naswona loko ku hela tiwheti tinharhu, mutlhanganisi wa ntlawa wa madoda a ta tiyiseka swaku a tikonta ta kambeliwa.

MADIXPEZA YA SIRKWITU

⁸ Madixpeza ya masembleya ku fana ni madixpeza lawa ma yelanaka ni sirkwitu ma hakeliwa hi minyikelo ya Timboni ta Yehovha ya sirkwitu lolelo. Ku ni makaxa ya minyikelo ka tindhawu leti ku khomeliwaka ka tona masembleya swaku ku petiwa minyikelo, handle ka leswo loko ku tshuka ku va ni madixpeza man’wani ya sirkwitu, mabandla ma nga nyikela minyikelo ya wona ka swiyendlakalo swin’wani.

⁹ Sirkwitu lin’wani ni lin’wani li fanele li swi kota ku hakela madixpeza ya lona, ni leswaku male leyi salaka yi posiwa swaku yi pfunisa ka ntirho wa misava hinkwayu. Loko ku nga na male ka konta ya sirkwitu leswaku ku hakeliwa madixpeza ya asembleya kumbe ya ku sungulisa madixpeza ya asembleya leli li landzelaka, mudjikelezi a nga nyikela mavonelo ya leswaku mabandleni ku tivisiwa vamakwerhu hi xilaveko xa kuva ku nyikeliwa minyikelo. Ntlawa wun’wani ni wun’wani wa madoda wu fanele wu bula hi mhaka leyi wu tlhela wu yendla xiboho xa leswaku a bandla li nga kota ku humesa male muni leswaku yi kota ku pfunisa ka sirkwitu. Hi ku landzela, va ta gama va tivisa leswi nga bohiwa.

¹⁰ Loko ku tshuka ku humelela xiyimu lexi lavaka swaku xi lunghisiwa hi ku tirhisa timale, madoda ya sirkwitu ma fanele ma tlhangana hi siku la asembleya. Swiboho hinkwaswu leswi nga ta yendliwa, leswi kalaka swi nga li swa madixpeza ya ku toloveleka ya sirkwitu lolelo swi fanele swi pfumeleliwa hi madoda ya sirkwitu lolelo, hi ku va ma yendla xiboho swaku i male muni leyi nga ta humesiwa. Loko mhaka yoleyo yi tshuka yi yendleka, ku fanele ku tlhela ku yendliwa xiboho xin’wani hi ntlawa wa madoda ya sirkwitu. Male leyi nga bohiwa yi fanele yi tsaliwa, naswona leswaku ku tirhisiwa male ya sirkwitu ku fanele ku va ni mpfumelelo.

¹¹ Hi ntolovelo ku fanele ku hambiwa lunghiselelo la leswaku tikonta ta sirkwitu ti kambeliwa nkama ni nkama.

NDLELA LEYI SWISIWANA SWI PFUNIWAKA HI YONA

¹² Xin’wani lexi a xi yendla Yesu ni vadjondzisiwa va yena va va ni kaxa la minyikelo a ku li ku pfuna swisiwana. (Mar. 14:3-5; Yoh. 13:29) A ntirho lowu, Vakreste va ha wu yendla ninamuntlha. Yesu a te: “Swisiwana mi ta tshama na mi li na swona nkama hinkwawu.” (Mar. 14:7) Timboni ta Yehovha ti swi hlayisisa ku yini swisiwana namuntlha?

¹³ Minkama yin’wani vamakwerhu va ku tshembeka bandleni va lava ku pfuniwa hileswi va nga guga, va vabyaka, kumbe hileswi va kalaka va nga ha swi koti ku tihlayisa. Loko leswo swi humelela, ndjangu wa vona, maxaka ni vanhu van’wani lava swi tivaka leswi va kumanaka na swona, swi nga yendleka va swi lava ku va pfuna. Leswo swa twanana ni leswi mupostolo Yohani a nga swi vula loko a ku: “Loko ku ni lweyi a nga ni swilo swa misava leyi kutani a vona makwavu lweyi a pfumalaka kambe a nga mu tweli wusiwana, a nga vulisa ku yini swaku wa xi rhandza Xikwembu ke? Vananga, hi nga rhandzaneni hi marito ni ku vulavula hi nomo ntsena, kambe hi mintirho ni ntiyiso.” (1 Yo. 3:17, 18; 2 Tes. 3:6-12) A wugandzeli la ntiyiso li patsa ku pfuna vamakwerhu va ku tshembeka lava swi nga ha yendlekaka va lava ku pfuniwa. — Yak. 1:27; 2:14-17.

¹⁴ Ka karta la ku sungula leli Pawulo a nga li tsalela Timotiya, a tlhamusele leswi va nga pfunisiwaka xiswona vanhu lava lavaka ku pfuniwa. U nga lerha marito ya kona ka 1 Timotiya 5:3-21. Mukreste mun’wani ni mun’wani a ni ntirho wa lisima wa ku hlayisa vandjangu wa yena. Lava va ku guga ni lava vabyaka va fanele va pfuniwa hi vana va vona, vatukulu kumbe maxaka man’wani ya le kusuhi. Minkama yin’wani swi nga yendleka va pfuniwa hi mfumu kumbe hi tinhlengeletanu tin’wani ta ku pfuna swisiwana, se a maxaka ni van’wani va nga va pfuna swaku va kuma mpfunu wolowo. Ku nga ha va ni xiyimu lexi lavaka swaku bandla li vona swaku li nga va pfunisa ku yini vamakwerhu lava pfumalaka lava va nga ni nkama wa wunyingi na va tirhela Yehovha hi ku tshembeka. Loko va nga na xaka la le kusuhi kumbe munhu mun’wani lweyi a nga va pfunaka, naswona swi nga koteki swaku va pfuniwa hi mfumu, a ntlawa wa madoda wu nga ha yendla xiboho xa leswaku vamakwerhu volavo va pfuniwa. Ka hina Vakreste i nkateko wawukulu kuva hi nyikela hi leswi hi nga na swona swaku hi pfuna van’wani lava va pfumalaka.

¹⁵ Vamakwerhu va vanyingi swi nga yendleka va lava ku pfuniwa hi mhaka leswi va hluphiwaka, hi mhaka tinyimpi, ku tsekatseka ka misava, tindhambhi, ndlala kumbe tinghozi tin’wani ta ntumbuluku leti yendlekaka ka masiku lawa ya wugamu. (Mat. 24:7-9) Mabandla lawa vamakwerhu volavo va nga ka wona, swi nga yendleka ma nga swi koti ku va pfuna, hi mhaka leyo Ntlawa Lowu Rhangelaka wu yendla malulamiselo ya leswaku lava va lavaka ku pfuniwa va kuma mpfunu lowu taka hi ka vamakwerhu va tindhawu ta ku hambanahambana. Leswo swi fana ni leswi nga yendliwa hi Vakreste va Aziya Minor lava va nga humesa swakudla swaku swi ya pfuna vamakwerhu va Yudiya nkama ndlala yi nga ba. (1 Ko. 16:1-4; 2 Ko. 9:1-5) Loko hi tekelela xikombiso xa vona, hi va hi kombisa swaku ha va rhandza swinene vamakwerhu hi tlhela hi kombisa swaku hi vadjondzisiwa va ntiyiso va Yesu Kreste. — Yoh. 13:35.

KU PHAKELIWA KA MABUKU

¹⁶ Bibele ni mabuku man’wani lawa ma nga seketeliwa ka Bibele i swa lisima leswaku ku chumayeliwa rungula la Mfumu. Hi ntolovelo, mupfunisi wa bandla wa langiwa hi ntlawa wa madoda swaku a hlayisa mabuku. Vamakwerhu lava va langiwaka swaku va hlayisa mabuku, va wu teka na wu li wa lisima ntirho wa vona. Va tsala leswi lavekaka swaku ku va ni mabuku ya ku yenela swaku vamakwerhu va pfuneka bandleni.

¹⁷ Leswi hi nga Vakreste lava nga tinyiketela, ha swi twisisa swaku nkama wa hina, ntirho wa hina, wutlharhi la hina, wutomi la hina, ni leswi hi kotaka ku swi yendla hi nyikiwe hi Xikwembu, naswona hi fanele hi swi tirhisa ka ntirho wa xona. (Luk. 17:10; 1 Ko. 4:7) Loko hi swi tirhisa hi wutlharhi leswi hi nga na swona hi va hi kombisa swaku ha mu rhandza Yehovha hi mbilu hinkwayu. Hi lava ku mu dzunisa hi swilo swa hina swa lisima na hi tiva swaku wa tsaka hi xin’wani ni xin’wani lexi hi mu nyikaka xona hi mbilu hinkwayu. (Swiv. 3:9; Mar. 14:3-9; Luk. 21:1-4; Kol. 3:23, 24) Yesu a vule leswi: “Mi nyikiwe mahala, na n’wina nyikani mahala.” (Mat. 10:8) Loko hi mu nyika hinkwaswu Yehovha leswaku hi mu tirhela ka ntirho wa yena, hi ta tsaka hintamu. — Min. 20:35.