Ku Tiveka Hansi Ka Wurhangeli La Xikwembu Swa Pfuna

KU TIVEKA hansi ka Yehovha Hosi ya Misava ni Matilo i swa lisima swinene leswaku hi tama hi yendla ku rhandza ka Yehovha hi ndlela yayinene ni hi nawu wa kona. Hi tiveka hansi ka wurhangeli la Yesu Kreste N’wana wa Xikwembu lweyi a nga nhloko ya bandla hi tlhela hi landzela nawu wolowo wa wun’we wa ku yingisa lava va rhangelaka ni ka swiyimu swin’wani swa wutomi la hina. Phela ku tiveka hansi ni ku yingisa a wurhangeli leli Yehovha a nga li veka swi pfuna hinkwerhu.

² Phela a mhaka ya leswaku munhu a fanele a tiveka hansi ka munhu lweyi a nga ni mfanelo ya ku rhangela yi sungule a jardim la Edeni. A mhaka leyo yi kumeka ka minawu leyi Xikwembu xi nga yi veka leyi kumekaka ka Genesa 1:28 ni 2:16, 17. A swiharhi hinkwaswu lani misaveni a swi fanele swi rhangeliwa ni ku fumiwa hi Adamu na Evha naswona Adamu na Evha a va fanele va tiveka hansi ka wunhloko la Xikwembu. Phela ku yingisa Yehovha Xikwembu ni ku tiveka hansi ka yena, a swi ta yendla swaku ku va ni ku rhula naswona swilo swi famba hi ndlela yayinene ni hi nawu wa kona. A nawu wa wunhloko wu game wu kumeka hi ku famba ka nkama ka buku la 1 Vakorinto 11:3. Ka buku leli mupostolo Pawulo a tsale leswi: “Ni lava mi swi tiva swaku nhloko ya wanuna mun’wani ni mun’wani i Kreste; kasi nhloko ya wansati i wanuna; kutani nhloko ya Kreste i Xikwembu.” Hilani hi swi vonaka hi kona ka ndzimana leyi, i Yehovha ntsena lweyi a kalaka a nga fanelanga a tiveka hansi ka munhu mun’wani.

³ A vanhu va ku tala namuntlha ka siku a va na mhaka naswona a va yi landzeli minawu ya wunhloko. Hi mhaka muni? A mhaka yi sungule a jardim la Edeni nkama Adamu na Evha hi maxivomu va nga langa ku kala va nga ha tiveki hansi ka wunhloko la Xikwembu. (Gen. 3:4, 5) Kambe, leswo a swi va yendlanga va kuma chunseko. Handle ka leswo, va sungule ku tiveka hansi ka ntsumi ya ku biha, ku nga Sathana Davulosi. Ku kala ku yingisa ka vona ku hambanise vanhu hinkwavu ni Xikwembu. (Kol. 1:21) Hi yona mhaka, ku tala ka vanhu lani misaveni va fumiwaka hi Sathana. — 1 Yo. 5:19.

⁴ A ku djondza Rito la Xikwembu hi tlhela hi hanya hi lona swi hi pfuna ku kala hi nga fumiwi hi Sathana. Leswi hi nga Timboni ta Yehovha leti ti nga tinyiketela ti tlhela ti tsakamisiwa, hi lange Yehovha leswaku ku va yena a hi fumaka ka wutomi la hina. Hi pfumelelana na Hosi Davhida lweyi a nga vula swaku Yehovha a “tlakukile ka swilo hinkwaswu.” (1 Tik. 29:11) Hi ku tiveka hansi ha swi tiva swaku “Yehovha i Xikwembu. Hi yena a nga hi yendla, naswona hi va yena. Hi vanhu va yena ni tinyempfu leti risiwaka hi yena.” (Ps. 100:3) Ha swi tiva leswaku Yehovha a tlakukile ni leswaku swo mu fanela kuva hi mu yingisa hi ku helela, hikusa hi yena a nga yendla swilo hinkwaswu. (Nhl. 4:11) Leswi hi nga Vakreste va ntiyiso, hi tekelela Yesu Kreste lweyi a nga hi vekela xikombiso xa ku hetiseka xa ku yingisa Yehovha.

⁵ Yesu a djondze yini hi swikarhatu hinkwaswu leswi a nga kumana na swona lani misaveni? Vaheberu 5:8 ya hlamula yi ku: “Hambileswi a a li n’wana, a djondze ku yingisa hi mhaka ya ku xaniseka ka yena.” Yesu a tshame na a tshembekile a tlhela a yingisa Papayi wa yena wa le tilweni hambiloko a kumana ni miringo. Handle ka leswo, yena a a nga yendli nchumu hi ku tisungulela. A a nga vulavuli nchumu hi ku tisungulela naswona a nga yendlanga nchumu swaku a dzunisiwa. (Yoh. 5:19, 30; 6:38; 7:16-18) Nkama lowu a a li misaveni, Yesu a yendle hinkwaswu leswaku a tsakisa Papayi wa yena hambileswi leswo a swi ta yendla leswaku a kanetiwa a tlhela a xanisiwa. (Yoh. 15:20) Hambileswo, Yesu a kombise ku tiveka hansi ka Xikwembu. “A tiveke hansi, a yingisa anze a fa, a fa ka mhandzi ya nxaniso.” Hi ku va a yingise Papayi wa yena ka hinkwaswu, Yesu a nyikiwe xitshamu xa ku tlakuka ku tlula lexi a a li na xona a ku sunguleni. Handle ka leswo, Yesu a dzunise Yehovha ni ku hi nyika tshembo wa ku kuma wutomi la ku kala li nga heli. — Filp. 2:5-11; Heb. 5:9.

I MANI LWEYI HI FANELEKE HI TIVEKA HANSI KA YENA?

⁶ Loko hi tiveka hansi ka Xikwembu hi ku yendla ku rhandza ka xona, hi ta tipumbela swikarhatu swa swinyingi, swa ku fana ni ku vilela ni ku tshama na hi kwatile, ku nga swilo leswi hi ntolovelo swi yendlekelaka vanhu lava va kalaka va nga tiveki hansi ka Xikwembu. Nala wa hina Sathana a yendla hinkwaswu leswi a nga swi kotaka swaku a hi hahlulela. Se leswaku hi tivonela ka nala lweyi, hi fanele hi tiveka hansi ka Xikwembu hi ku xi yingisa hi mbilu hinkwayu. — Mat. 6:10, 13; 1 Pe. 5:6-9.

⁷ Hambi hi ndzeni ka bandla hi fanele hi tiveka hansi ka wunhloko la Kreste ni ka nkongomiso lowu hi nyikiwaka wona hi “mutirhi wa ku tshembeka ni wa ku tlhariha.” Loko hi tiveka hansi ka wunhloko la Xikwembu abandleni, hi ta yingisa leswi Bibele li swi vulaka ka swiyimu hinkwaswu leswi swi khumbaka wugandzeli la hina. Hi nga kombisa swaku ha yingisa hi ku chumayela, hi va kona amintlhanganwini hi tlhela hi hlangamela ka yona, hi hanyisana kahle ni madoda, ni ku yingisa nkongomiso lowu hi nyikiwaka wona hi nhlengeletanu. — Mat. 24:45-47; 28:19, 20; Heb. 10:24, 25; 13:7, 17.

⁸ Ku tiveka hansi ka Xikwembu swi hi pfuna swaku hi va ni ku rhula, hi vhikeleleka swi tlhela swi yendla swaku swilo swi famba hi ndlela ya kona abandleni. Wumunhu la Yehovha la tikomba ka lava va mu yingisaka. (1 Ko. 14:33, 40) Hinkwaswu leswi se hi nga swi hanya ka nhlengeletanu ya Yehovha, swi hi yendla hi titwa ku fana na Hosi Davhida lweyi loko se a vone ku hambana ka malandza ya Yehovha ni vanhu va ku biha a nga vula leswi: “Va tsaka vanhu lava Xikwembu xa vona ku nga Yehovha!” — Ps. 144:15.

⁹ Bibele li vula swaku andjangwini, “nhloko ya wansati i wanuna.” Li tlhela li vula swaku nhloko ya wanuna i Kreste ni swaku nhloko ya Kreste i Xikwembu. (1 Ko. 11:3) Wansati a fanele a tiveka hansi ka nuna wa yena, kasi vana va fanele va tiveka hansi ka vapsali. (Efe. 5:22-24; 6:1) Loko hinkwavu andjangwini va landza nkongomiso lowu wa ku tiveka hansi, swi ta yendla swaku ndjangu wu hanya hi ku rhula.

¹⁰ Wanuna lweyi a nga chada a fanele a tirhisa wunhloko la yena hi lirhandzu na a tekelela Kreste. (Efe. 5:25-29) Naswona a nga fanelanga a rhangela ndjangu wa yena hi nhonga ya nsimbi kumbe a tshika ku wu rhangela. Loko a yendla leswo, nsati ni vana va ta tiveka hansi ka yena na va tsakile. Wansati a fanele a va mupfunisi kumbe muhetisisi wa nuna wa yena. (Gen. 2:18) Loko a mu lehisela mbilu a tlhela a mu hlonipha nuna wa yena, a ta tsakeliwa hi yena ni hi Xikwembu. (1 Pe. 3:1-4) Loko vavanuna ni vavasati va yingisa nawu wa wunhloko, va ta va swikombiso swaswinene ka vana va vona hi ku tiveka hansi ka Xikwembu.

¹¹ Ku tiveka hansi ka wunhloko la Xikwembu swi khumba ndlela leyi hi va vonaka hi yona “lava va fumaka,” lava va nga “vekiwa hi Xikwembu ka switshamu swa vona leswi nga pimiwa.” (Rom. 13:1-7) Tanihi vanhu lava va yingisaka minawu, Vakreste va hakela rhesa hi ku nyika “swa Khezari ka Khezari, kambe swa Xikwembu ka Xikwembu.” (Mat. 22:21) Handle ka leswo a ndlela leyi teritoriyu li tirhiwaka hi yona yi fanele yi fambisana ni minawu ya tiko ya ku vhikela rungula la vanhu va teritoriyu lolelo. Hi kombisa ku tiveka hansi ni ku yingisa lava va fumaka loko minawu leyi va hi nyikaka yona yi nga lwisani ni minawu ya ku lulama ya Yehovha. Leswo swi ta hi pfuna swaku hi tirhisa matimba ya hina ka ntirho wa ku chumayela. — Mar. 13:10; Min. 5:29.

¹² Vakreste va kombisa ku hlonipha wunhloko ka swiyimu hinkwaswu swa wutomi la vona. Leswi hi nga ni lipfumelo, hi li nyimele hintamu siku leli vanhu hinkwavu va nga ta tiveka hansi ka Yehovha Xikwembu. (1 Ko. 15:27, 28) Vanhu hinkwavu lava va hloniphaka wuhosi la Yehovha va tlhela va tiveka hansi ka lona va ta katekisiwa hi masiku ni masiku!