Ku Pfuxiwa Ka Yesu

Loko Yesu se a file, wanuna mun’wani wa ku ganya lweyi a vitaniwaka Yosefa a ye ka Pilatu a ya kombela leswaku a teka muzimbha wa Yesu ka mhandzi. Yosefa a bohelele muzimbha wa Yesu hi lensoli leli a li cheliwe mafurha ya ku nun’hwela, se a teka muzimbha wa Yesu a wu veka ka sirha a gama a pfala hi ribye lalikulu hintamu. Loko ku hundze leswo vaprista va fambe va ya vulavula na Pilatu va ku:

— Hi chava swaku vadjondzisiwa va Yesu va nga famba va ya susa muzimbha wa yena ka sirha, va gama va famba va byeletela vanhu leswaku Yesu a pfuxiwile.

Se Pilatu a va hlamulile a ku:

— Li pfaleni kahle sirha, mi tlhela mi byela masonchwa swaku ma li vonelela.

Loko se ku hundze masiku manharhu, Mariya Madalena ni vavasati van’wanyani va yile ka sirha nimixo. Nkama va nga fika va kume swaku a ribye leli a li li ka nyanghwa wa sirha a li susiwile. Nkama va nga nghena ka sirha va vone ntsumi leyi yi nga va byela yi ku:

— Mi nga chavi, Yesu a pfuxiwile. Fambani mi ya byela vadjondzisiwa swaku va famba Galileya va ta kumana na yena.

Mariya Madalena a fambe hi ku tsutsuma a ya lavetela Pedru na Yohani, a fika a ku:

— Ku ni lweyi a nga teka a muzimbha wa Yesu.

Pedru na Yohani va fambe hi ku tsutsuma va ya sirheni. Loko va fikile va vone swaku a wu nga li kona, se va gama va tlhelela kaya.

Loko Mariya a tlhelele sirheni, a vone tintsumi timbirhi ndzeni ka sirha, a ti byele swaku a a nga swi tivi swaku a wu yisiwe kwini muzimbha wa Yesu. A game a vona wanuna, lweyi a a pimisa swaku i jardineiro, a mu vutisile a ku:

— Ni kombela u ni byela, u wu yise kwini muzimbha wa Yesu?

Wanuna yelweyo a vitane Mariya hi vito, leswo swi yendle swaku Mariya a swi vona swaku wanuna lwiyani a ku li Yesu, a gama a mu barasara. Yesu a rhume Mariya swaku a ya byela vadjondzisiwa leswi a swi yendlekile. Se Mariya a fambe hi ku tsutsuma a ya byela vadjondzisiwa van’wani swaku a a vone Yesu.

Loko se ku hundze nkamanyana, vadjondzisiwa vambirhi a va ya Emawusi. Se wanuna mun’wani a sungule ku longoloka na vona, loko va li ku fambeni a va vutise swaku a va bula hi yini. Vona va vule leswi:

— A wu yi tivi minchumu leyi yi nga yendlekela Yesu? Ka masiku manharhu lawa ma nga hundza, vaprista vavakulu va mu nyikelile swaku a dlayiwa. Se swoswi ku ni vavasati va vulaka swaku a pfuxiwile.

Se wanuna lwiyani a va byele a ku:

A mi kholwi ka vaprofeta? Vona va vule swaku Yesu a a ta dlayiwa a gama a pfuxiwa.

Wanuna lweyi a tame a tlhamusela vadjondzisiwa lava Rito la Xikwembu. Se va game va famba va ya dla na yena. Kambe na va nga se dla pawu, wanuna lweyi a yendle xikhongelo. Hi nkama wolowo vadjondzisiwa va mu tivile swaku a a li Yesu, kambe hi ku hantlisa a nyamalalile.

Vadjondzisiwa lava vavambirhi va tsutsumile va ya aYerusalema va ya byela vapostolo leswi swi nga humelela. Se Yesu a game a humelela lani a va li kona, vona a va nga khohlwi swaku i Yesu lweyi a va mu vona. Kambe Yesu a te:

— Txuvukani mavoko ya mina mi tlhela mi ni khoma. A Rito la Xikwembu se a li swi vulile swaku Kreste a a ta fa a tlhela a pfuxiwa.