Vanhu Va Vanyingi Va Ve Vakreste

Yesu a rhume vapostolo va yena swaku va chumayela mahungu ya ku tsakisa ka misava hinkwayu naswona vapostolo va yingisile. Ka lembe la 47, vamakwerhu va Antiyokiya va rhume Pawulo na Barnaba leswaku va ya chumayela. Ka liyendzo lelo, Pawulo na Barnaba va chumayele ka tindhawu ta ku tala ta Aziya Menor ta ku fana ni Derbi, Lixtra ni Ikoniya.

Pawulo na Barnaba a va vulavula hi mahungu ya ku tsakisa ka vanhu hinkwavu. Vona a va chumayela vanhu va ku ganya, swisiwana, majovhem ni lava va nga guga. Funtshi vanhu va vanyingi va sungule ku kholwa ka Yesu. Siku lin’wani, Pawulo na Barnaba va chumayele Serjiyo Pawulo lweyi a a li govhernadori wa Kipra. Kambe muloyi mun’wani a zame ku va sivela. Se Pawulo a byele muloyi yelweyo a ku:

— Yehovha a ku kwatelile.

Se hi nkama wolowo, wanuna lwiyani a fe matihlo. Nkama govhernadori a nga swi vona leswo, a hlamalile hintamu naswona se a a lava ku va Mukreste.

Pawulo na Barnaba a va chumayela ka tindhawu hinkwatu. A va djondzisa vanhu makaya ka vona, mabazara, tindleleni ni ka tindhawu leti vanhu a va gandzela Yehovha ka tona. Nkama Pawulo na Barnaba va nga hundza hi ka doropa la Lixtra va hanyise wanuna lweyi a a limalile. Se vanhu lava va nga vona swilo swoleswo swa ku hlamalisa, va pimise swaku vona a va li swikwembu. Se va sungule ku va gandzela, kambe Pawulo na Barnaba va te:

— Mi nga yendleni leswo, hina ho va vanhu ntsena. Gandzelani Xikwembu.

Se ku sukela kolanu, Vayuda van’wani va sungule ku vulavula ku biha hi Pawulo na Barnaba ka vanhu va Lixtra. Hi mhaka leyo, va be Pawulo hi maribye va tlhela va mu humesa handle ka doropa. Vona a va pimisa swaku Pawulo a file kambe yena a a nga fanga. Hi ku hantlisa vamakwerhu va yile va ya pfuna Pawulo ni ku mu teka va tlhela na yena ka doropa. Loko se ku hundzenyana nkama, Pawulo a tlhelele Antiyokiya.

Hi lembe la 49 E.C., Pawulo a tlhele a sungula liyendzo lin’wani la ku ya chumayela. Ku sungula a tlhele a ya Aziya Menor a gama a yendza a ya ka tindhawu ta le kule ta Europa. Pawulo a ye Atena, Efeza, Filipiya, Tesalonika ni tindhawu tin’wani. Pawulo a fambe na Silasi, Luka ni jovhem lin’wani leli a li vitaniwa Timotiya. Va yendle mabandla ya nyuwani va tlhela va ma pfuna leswaku ma kula. Pawulo a tshame lembe ni hafu aKorinto na a tiyisa vamakwerhu va kohala. Yena a chumayelile, a djondzisa ni ku tsalela mabandla ya manyingi makarta. Funtshi Pawulo a a yendla matende. Se hi ku famba ka nkama, Pawulo a tlhelele Antiyokiya.

Hi lembe la 52, Pawulo a sungule liyendzo la yena la wunharhu la ku ya chumayela. A rhange hi ku ya Aziya Menor, a gama a famba anze Filipiya se a game a tlhela a ya Korinto. Pawulo a tshame malembe ya manyingi na a chumayela mahungu ya ku tsakisa aEfeza, a tlhela a hanyisa vanhu ni ku pfuna bandla. Naswona a a ya ka xikola a ya veka madixkursu siku ni siku. Vanhu va vanyingi lava a va twa madixkursu ya yena va txintxile va va Vakreste. Loko se a chumayelile ka tindhawu ta tinyingi, Pawulo a game a famba a ya Yerusalema.