Pawulo Na Timotiya

Timotiya a a li jovhem leli a li kumeka ka bandla la Lixtra. Papayi wa yena a a li Mugriki naswona mamani wa yena a a li Muyuda. Vito la mamani wa yena a ku li Eunisi, vhovho wa yena a ku li Loidi. Vona va djondzise Timotiya hi Yehovha ku sukela na wa ha li mutsongo.

Nkama Pawulo a nga hundza hi ka doropa la Lixtra ka liyendzo la yena la wumbirhi la ku chumayela, a vone leswaku Timotiya a a li jovhem leli a li ni lirhandzu hintamu naswona a li rhandza ku pfuna vamakwerhu. Se Pawulo a rhambe Timotiya leswaku va famba xikan’we. Pawulo a pfune Timotiya leswaku a kota ku chumayela ni ku djondzisa kahle.

Xikwembu a xi tirhisa moya wa xona wa ku kwetsima leswaku xi komba Pawulo na Timotiya lomu a va fanele va ya kona. Ka wusiku lin’wani, Pawulo a vone minchumu ya ku hlamalisa. Yena a vone wanuna na a mu byela a ku:

— Tani Makedoniya u ta hi pfuna.

Se Pawulo, Timotiya, Silasi na Luka, va ye ka tiko la Makedoniya leswaku va ya chumayela ni ku yendla mabandla ya nyuwani. Ka doropa la Makedoniya aTesalonika, vanhu va vanyingi va ve Vakreste. Kambe Vayuda van’wani a va nga mu rhandzi Pawulo ni vanghanu va yena. Se vona va hlengeletanile, va khoma Pawulo ni vanghanu va yena va va yisa ka tihosi ta doropa na va huwelela va ku:

— Vavanuna lava a va nyimi ni mfumu wa Roma.

Kuva Pawulo na Timotiya va tama va va ka doropa leliyani, a swi ta veka wutomi la vona nghozini. Hi mhaka leyo, vona va balekile hi wusiku lolelo va ya Bereya.

Vanhu va le Bereya a va swi lava hintamu ku twa mahungu ya ku tsakisa. Kambe a ku vanga Vayuda ntsena lava va nga ve Vakreste, ni Vagriki van’wani va ve Vakreste. Nkama lowu Vayuda van’wani va le Tesalonika va nga ya aBereya va fike va xengetela vanhu, se swi lave leswaku Pawulo a baleka a ya Atena.

Kambe Timotiya na Silasi va tame va tshama Bereya leswaku va pfuna vamakwerhu. Se loko ku hundze nkama, Pawulo a kombele Timotiya leswaku a tlhelela aTesalonika leswaku a ya pfuna vamakwerhu va kohala, swaku va tiyisela ku hluphiwa loku a va kumana na kona. Loko se ku hundze leswo, Pawulo a kombele Timotiya leswaku a yendzela mabandla man’wani leswaku a ya ma pfuna.

Pawulo a byele Timotiya a ku:

— Lweyi a lavaka ku tirhela Yehovha a ta hluphiwa.

Timotiya a hluphiwile, a tlhela a petiwa djele hi leswi a a li Mukreste. Kambe yena a a tsakile hikusa leswo a swi ta mu pfuna ku kombisa swaku wa tshembeka ka Yehovha.

Pawulo a byele Vafilipiya a ku:

— Ni kombele Timotiya leswaku a ta seno. Yena a ta mi djondzisa ku hanya hi ntiyiso, a tlhela a mi djondzisa leswi mi faneleke mi wu yendlisa xiswona ntirho wa ku chumayela.

Pawulo a a mu tshemba Timotiya hikusa va tirhe malembe ya manyingi xikan’we naswona a va li vanghanu vavakulu.