Yoxuwa Ni Vagibiyoni

Vanhu hinkwavu va Kanana va swi tivile leswi nga yendleka aYeriko. Se tihosi ta le Kanana a ti lava ku lwa ni Vayisrayele kambe vanhu va doropa lin’wani leli vitaniwaka Gibiyoni va vone swi yampsa va tinyikela ka Vayisrayele. Vagibiyoni va yendle ingi a hi va tiko la Kanana se va rhumele vavanuna lava a va yambale timpahla ta ku handzukela leswaku va ya vulavula na Yoxuwa va ku:

— Hina hi ta hi ka ndhawu ya le kule naswona hi tive leswi Yehovha a nga mi yendlela swona ka tiko la Gibita ni la Mowabu. Se loko mi hi tshembisa leswaku a mi nga ta li dumela doropa la hina hi ta tinyikela leswaku hi mi tirhela.

Yoxuwa a swi kholwile leswi vavanuna lava va nga swi hlaya, se a va tshembise leswaku a a nga ta li dumela doropa la vona. Loko se ku hundze masiku manharhu a tive leswaku vavanuna lavayani a va nga ti hi ka doropa la le kule kambe a va ta hi ka tiko la Kanana. Se Yoxuwa a vutise Vagibiyoni a ku:

— Hi mhaka muni mi ni hembelile mi ku mi ta hi ka tiko la le kule?

Va mu hlamula va ku:

— Hi mhaka a hi chava hintamu hikusa hi tive leswaku Yehovha a tama a mi pfuna ka tinyimpi leti mi ti lwaka naswona a lava leswaku mi teka tiko la Kanana. Ha ku kombela u nga va helisi vanhu va hina.

Se Yoxuwa a yendle leswi a nga va tshembisa swona. A tshike Vagibiyoni va tama va hanya.

Loko se ku hundze nkamanyana, 5 wa tihosi ta Kanana ti fambe ti ya lwa ni Vagibiyoni, se Yoxuwa ni masonchwa ya yena va fambe va ya pfuna Vagibiyoni. Vona va rhendzeleke wusiku hinkwalu se ka siku leli nga landzela nimixo va sungule ku lwa. Vakanana va sungule ku dungeka tinhloko va tsutsuma va ya seni ni seni, se Yehovha a yendle leswaku ku wa ma pedra de gelo ahenhla ka vona. Yoxuwa a kombele Yehovha leswaku a nyimisa dlambu kambe yena a a nga se tshama a vona dlambu li nyima. Se hi mhaka muni a kombele leswo? Hi mhaka Yoxuwa a a mu tshemba hintamu Yehovha. Phela a dlambu li nyime li nga peli siku hinkwalu, li pele nkama lowu Vayisrayele va nga hlula tihosi hinkwatu ta Vakanana ni masonchwa ya vona.