Gidiyoni A Hlula Vamidiyani

Loko se ku hundze malembe, Vayisrayele va tlhele va sungula ku gandzela swikwembu swa mavunhwa. Hi mhaka leyo, Yehovha a tshike Vamidiyani va hlupha Vayisrayele, va yiva swifuyu swa vona, va tlhela va psanyetela masimu ya vona. Leswaku va baleka Vamidiyani, Vayisrayele a va famba va ya tumbela ka tintshava. Vona va kombele Yehovha leswaku a va pfuna. Se Yehovha a rhumele ntsumi leswaku yi ya vulavula na Gidiyoni. A ntsumi yi fike yi mu byela yi ku:

— Yehovha a ku langile Gidiyoni leswaku u ponisa Vayisrayele.

Se Gidiyoni a ku:

— Mina? Ni ta swi yendlisa ku yini swoleswo? Phela mina a ni wa nchumu.

Se Gidiyoni a game a khongela ka Yehovha, a kombela leswaku a mu tiyisekisa swaku a a mu langile hikakunene. A teke mavoya ya nyempfu a ma veka hansi a gama a khongela ka Yehovha a ku:

— Loko li xa mundzuku nimixo na mavoya lawa ma tsakamile kambe la hansi na ku womile, ni ta tiyiseka swaku hikakunene u ni langile leswaku ni ponisa Vayisrayele.

Hi siku leli nga landzela, a mavoya ya nyempfu a ma tsakamile kambe a hansi a ku womile. Leswaku a ta tiyiseka swaku Yehovha a mu langile, Gidiyoni a kombele Yehovha leswaku a yendla swa ku hambana ni swa ku sungula. Swoswi a kombele Yehovha swaku a hansi ku tsakama kambe mavoya ya nyempfu ma woma. Se ku yendleke leswi Gidiyoni a nga swi kombela. Hi mhaka leyo, Gidiyoni se a a tiyiseka swaku a langiwe hi Yehovha. Se a teka masonchwa leswaku va ya lwa ni Vamidiyani. Yehovha a byele Gidiyoni a ku:

— Ni ta pfuna Vayisrayele swaku va hlula kambe leswi u nga ni masonchwa ya manyingi a ni lavi mi pimisa leswaku mi hlule hi matimba ya n’wina, hi mhaka leyo lweyi a chavaka mu tshiki a muka.

Se 22.000 wa masonchwa ma tlhelile ma ya kaya, ku gama ku sala 10.000 wa wona. Se Yehovha a byela Gidiyoni a ku:

— Va ha li vanyingi, rhuma masonchwa ya wena leswaku ma ya phuza mati ka nambu. Ntsena teka lweyi a phuzaka na a txuvuka valala, u famba na yena nyimpini.

O va 300 wa vavanuna ntsena lava nga yendla leswo. Se Yehovha a tshembise Gidiyoni leswaku a a ta tirhisa vavanuna lava vavatsongo leswaku a hlula 135.000 wa masonchwa ya Vamidiyani.

Ka wusiku lelo, Yehovha a byele Gidiyoni leswaku a a li nkama wa ku dumela Vamidiyani. Se Gidiyoni a nyike masonchwa a timhondzo ni makhuwani yamakulu lawa a va li na wona se a gama a ku:

— Txuvukani leswi ni nga ta swi yendla, mi gama mi swi yendla.

Se Gidiyoni a chaye limhondzo, a dlaya khuwani a tlhela a tlakusa nhonga ya ndzilu, a gama a ku:

— A nyimpi i ya Yehovha na Gidiyoni!

Se vavanuna hinkwavu lava va 300 va yendle leswi fanaka. Se Vamidiyani va sungule ku chava hintamu, va gama va tsutsuma va ya hala ni hala. Va sungula ku dlayana hi xivona. Phela Yehovha a tlhele a pfuna Vayisrayele swaku va hlula valala va vona.