Yehovha A Vhikela Yehoxafati

Yehoxafati a a li hosi ya Yuda. Yena a helise wugandzeli la Bali ka tiko la Yuda. Yena a a lava leswaku vanhu hinkwavu va yingisa Yehovha, se a lange vanhu lava a va yi tiva kahle minawu ya Yehovha leswaku va djondzisa xitshungu.

A mimfumu leyi a yi li kusuhi ni Yuda a yi chava ku va dumela hikusa a va swi tiva leswaku Yehovha a a vhikela vanhu va yena. Phela mimfumu leyi a yi nyikela hambi hi maprezenti ka hosi Yehoxafati. Kambe Vamowabu, Vaamoni ni lava a va tshama ka tiko la Seyiri, va fambe va ya lwa ni mfumu wa Yuda. Yehoxafati a a swi tiva leswaku a a ta lava ku pfuniwa hi Yehovha, hi mhaka leyo a byele vavanuna hinkwavu, vavasati ku patsa ni vana leswaku va ya aYerusalema. Na a li phambheni ka xitshungu Yehoxafati a khongelile a ku:

— Yehovha a hi nga ta swi kota ku hlula nyimpi leyi, na hi nga pfuniwanga hi wena. Se hi kombela u hi byela swaku hi fanele hi yendla yini.

Se Yehovha a va hlamula a ku:

— Mi nga chavi hikusa ni na n’wina, a ku na lweyi a nga ta lwa, vonani leswi ni nga ta mi yendlela swona.

I yini leswi Yehovha a a ta swi yendla leswaku a vhikela vanhu va yena?

Hi siku leli nga landzela, Yehoxafati a lange vanhu lava a va yimbelela kahle. Vanhu lava a va fanele va ya phambheni ka masonchwa, va yimbelela tinsimu ta ku tsakisa Yehovha na va famba ku sukela aYerusalema anze ka ndhawu leyi vitaniwaka leswaku i Tekowa, ku nga ndhawu leyi a va ta lwela ka yona.

Se nkama lowu na va famba na va yimbelela, Yehovha a yendle nchumu wa ku hlamalisa. A yendle leswaku Vaamoni ni Vamowabu va sungula ku lwa hi xivona, va tlhela va dlayana. Kambe Yehovha a vhikelile vanhu va yena, ku nga leswi a a swi tshembisile. Vanhu lava a va tshama kusuhi ni Yuda va swi tivile leswi Yehovha a nga swi yendla, va tlhela va swi vona leswaku Yehovha a a tama a vhikela vanhu va yena. Se waswivo? Yehovha minkama hinkwayu a yendla xan’wanchumu leswaku a vhikela vanhu va yena, naswona a nga nyimeli ku pfuniwa hi munhu leswaku a yendla leswo.