Yehovha A Mu Lehisele Mbilu Yonasi

Ka tiko la Siriya a ku ni doropa leli a li vitaniwa Ninivha, vanhu va doropa leli a va yendla swilo swa ku biha hintamu. Hi mhaka leyo Yehovha a rhume Yonasi leswaku a ya byela vanhu lava leswaku va txintxa. Kambe Yonasi a nga yanga lomu Yehovha a nga mu rhuma kona. Yena a khwele boti a baleka a ya ka doropa la Tarxixi leli a li kumeka kule swinene ni Ninivha.

Loko va li ka liyendzo hi boti ku sungule moya wawukulu, lava a va fambisa boti va sungule ku chava hintamu swinene. Vona va sungule ku khongela ka swikwembu swa vona, leswaku va ta tiva leswaku hi mhaka muni ku ba moya lowu wawukulu. Kambe Yonasi a byele lava a va fambisa boti a ku:

— Swilo leswi swi yendleka hi mhaka mina, Yehovha a ni byele leswaku ni yendla xan’wanchumu, kambe mina ni le ku balekeni, se loko n’wina mi ni txukumeta lwandle moya wu ta nyima.

Lava a va fambisa boti a va nga swi lavi ku yendla leswo, kambe Yonasi a va byele hi ku phindhaphindha, loko vafambisi va boti va mu hoxile ka lwandle moya wu nyimile.

Yonasi a sungule ku mbombomela, yena a a pimisa leswaku a ta fa kambe a khongelile ka Yehovha. Hi nkama wolowo Yehovha a rhumele a hlampfi yayikulu leswaku yi minta Yonasi, kambe a nga fanga! Na a li ndzeni ka hlampfi Yonasi a khongelile a ku:

— Yehovha na ku tshembisa swaku ni ta ku yingisa minkama hinkwayu.

Yonasi a tshame ndzeni ka hlampfi 3 wa masiku, loko se ku hundze leswo Yehovha a yendle leswaku hlampfi yi hlanta Yonasi ka misava ya ku woma.

Se ku nga va swaku Yonasi a a fanele a muka kaya? Ihim Yehovha a tlhele a byela Yonasi leswaku a ya Ninivha. Kambe swoswi Yonasi a fambile, nkama lowu a nga fika Ninivha a byele Vaninivha a ku:

— Ndzeni ka 40 wa masiku Ninivha a ta helisiwa.

Kambe ku game ku yendleka nchumu lowu a wu nga nyimeliwanga, Vaninivha va txintxile va tisola ka swidjoho swa vona. Hosi ya Ninivha yi byele xitshungu yi ku:

— A hi kombeleni ka Xikwembu leswaku xi hi rivalela, swi nga yendleka xi hi twela wusiwana xi nga hi dlayi.

Loko Yehovha a vone leswaku Vaninivha va txintxile a nga ha li helisanga doropa leliyani. Kambe Yonasi swi mu kwatise hintamu leswo, a nga va lehiselanga mbilu va Ninivha ku fana ni leswi Yehovha a a mu lehisele mbilu yena Yonasi. Handle ka leswo a hume hi ka doropa leliyani na a kwate hintamu a tlhela a binya. Naswona a fambe a ya tshama ka ndzhuti wa xinsinyani kambe xinsinyani lexi xi game xi fa. Leswo na swona swi mu kwatise hintamu Yonasi. Yehovha a djondzise Yonasi djondzo ya lisima, a te:

— Wena u xi twele wusiwana xinsinyani lexi, u kwate hintamu nkama xi nga fa. Wena a wu swi voni swaku vanhu va le Ninivha i va lisima ku tlula xinsinyani lexi?