Ntsumi Ya Yehovha Yi Vhikele Hezekiya

Mfumu wa Vaasiriya se a wu dumele 10 wa tinxaka ta Israyele wu tlhela wu ti hlula. Funtshi se a wu lava ku dumela mfumu wa tinxaka timbirhi ta Yuda. Senakeribi hosi ya Vaasiriya a a dumela madoropa ya Yuda hi lin’we hi lin’we. Kambe doropa leli a a li lava hintamu a a li doropa la Yerusalema. Kambe leswi a a nga swi tivi hi leswaku Yehovha a a li vhikela doropa leli.

Hezekiya hosi ya Yuda a nyike Senakeribi male ya yinyingi leswaku a nga dumeli aYerusalema. Senakeribi a yi tekile male leyo, hambileswo a rhumele masonchwa ya yena ya matimba leswaku ma ya dumela a doropa leli. Vanhu va sungule ku chava hintamu, kambe Vaasiriya a va ya va tshinela. Se Hezekiya a byele xitshungu a ku:

— Mi nga chavi, Vaasiriya va ni matimba kambe Yehovha a ta hi pfuna leswaku hi va ni matimba ku va tlula.

Senakeribi a rhume Rabuxaki leswaku a ya aYerusalema, nkama lowu Rabuxaki a nga fika aYerusalema, a fike a nyima phambheni ka doropa a sungula ku poyilela xitshungu a ku:

— Yehovha a nga ta mi pfuna n’wina, Hezekiya o lava ku mi kanganyisa, a ku na xikwembu lexi nga kotaka ku vhikela doropa la xona ka hina.

Hezekiya a vutise Yehovha leswi a a fanele a swi yendla, Yehovha a hlamule Hezekiya a ku:

— U nga chavi leswi Senakeribi a nga swi vula, Senakeribi a nga ta li dumela doropa la Yerusalema.

Loko se ku hundze leswo, Hezekiya a yamukele a makarta lawa a ma ta hi ka Senakeribi lawa a ma ku:

— Yehovha a nge mi vhikeli ka mina.

Hezekiya a sungule ku khongela ka Yehovha a ku:

— Yehovha ha ku kombela leswaku u hi vhikela, leswaku vanhu va ta swi tiva swaku hi wena Xikwembu xa ntiyiso.

Yehovha a hlamule Hezekiya a ku:

— A hosi ya Vaasiriya a yi nga ta li dumela doropa la Yerusalema, mina ni ta vhikela doropa la mina.

Masonchwa ya Vaasiriya ma fambile ma ya aYerusalema, na ma lava ku ya dumela a doropa. Phela Senakeribi a a pimisa swaku a ta swi kota ku nghena ka doropa la Yerusalema. Kambe wa swi tiva swaku ku yendleke yini? Niwusiku Yehovha a rhumele a ntsumi ya yena leswaku yi ya lani masonchwa ya Vaasiriya a ma li kona, yi fika yi dlaya 185.000 wa masonchwa. Masonchwa hinkwawu ya matimba ya Senakeribi ma dlayiwile. Phela Senakeribi a a nga ha na xa ku xi yendla, a yo suka a muka kaya ka yena. Yehovha a swi yendlile hinkwaswu leswi a nga swi tshembisa, a vhikele Hezekiya ni doropa la Yerusalema. Se wena ke, loko a wo va Yerusalema i mpsini leswi a wu ta va u swi yendlile?