Mimuru Ya Yerusalema

Ka minkama ya Ezra a ku ni Muyisrayele mun’wani lweyi vito la yena a a li Nehemiya. Yena a a tirha kaya ka hosi ya Persiya leyi a yi vitaniwa Artaxexe. Siku lin’wani makwavu wa Nehemiya a vuye hi Yuda ni mahungu ya ku kala ma nga tsakisi. Yena a byele Nehemiya a ku:

— Vanhu lava va nga tlhelela aYerusalema se va le nghozini, phela mimuru a yi se lunghisiwa anze namuntlha ni swipfalu swa doropa leswi nga wonhiwa hi Vababilona naswona a swi se lunghisiwa.

Leswo swi yendle Nehemiya a nga ha tsaki. Yena a a swi lava hintamu ku ya aYerusalema leswaku a ya pfunisa, kambe a a nga swi tivi swaku hosi yi ta mu pfumelela. Se a khongele ka Yehovha a kombela ku pfuniwa.

Siku lin’wani hosi yi vone leswaku Nehemiya a a nga tsakanga, se yi mu vutisa swaku hi mhaka muni a a kwatile. Nehemiya a vulavule hi leswi mimuru ni swipfalu a swi tshamise xiswona. Hosi yi mu vutisile yi ku:

— Ni nga yendla yini leswaku ni ku pfuna?

Ka nkama wolowo Nehemiya a khongele ka Yehovha, a gama a ku:

— Ni kombela u ni tshika ni ya Yerusalema ni ya pfuxeta mimuru ya doropa

Hosi Artaxexe a mu pfumelelile Nehemiya leswaku a famba a ya Yerusalema, funtshi a tlhele a yendla hinkwaswu leswi a nga swi kota leswaku Nehemiya a va ni liyendzo lalinene, hosi yi tlhele yi veka Nehemiya leswaku a va govhernadori wa Yuda. Yi tlhele yi mu nyika timhandzi leswaku a ya ti tirhisa ka ku hamba swipfalu swa doropa la Yerusalema.

Nkama lowu Nehemiya a nga fika Yerusalema, a vone leswi mimuru ya doropa a yi tshamise xiswona, a gama a hlengeleta vavanuna hinkwavu va lisima va Yerusalema a ku:

— A swilo a swi tshamisekanga, swi lava leswaku hi yendla xan’wanchumu leswaku hi swi lunghisa.

Hinkwavu va pfumelile ku pfuxeta mimuru, kambe a ku ni van’wani lava a va nyenya Vayisrayele lava nga sungula ku va hleka va ku:

— Mimuru leyi, a yi tiyelanga hambi hi mbyana ya khwati yi nga yi diliza.

Kambe Vayisrayele a va godolanga va tame va tirha, loko se ku hundze nkama a mimuru a yi tama yi leha yi tlhela yi tiya swinene.

Lava a va nyenya Vayisrayele a va lava ku dumela doropa la Yerusalema, na vona va nga swi tivi. Nkama lowu Vayuda va nga swi tiva leswo va sungule ku chava hintamu, kambe Nehemiya a va byele a ku:

— Mi nga chaveni, Yehovha a na hina.

Nehemiya a game a veka vagwardu leswaku va vhikela lava a va lunghisa mimuru, se lava a va lava ku dumela doropa la Yerusalema a va ha swi kotanga ku li dumela.

Loko se ku hundze 52 wa masiku, mimuru ni swipfalu se a swi lunghile. Leswaku ku hambiwa a fexta Nehemiya a tise Valevhi hinkwavu aYerusalema a tlhela a va yava hi mintlawa yimbirhi. Nehemiya a ve ka ntlawa wun’we, Ezra a va ka wun’wani, mintlawa leyi ya yimbirhi yi khwele ka mimuru yi gama yi hambana. Mintlawa leyi yi fambe hi matlhelo ya ku hambana yi rhendzeleke doropa hinkwalu na yi yimbelela tinsimu ka Yehovha anze yi ya kumana atempeleni. Vavanuna, vavasati ni vana hinkwavu va nyikele magandzelo ka Yehovha aYerusalema. Vona a va tsake hintamu lakaku hambi u li kule a swi koteka ku twa marito ya vona.