Ku Psaliwa Ka Yesu

A ku ni murhangeli mun’wani aRoma, lweyi a a vitaniwa Khezari Auguxtu. Yena a humese nawu wa leswaku Vayuda hinkwavu va ya titsalisa lomu va nga psaliwa kona. Hi mhaka leyo Yosefa na Mariya va fambile va ya Betlehema lomu Yosefa a nga psaliwa kona. Kambe nkama wa leswaku Mariya a psala se a wu li kusuhi.

Nkama lowu va nga fika aBetlehema, ndhawu leyi va nga yi kuma leswaku va tshama ka yona a ve lani swiharhi a swi tshama kona, se Yesu a psaleliwe ka ndhawu yoleyo. Nkama lowu Yesu a nga psaliwa, Mariya a mu phutsele hi tipanu a gama a mu veka lani swiharhi a swi dlela kona.

A ku ni vavanuna lava a va lusa tinyempfu ta vona, ka ndhawu leyi a yi kumeka kusuhi ni Betlehema. Na va nga swi nyimelanga, ku humelele ntsumi ku tlhela ku phatima hintamu se vavanuna lavayani a va lusa swifuyu va sungule ku chava hintamu, kambe ntsumi yi va byelile yi ku:

— Mi nga chaveni, ni tele ku ta mi byela mahungu ya ku tsakisa, Mesiya a psaliwile aBetlehema.

Hi nkama wolowo ku humelele tintsumi ta tinyingi ti fika ti ku:

— Dzunisani Xikwembu lexi nga matilweni, naswona a ku ve ni ku rhula lani misaveni.

Tintsumi ti game ti famba. Se i mpsini leswi valusi va nga swi yendla? Va sungule ku byelana va ku:

— A hi fambeni aBetlehema swoswi.

Nkama va nga fika aBetlehema va kume Yosefa na Mariya ni xibebetani lexi a xa ha ku psaliwa na va li lani a ku tshama swiharhi. Hinkwavu lava va nga twa leswi ntsumi yi nga swi byela valusi lavayani va hlamalile hintamu. Mariya a pimise hi marito ya ntsumi liyani naswona a nga ma khohlwanga. Valusi va game va tlhela lani a ku ni tinyempfu ta vona na va khensa Yehovha hi swilo hinkwaswu leswi va nga swi vona, ni swilo hinkwaswu leswi va nga swi twa.