Yesu Ni Wansati Wa Musamariya

Loko Paxkwa se li helile, Yesu ni vadjondzisiwa va yena va tlhelele aGalileya. Va hundze hi Samariya se Yesu a fike a nyima kusuhi ni xihlovo leswaku a humula, se vadjondzisiwa va yena va ye doropeni leswaku va ya xava swakudla.

Ku game ku fika wansati wa Musamariya lweyi a a lava ku kha mati ka xihlovo. Se Yesu a mu kombela mati ya matsongo. Wansati lweyi swi mu hlamalisile leswo, a byele Yesu a ku:

— Mina ni Musamariya, phela Vayuda a va vulavuli ni Vasamariya.

Se Yesu a mu hlamula a ku:

— Phela wena a wu swi tivi swaku mina ni mani. Loko a wo swi tiva a wu ta ni kombela mati, se mina a ni ta ku nyika mati ya wutomi.

Wansati lwiyani a mu vutisa a ku:

— U lava ku vula yini hi leswo? Phela wena hambi hi bakidi la ku kha mati a wu na lona.

Yesu a mu hlamula a ku:

— Lweyi a phuzaka mati lawa ni nga na wona, a nga ha ta tlhela a twa torha ni siku ni lin’we.

Se wansati a ku:

— Hosi ni kombela u ni nyika mati lawo.

Se Yesu a kombela wansati lwiyani leswaku a ya vitana nuna wa yena, kambe yena a te a a nga na nuna. Yesu a byele wansati lwiyani a ku:

— Leswi u swi vulaka i ntiyiso, wena se u chade ka 5 naswona swoswi u tshama ni wanuna wa ku kala a nga li wa wena.

Wansati lwiyani a hlamale hintamu a tlhela a swi vona swaku Yesu a a li muprofeta. Yena a te:

— Vasamariya va kholwa swaku va nga gandzela Xikwembu kola Samariya, kambe Vayuda va pimisa leswaku xi fanele xi gandzeliwa aYerusalema ntsena. Na swi tiva swaku Mesiya a ta fika leswaku a hi djondzisa leswi hi faneleke hi mu gandzelisa xiswona Yehovha.

Yesu a game a byela wansati lwiyani nchumu wa ku a a nga se tshama a byela munhu. Yena a te:

— Hi mina Mesiya.

Wansati lwiyani a tsutsumile a ya ka doropa la yena a ya byela Vasamariya a ku:

— Ni kumane ni wanuna lweyi a tivaka swilo hinkwaswu swa wutomi la mina. Ni pimisa leswaku wanuna lweyi i Mesiya, tanani mi ta mu vona.

Vasamariya va fambile ni wansati lwiyani ka xihlovo leswaku va ya vona Yesu.

Se vanhu va le Samariya va kombele Yesu leswaku a tshama ka doropa la vona. Yesu a tshame masiku mambirhi na a djondzisa vanhu, ku tala ka vona va sungule ku kholwa leswaku Yesu a a li Mesiya. Loko va twe leswi Yesu a a swi vula, vanhu va doropa va byele wansati lweyi wa Musamariya va ku:

— Swoswi ha swi twisisa leswaku wanuna lweyi hi yena lweyi a nga ta ponisa vanhu.