Yesu A Chumayela Hi Mfumu Wa Xikwembu

Na wa ha li ku tsakamisiwa, Yesu a sungule ku chumayela hi Mfumu wa Xikwembu, a vula swaku a wu li kusuhi ni ku fika. Yesu a chumayelile aGalileya ni Yudiya na a li ni vadjondzisiwa va yena. A game a suka a ya aNazareta ka doropa leli a nga kulela ka lona. Nkama a nga fika Nazareta, a nghene ka ndhawu leyi a ku gandzeliwa ka yona Yehovha a lerha wuprofeta la Esaya hi rito la ku tlakuka, a ku:

— Yehovha a ni nyike moya wa ku kwetsima leswaku ni chumayela mahungu ya ku tsakisa.

Wa swi tiva swaku hi mhaka muni Yesu a vule leswo? Hi mhaka vanhu a va lava leswaku yena a yendla swilo swa ku hlamalisa ntsena, kambe Yehovha a a nyike Yesu moya wa ku kwetsima leswaku a chumayela hi Mfumu wa yena. Yesu a va byele a ku:

— Namuntlha wuprofeta leli la Esaya li hetisekile.

Loko se ku hundze leswo, Yesu a ye ka Lwandle la Galileya. Ka lwandle lelo, a fike a kuma 4 wa vadjondzisiwa, a ku li Pedru, Andre, Yakobe na Yohani. Hinkwavu va 4 a va li vaphasi va tihlampfi. Se Yesu a va byele a ku:

— Ni landzeleni, mina ni ta mi djondzisa ku va vaphasi va vanhu.

Hi nkama wolowo, vona va tshike ku va vaphasi va tihlampfi va landzela Yesu. Vona va fambe ka doropa hinkwalu la Galileya na va chumayela hi Mfumu wa Yehovha. Vona a va chumayela ka tindhawu leti a ku gandzeliwa ka tona Yehovha, mabazara ni lomu tindleleni. Hinkwaku lomu Yesu a a ya kona a ku ni vanhu va vanyingi lava a va mu landzela, hambi hi Siriya lani a ku kumeka kule swinene, vanhu a va twa na ku vulavuliwa hi Yesu.

Loko se ku hundze nkamanyana, Yesu a nyike van’wani va vadjondzisiwa va yena matimba leswaku va daha mavabyi, ni ku hlongola madimoni. Yesu ni vadjondzisiwa van’wani va yena va fambe va ya chumayela ka madoropa ni swidoropani. Vavasati va ku tshembeka va ku fana na Mariya Madalena, Jowana na Suzana, a va yendla hinkwaswu leswi va nga swi kotaka swaku va pfuna Yesu ni vadjondzisiwa va yena.

Loko Yesu se a va djondzisile leswi a va fanele va chumayelisa xiswona, vadjondzisiwa va Yesu va fambile va ya chumayela aGalileya hinkwaku. Vanhu va vanyingi lava va nga twa mahungu ya Mfumu wa Xikwembu va ma yamukelile naswona ku tala ka vona va ve vadjondzisiwa va tlhela va tsakamisiwa. Kambe a ka ha ni vanhu va vanyingi lava a va fanele va djondza hi Mfumu wa Xikwembu. Hi mhaka leyo, Yesu a va fananise ni masimu lawa se a ma lava ku tshoveliwa. Yena a te:

— Khongelani mi kombela Yehovha leswaku a rhumela vanhu swaku va ta tirha ka ku tshovela.

Loko se ku hundze nkama, Yesu a lange 70 wa vadjondzisiwa, yena a va rhume hi vambirhi vambirhi leswaku va ya chumayela hi Mfumu wa Xikwembu ka tiko hinkwalu la Yudiya. Vadjondzisiwa va chumayele vanhu va ku hambanahambana naswona va vuye na va tsakile, va fika va byela Yesu swaku ntirho a wu fambe kahle. Hambi Davulosi a a nga ta swi kota ku nyimisa ntirho lowu wa ku chumayela.

Hambileswi Yesu a a swi tiva swaku a ta tlhelela atilweni, yena a a lava swaku vadjondzisiwa va yena va tama va chumayela hi Mfumu wa Xikwembu. Hi mhaka leyo, a va rhume a ku:

— Chumayelani hi Mfumu wa Xikwembu misaveni hinkwayu. Djondzisani vanhu Rito la Xikwembu mi tlhela mi va tsakamisa.