Yesu A Yendle Swilo Swa Swinyingi Swa Ku Hlamalisa

Yehovha a rhume Yesu lani misaveni leswaku a ta chumayela hi Mfumu wa Xikwembu. Kambe Yehovha a tlhele a nyika Yesu matimba ya ku yendla swilo swa ku hlamalisa. Swilo leswi Yesu a a swi yendla a swi kombisa leswi a a ta swi yendla loko se a li Hosi ya Mfumu wa Xikwembu. Yesu a a swi kota ku hanyisa vanhu ka mavabyi, hi mhaka leyo a vanhu va vanyingi a va ya ka yena leswaku a ya va hanyisa. Yesu a a hanyisa vanhu va ku fa matihlo, va ku fa tindleve ni va ku limala. Yena a a tlhela a hlongola ni madimoni. Vanhu van’wani a va hanyisiwa hambi hi ku khumba mpahla ya yena ntsena. Se hinkwaku lomu yena a a ya kona a va mu landzelela. Phela Yesu a a nga tshiki ku va pfuna hambiloko a lava ku humula.

Siku lin’wani vavanuna van’wani va teke wanuna lweyi a a limalile naswona a a nga fambi, va famba na yena ka munti lowu Yesu a a li ka wona. Kambe ka munti wolowo a ku ni vanhu va vanyingi lakaku a va nga swi koti ku nghena. Se vavanuna lava, va khwele henhla ka yindlo va fika va boxa va nghenisa wanuna lweyi a a limalile lani Yesu a a li kona. Yesu a byele wanuna lweyi a ku:

— Pfuka u famba.

Se, wanuna lweyi a pfukile a sungula ku fambafamba. Vanhu hinkwavu lava a va li kolanu va hlamalile hintamu.

Siku lin’wani Yesu a ye ka xidoropani, ka xidoropani lexo a ku ni 10 wa vavanuna lava a va ni mavabyi ya ku bola xikhumba. Nkama lowu va nga mu vona, vavanuna lava va sungule ku mu landzela. Ka nkama wa Yesu, lweyi a a ni mavabyi ya ku bola xikhumba a a nga fanelanga a tshinela lani a ku ni vanhu van’wani. Hi mhaka yoleyo vona va huwelelile hi rito leli nga tlakuka na va li kule va ku:

— Yesu, hi pfuni!

Yesu a byele vavanuna lavayani swaku va ya tempeleni, na va li a ndleleni ya ku ya tempeleni vona va dahiwile. Loko mun’we wa vona lweyi a a ni mavabyi wolawo a vona swaku a dahiwile, a tlhelile a ya khensa Yesu ni Xikwembu. Ka lava va 10 i mun’we ntsena lweyi a nga khensa.

A ku ni wansati mun’wani lweyi a a vabya ku ringana 12 wa malembe, yena a a swi lava hintamu ku dahiwa. Yena a nghene xikarhi ka vanhu a fika a nyima ndzhaku ka Yesu a khumba mpahla ya yena, hi nkama wolowo yena a dahekile. Yesu a swi twile swaku ku ni munhu lweyi a nga mu khumba, a gama a vutisa swaku i mani a nga mu khumba. Wansati lweyo a sungule ku chava hintamu, hikusa lweyi a a ni mavabyi wolawo a a nga fanelanga ku va xikarhi ka vanhu van’wani. Hambileswo wansati lwiyani a vule swaku hi yena a nga khumba Yesu. Yena a mu tiyisile wansati lwiyani a ku:

— N’wananga, famba hi ku rhula.

Wanuna mun’wani lweyi a a vitaniwa Yayiro a ye a ya vulavula na Yesu a kombela leswaku a ya kaya ka yena a ya hanyisa xin’wanani xa yena xa wansati lexi a xi vabya hintamu. Kambe na Yesu a nga se fika kaya ka Yayiro, xin’wanani lexiyani xi file. Nkama Yesu a nga fika, a kume vanhu va vanyingi na va rila. Se Yesu a va byele a ku:

— Mi nga rili, n’wana lweyi a yo yetlela ntsena.

Yesu a game a khoma voko la xin’wanani lexiyani a ku:

— N’wananga pfuka.

Nkama lowu Yesu a nga vula leswo, xin’wanani lexiyani xi yo tekela ku pfuka. Se Yesu a byele vapsali va xin’wanani lexiyani leswaku va xi nyika swakudla. Pimisa hi leswi vapsali va xona va nga tsakisa xiswona nkama Yesu a nga pfuxa xin’wanani lexi.