Yesu A Lange 12 Wa Vapostolo

Loko Yesu se a chumayele lembe ni hafu, a swi lava leswaku a yendla xiboho xa lisima hintamu. A a fanele a langa lava a a ta tirha na vona ka ntirho wa ku chumayela, ni lava a va ta hlayisa mabandla ya ku sungula ya Wukreste. Yesu a lave ku pfuniwa hi Yehovha leswaku a yendla xiboho lexo. Hi mhaka leyo a fambe yexe ka ntshava leswaku a ya khongela wusiku hinkwalu. Nimixo a fike a hlengeleta vadjondzisiwa va yena a langa lava a va ta va 12 wa vapostolo. Mavito ya vona a ku li: Pedru, Andre, Yakobe, Yohani, Filipi, Bartolomewu, Tomasi, Matewu, Yakobe n’wana wa Alfewu, Tadewu, Simoni, na Yuda Skariyota.

Vavanuna lava va 12 a va fambafamba na Yesu. Loko se va djondzisiwile leswi a va fanele va chumayelisa xiswona, vapostolo va fambe va ya chumayela na va li voxe. Yehovha a va nyike matimba leswaku va hlongola madimoni ni ku hanyisa lava a va vabya.

Yesu a a vona vadjondzisiwa lava va 12 na va li vanghanu va yena funtshi a a va tshemba. Vapostolo lava a va fambafamba na Yesu ka minkama ya lisima swinene, na a nga se fa ni loko se a pfuxiwile. Ku fana na Yesu, ku tala ka vapostolo a va li va Galileya naswona van’wani va vona a va chadile. Vafarisi a va nga va voni na va li va lisima vapostolo, hikusa a va nga djondzanga ka swikola leswi a swi voniwa swi li swa lisima hi nkama lowuyani, kambe vona a va djondzisiwile hi Yesu leswaku va yendla ntirho wa ku chumayela.

Vapostolo a va nga hetisekanga, na vona minkama yin’wani a va yendla swihoxo. Minkama yin’wani a va khuluma na va nga pimisanga, a va yendla swiboho leswi a swi nga li swinene, naswona minkama yin’wani a va nga lehisi mbilu. A va tlhela va holova hi ku lava ku tiva leswaku a ku li mani wa lisima hintamu ka vona. Kambe vona a va li vanhu vavanene naswona a va mu rhandza Yehovha. Phela hi vona lava a va ta pfunisa leswaku ku va ni mabandla ya ku sungula ya Wukreste loko Yesu se a tlhelelile atilweni.