I Yini Xidjoho?
Nhlamulu ya Bibele
Xidjoho i xilo xin’wani ni xin’wani lexi hi xi yendlaka, leswi hi titwisaka xiswona, leswi hi swi pimisaka leswi kalaka swi nga fambisani ni ku rhandza ka Xikwembu. Loko munhu a djoha a nga yingisi minawu ya Xikwembu hikusa a yendla swilo swa ku biha kumbe swa ku kala swi nga li swinene hi ku ya hi mavonelo ya xona. (1 Yohani 3:4; 5:17) Bibele li tlhela li vulavula hi xidjoho xa ku kala hi nga yendli swilo swaswinene na hi swi tiva. — Yakobe 4:17.
Ka tirimi leti Bibele a li tsaliwe hi tona ku sunguleni, rito leli nge xidjoho li vula ku phukwa loko u txopa. Hi xikombiso, a minkameni ya vayisrayele va khale, a ku ni masonchwa lawa a ma swi kota ku txukumetela kahle maribye naswona a ma nga phukwi kumbe hi ma hlayela man’wani, a ma nga djohi. (Vayavanyisi 20:16) Hi mhaka leyo, ku djoha swi vula ku va munhu a phukwa ku yingisa minawu ya ku lulama ya Xikwembu.
Xikwembu hi xona xi nga hi yendla, naswona xi ni mfanelo ya ku hi byela leswi nga swinene ni leswi kalaka swi nga li swinene. (Nhlawutelo 4:11) Loko hi nga swi yendli leswi xi swi lavaka hi ta tihlamulela ka xona. — Varoma 14:12.
Swa koteka ku va munhu a nga djohi?
Ihim. Bibele li vula swaku vanhu “hinkwavu va djohile naswona a va swi koti ku kombisa wumunhu la ku hlamalisa la Xikwembu.” (Varoma 3:23; 1 Tihosi 8:46; Ekleziyaxta 7:20; 1 Yohani 1:8) Hi mhaka muni leswo swi yendleka?
Vanhu va ku sungula ku nga Adamu na Evha a va nga li vadjohi. Va yendliwe hi xifaniso xa Xikwembu. (Genesa1:27) Hambileswo, nkama va kalaka va nga xi yingisanga Xikwembu va ve vadjohi. (Genesa 3:5, 6, 17-19) Nkama va nga va ni vana, va va tlulete xidjoho xolexo ku fana ni mavabyi lawa ma tlulelanaka. (Varoma 5:12) Hosi Davhida a pfumelelane na yona mhaka leyo nkama a nga vula leswi: “Ni psaliwe na ni ni xihoxo”. — Tipisalema 51:5.
Ku nga va swaku ku ni swidjoho swaswikulu ku tlula swin’wani?
Ina. Hi xikombiso a Bibele li vula swaku vanhu va Sodoma “a va yendla swilo swa ku biha swinene, naswona swidjoho swa vona a swi li swikulu hintamu.” (Genesa 13:13; 18:20) Vona swilo swinharhu leswi nga hi pfunaka ku vona swaku xidjoho i xikulu kumbe a hi xikulu.
Muxaka wa xidjoho. Bibele li vula swaku a hi fanelanga hi yendla swidjoho swaswikulu swa ku fana ni wuntunga la swa masangu, ku gandzela swikwembu swa mavunhwa, ku yiva, ku dakwa, ku kanganyisa, ku dlaya ni ku tirhisa wudimona. (1 Vakorinto 6:9-11; Nhlawutelo 21:8) Bibele li kombisa swaku swidjoho leswi i swikulu hintamu naswona a swi fani ni swidjoho leswi munhu a swi yendlaka hi ku phazama swa ku fana ni ku yendla nchumu kumbe ku vula nchumu lexi nga kwatisaka van’wani. (Swivuriso 12:18; Vaefeza 4:31, 32) Kambe Bibele li vula swaku a ku na xidjoho ni xin’we lexi hi faneleke hi xi vonela hansi, phela loko hi swi vonela hansi swidjoho swaswitsongo, swi nga hi yendla swaku hi yendla swidjoho swaswikulu hintamu. — Matewu 5:27, 28.
Leswi yendlaka munhu a djoha. Van’wani va djoha hi mhaka ya leswi va kalaka va nga yi tivi minawu ya Xikwembu. (Mintirho 17:30; 1 Timotiya 1:13) Bibele a li swi tekeli hansi swidjoho swoleswo kambe li kombisa swaku a swi fani ni ku kala hi nga yingisi minawu ya Xikwembu hi maxivomu. (Tinhlayo 15:30, 31) Munhu lweyi a djohaka hi maxivomu a ni ‘mbilu ya ku biha.’ — Yeremiya16:12.
Ku djoha hi ku phindhaphindha. Bibele li tlhela li kombisa ku hambana loku nga kona xikarhi ka ku va munhu a djoha kan’we ni ku va a djoha hi nkama wa ku leha. (1 Yohani 3:4-8) Xikwembu xa mu nyenya munhu lweyi a djondzaka leswi nga swinene kambe a tamaka a “djoha hi maxivomu.” — Vaheberu 10:26, 27.
Munhu lweyi a nga yendla xidjoho xaxikulu a nga ha biwa hi lipfalu a titwa nandzu hileswi a nga swi yendla. Hi xikombiso, Hosi Davhida a te: “Hikusa minandzu ya mina i yinyingi hintamu; yi ni tika ku fana ni xidjumba xa ku tika lexi ni tsandzekaka ku xi rhwala.” (Tipisalema 38:4) Kambe Bibele la hi tiyisa hikusa li li: “Lweyi a yendlaka swa ku biha a a tshiki mahanyelo ya yena, Ni munhu wa ku biha a a tshiki mimpimiso ya yena; A a tlhelele ka Yehovha, lweyi a nga ta mu twela wusiwana ka Xikwembu xa hina, hikusa xi ta rivalela hi mbilu hinkwayu.” — Esaya 55:7.