Úkuecha

4 Engaksï jamberi tsimarhani iretarhu anapu kʼuiripuechani jingoni uandontskuarheni japka, jimajkuksï niáraspti saserdotiicha, templurhu anapu kuári ka saduseuecha. 2 Kánikuaksï ikiaxapti, jimbokaksï apostoliicha jorhendaaxapka iretarhu anapu kʼuiripuechani ka jimbokaksï uandantasïreenga eska Jesúsi tsíntaspka. 3 Ísï jimbo, jupikaasptiksï ka kuáriicha jingonksï peeraaspti pauandikua jamberi, jimboka chúrixapkia. 4 Joperuksï uánikua kʼuiripuecha engaksï kurhaapka ambe engaksï imeecha aianguapka niárasptiksï jakajkuni; ma 5 mili achamasïichaksï jakajkuspti.

5 Ísï pauandikua, Jerusalénksï tánguarhintaspti jima anapu juramutiicha, orhejtsïkutiicha ka karariicha, 6 ka ístu jima jarhaspti kʼéri saserdoti Anási ka Kaifási, Juanu, Alejandru ka iámindu kʼéri saserdotiiri parientiicha. 7 Terujkanksï peeraspti Pedruni ka Juanuni, ka ueenasptiksï kurhamarhiani: “¿Néksïni arhiski parajtsï ísï úni? ¿O neeri nombri jimbojtsï úski ini ambe?”. 8 Jimajkani Pedru espiritu santu intsïnhaspti, ka arhiaspti:

“Iretarhu anapu juramutiicha ka orhejtsïkutiicha, 9 engajtsïni ísï kurhamarhini jaka iásï andichisï ambakeranta ini acheetini enga no ueenga xanharani, ka engajtsï uéjka míteni né ambakerantaski, 10 chá ka iámindu Israeli anapuecha sési mítetini ja je eska i acheeti ambakeranhantaska tata Jesukristueri nombri jimbo, enga Nasareti anapueka, imani engajtsï chá chkarirhu ma cháparhataka joperu enga Tata Diosï tsítantaka. Ka imani jimbo, i acheeti sési jarhastia ka ixú jarhastia chánksïni jingoni. 11 I jindeesti ‘ima tsakapu, engajtsï chá kʼumanchikua úriicha, no sáni jaiapanhentaka ka iásï inde jindeestia sánderu ambakiti tsakapu’.* 12 Ístu, no nema jarhasti engaksï jimbo kʼuiripuecha uaaka pʼímutantskata uérani, jimboka echerirhu no jarhaska máteru nombri enga Tata Diosï erakuka parachi jucha pʼímutantskata uérani”.

13 Jiájkani kʼuiripuechaksï ísku pakaraspti engaksï exepka Pedruni ka Juanuni eskaksï no sáni chéparini jámasïreenga,* nájkirukaksï ísïipka eska náki uéjki kʼuiripu ma ka nájkirukaksï no ióni jámapka eskuela.* Ka míteantasptiksï eskaksï Jesúsini jingoni jámasïreenga. 14 Ka jimboka imeecha jingoni jámaxapka ima achamasï enga ambakeranhantapka, kʼuiripuechaksï nóteru ambe ma úsptia uandani. 15 Jimajkani, arhiasptiksï eskaksï uéntapiringa jima uératini nani engaksï Kʼérati Juesiicha* japka ka imaksï jima pakaraspti uandontskuarheni. 16 Ka uandasïreendiksï: “¿Ambechi úkuaua ini achamasïichani? Jimbokaksï iámindu Jerusaléni anapuecha uandasïnga eskaksï i achamasïicha kʼéri milagru ma úska, ka nóchi uaaka uandani eska no ísïiska. 17 Ísï jimbo, paraka no sánderu uánikua kʼuiripuecha míteaka ini ambe, ju je chéraani ka arhiauakachi eskaksï nóteru jámaakia uandantani indeni achamasïiri nombri jimbo”.

18 Jimajkanksï ménderu uandajpaaspti, ka arhiasptiksï eskaksï méntku nóteru jámapiringia uandantani nijtu jorhentpini Jesúsiiri nombri jimbo. 19 Joperu Pedru ka Juanu, arhiasptiksï: “Enga Tata Diosï sési exejka paraksïni jucha chánksïni kurhajchani ka no Tata Diosïni, chájtsï míteskia. 20 Joperu jucha no uaaka no uandantani ima ambeeri engachi exekuarhika ka engachi kurhaaka”. 21 Ísï jimbo, engaksï na ménderu chéraapkia, jurajkuasptiksï jimbokaksï no ma ambe exekuantaspka ka ístu jimbokaksï chérhiasïreenga iretarhu anapu kʼuiripuechani, jimbokaksï iáminduecha kʼéri ambe arhixapka Tata Diosïni imani ambe jimbo enga úkuarhipka. 22 Jimboka jukari 40 uéxurhini jatiriispkia ima acheeti enga ini milagru* jingoni ambakeranhantapka.

23 Ísï tátsekua engaksï na jurajkunhapkia, imeechaksï niraspti jima engaksï máteru chúxapatiicha japka, ka aianguasptiksï ambe engaksï kʼérati saserdotiicha ka orhejtsïkutiicha arhiapka. 24 Ka engaksï ísï kurhaapka, májku kʼériksï kómarhispti Tata Diosïni ka arhisptiksï:

“Juchaari Tata, tʼuri jindeeska sánderu Kʼéri Juramuti, tʼuri úska auandani, echerini, marini ka ístu ambe enga xáni jaka auandarhu, echerirhu ka marirhu, 25 ka tʼurisï espiritu santu jimbo uandarapka Dabidini, enga jindeeka juchaari ióntki anapu parienti, enga chiiti jántspiriipka, jiáni enga uandapka: ‘¿Andiksïsï kʼérati iretarhu anapuecha xáni ikia ka andiksïsï iretarhu anapuecha ísku ambe ma eratsi? 26 Parhakpini anapu reiichaksï jauarasti ka juramutiichaksï tánguarhintasti ka májkuksï úkuarhintasti paraksï Tata Diosï Jeobani jingoni uarhipeni ka imeeri erakukatani* jingoni’. 27 Ka ísï úkuarhisti, jimboka Erodesi ka Ponsiu Pilatu ini iretarhuksï kúnguarhintaska Israeli anapu kʼuiripuechani jingoni ka ístu máteru ireteechani jingoni paraksï Jesúsini jingoni uarhipeni, chiiti pímbinhasï jántspiri, imani engari tʼu erakuka, 28 imaksï kúnguarhintasti paraksï úni ambe engari tʼu tʼuini uandarini japkia ka ísï úkuarhisti chiiti uinhapikua jimbo ka jimbokari tʼu ísï uékaska. 29 Tata Diosï Jeoba, kurhaa na engajtsïni chérani jaka ka jarhuataa chiiti jántspiriichani paraksï seguiriini no sáni chéparini uandantani chiiti uandakuani, 30 engari jamberi tʼu chiiti uinhapikua jingoni ambakeraantani jauaka kʼuiripuechani ka engari jamberi milagruechani uaauaka ka uánikua máteru ambe* Jesúsiiri nombri jimbo, enga chiiti pímbinhasï jántspiriika”.

31 Engaksï na mintsita jingoni kómarhipkia Tata Diosïni, ueenaspti jencheni jima engaksï imeecha tánguarhintatini japka, ka espiritu santu iáminduechani andarhieraaspti mándani arhini ka ueenasptiksï no sáni chéparini uandantani Tata Diosïiri uandakueri ambe.

32 Ka ístu, iámindu jakajkutiichaksï májku mintsita ka májku eratsekua jatsispti,* ka no nema imeerakuarhisïreendi ambe ma, sánderu sési, iámindu ambeksï intsïmperasïreendi. 33 Ka apostoliichaksï seguiriispti kánikua sési uandantani Jesúsiiri* tsíntskueri ambe. Ka Tata Diosï kánikua kóndiantaaspti* iáminduechani. 34 Ka no nema uétarhinchasïreendi, jimboka imeecha engaksï echeri ambe jatsikuarhepka o kʼumanchikuechani, íntspikuarhiasïreendiksï ka engaksï íntspikuarhiengia juásïreendiksï sentabu 35 ka apostoliichanksï íntsaasïreendi. Ka tátsekuaksï arhukuntasïreendi ísï eska na uétarhinchani japiringa mándani kʼuiripu. 36 Jimbosï José, lebita ma enga Chipre anapuepka, ima engaksï apostoliicha ístu arhienga Bernabé —enga arhikuekajka “ima enga sési pʼikuastpentajka”—, 37 íntspikuarhipti echeri ma ka apostoliichani pákuaspti sentabu ka imeechani íntsaaspti.