Roma
13 Iáminduechachi jatsiska para kurhajchaani juramutiichani, jimbokaksï juramutiicha Tata Diosïni jimbosï jaka; nani uéjkiksï jarhani juramutiicha, Tata Diosïsï jima peeraati. 2 Ísï jimbo, ima enga no újka ambe engaksï juramutiicha uandajka, no úni jarhasïndi ambe enga Tata Diosï uaxastakia; imeecha engaksï no újka ambe enga Tata Diosï uaxastakia, kastigarinhaatiksï. 3 Imeecha engaksï sési ambe újka, nóksï chérhiasïndi juramutiichani, joperu imeecha engaksï no sési ambe niátajka, imeechaksï kʼóru chérhiasïndi. Nóri jatsiska para chérhiani jarhani juramutiichani. Sési ambe ú ka imeechaksïni sési arhiati. 4 Jimbokaksï imeecha Tata Diosïnisï jántspikuni* jaka paraksïni tʼungini jarhuatani. Joperu engari no sési ambe niátani jaka, iásï kʼóruri jatsiska para chérhiani, jimbokaksï imeecha intsïnhaska sésikua ka juramukua paraksï kastigariuani imeechani engaksï no sési ambe niátajka. Imeechaksï Tata Diosïni jántspikuxati* paraksï kastigarini imani enga no sési niátajka.
5 Ísï jimbo, jatsiskajtsï para kurhajchaani, joperu no jimbokaksïni kastigariuaka, sánderu sési, jimbokajtsï míteska eska sési jarhaska ísï úni. 6 Jimbojtsïsï chá maiampijka impuestu, jimbokaksï imeecha engaksï juramuni jaka, Tata Diosïnksï jántspikuxati paraksï kʼuiripuechani jarhuataani ka méntkuksï ánchikuarhini jarhasïndi paraksï ísï úni. 7 Íntsaa je iáminduechani ambe engajtsï jatsika para íntsaani: imani engaksïni impuestu kurhacheni jaka, mámaru jásï impuestu íntsku je; imani enga uéjka eskajtsï chénharhiaka, chénharhi je, ka imani enga uéjka eskajtsï janhanharhiaka, janhanharhi je.
8 Asï nemani kángu je ambe ma, arini ambejkujtsïsï jatsika para úni: xénchperani máteruechani jingoni, jimboka ima enga xénchajka máteru kʼuiripuni,* úni jarhasïndia ambe enga xáni uandajka lei. 9 Jimbokaksï inde mandamientuecha engaksï jaka, ísïksï arhisïndi: “Asï jáma ísku jándikua ambe niátani,* asï jáma uándikpini, asï jáma sïpani, asï jáma tsititspeni jámani”. Íksï mandamientuecha ka máteruecha engaksï jaka, májku mandamientuksï úkuarhintasïndi, enga jindeeka: “Xénchaa máteru kʼuiripuechani* ísï eskari tʼujkumindu na xénchakuarhijka”. 10 Ima enga xénchpejka, no nemani no sési úkusïndi. Ísï jimbo, ima enga xénchpejka, úni jarhasïndia ambe enga xáni uandajka lei.
11 Ístu, ú je ini ambe jimbokajtsï chá míteska ambe tiempuchisï irekani jaki. Sésijtsï mítetixaka eskajtsï jatsiska para tsínharhini jimboka nóteru ióni kuerataxakaia parachi pʼímutanhantani, nóteru xáni iónia eska jiáni engachi ueenapka jakajkuni. 12 Iauani chúristia, erandexatiia. Ísï jimbo, ju je jurajkuni imani ambe enga pápkʼandekuarhu úkuarhijka ka ju je jukantani imani ambe enga jindeeka para uarhipeni ka enga tʼíntskuarhu anapueka. 13 Ju je méntkisï sési jámani, ísï eskachi jurhiakua na jámajka; nóchi jatsiska para tsïnchentani kʼuínchikuecharhu, nijtu kauini jámani o ísku jándikua ambe niátani o no sáni kʼuratsekua jingoni niátani no sési jásï ambe.* Nóchi jatsiska para uarhipeni jámani ka nijtu enbidiarpini jámani.* 14 Sánderu sési, jánguarhinta je méntkisï ísï jámani eska Tata Jesukristu ka asï imani ambe eratseni ja je úni ambe enga tsitijka chaari kuerpu enga pekadu jukaraka.