Juanu
3 Jarhaspti fariseu ma enga Nikodemu arhinheenga, judiuecheeri juramuti máespti. 2 Ima chúrikua niraspti exeni Jesúsini ka arhispti: “Jorhentpiri,* míteskachi eskakeni Tata Diosï axaska parari jorhentpini, jimboka no nema úpiringa xárhati milagruechani uaani engari tʼu uaajka enga Tata Diosï no imani jingoni japiringa”. 3 Jesúsi arhispti: “Jíkeni sési jimbo arhisïnga eska enga ma no ménderu andajpenuska,* no uaati Tata Diosïiri Reinuni exeni”. 4 Nikodemu arhispti: “¿Néna uaa ménderu andajpenuni kʼuiripu ma enga tʼarhepikia? ¿Andi uaa ménderu amambeeri matrisirhu niántani para ménderu andajpenuni?”. 5 Jesúsi arhispti: “Jíkeni sési jimbo arhisïnga eska enga nema no itsï ka espiritu santuni jimbo andajpenuska, no uaati inchani Tata Diosïiri Reinurhu. 6 Ima enga kʼuiripuni jimbo kánguarhinhaka, kʼuiripuesti. Ka ima enga espirituni jimbo kánguarhinhaka, espirituesti. 7 Asï eratsentani pakara indeni ambe jimbo engakeni arhika ‘Chájtsï jatsiska para ménderu andajpenuni’. 8 Tarhiata nani uéjkisï tarhiasïndi ka nóri úsïnga míteni nani uératini jurhaxaki ka naniisïsï niraxaki nájkirukari kurhaajka. Ísï úkuarhisïndi imeechani jingoni engaksï espirituni jimbo kánguarhinhaka”.
9 Jimajkani Nikodemu kurhamarhispti: “¿Ka néna uaa i ambe ísï úkuarhini?”. 10 Jesúsi arhispti: “¿Andi tʼu no míteski ini ambe ka jiniri tʼu jorhendaani Israeli anapuechani? 11 Jíkeni sési jimbo arhisïnga eskachi jucha imani ambesï uandajka ambe engachi míteka ka uandantasïngachi imani ambe engachi exeka, joperujtsï chá no jakajkusïnga ambe engachi jucha uandantajka. 12 Jíksïni echerirhu anapu ambe aianguska ka chájtsï no jakajkuska, jiájkani ¿nénajtsï jakajkua engaksïni auandarhu anapu ambe aianguaka? 13 Ístu, no ma kʼuiripu jarhasti enga auandarhu nika, imajkusï jati enga auandarhu uératini juka, Achamasïiri Uájpa. 14 Ka ísï eska Moisési na tarhatapka akuitsini desierturhu, Achamasïiri Uájpajtu ísï tarhatanhaati 15 parakaksï irekaaka para méntkisï imeecha engaksï imani jakajkuaka.
16 ”Tata Diosï xáni xénchaasti parhakpini anapuechani, jimbosï íntspiti imeeri máechakua Uájpani, parakaksï imeecha engaksï imani mintsikaaka nóksï kʼamajkunhaaka, sánderu sési, jatsinksï tsípikua para méntkisï. 17 Jimboka Tata Diosï no axaska imeeri Uájpani paraka jusgariauaka parhakpini anapuechani, sánderu sési, axasti parakaksï parhakpini anapuecha pʼímutantskata uéraaka imani jimbo. 18 Ima enga imani mintsikajka, no jusgarinhaati.* Ima enga no mintsikajka, jusgarinhastia jimboka no mintsikaska Tata Diosïiri máechakua Uájpani. 19 Arini ambe jimboksïsï jusgarinhati: tʼíntskua jurhasti parhakpinirhu ka kʼuiripuechaksï sánderu jaiapanhentasti pápkʼandekuani ka eska tʼíntskuani, jimbokaksï no sési jásï ambe niátasïreenga. 20 Jimboka ima enga no sési ambe niátajka, no jaiapanhentasïndi tʼíntskuani ka no jima nirasïndi nani enga tʼíntskua jaka paraka no mítekuarhiaka ambe* enga no sési úni jaka. 21 Joperu ima enga sési jámajka, jima nirasïndi enga tʼíntskua jaka para sési xarharani eska ima úxaka ambe enga Tata Diosï uéjka”.
22 Tátsekua, Jesúsi imeeri chúxapatiichani jingoni inchaakuspti ireta sapirhatiicharhu engaksï Judea jaka ka jima pakaraspti máru jurhiatikua imeechani jingoni ka itsï ataaspti* kʼuiripuechani. 23 Joperu Juanujtu itsï ataaxapti kʼuiripuechani Salimi no iauanisï, jima enga Enóni arhinhajka jimboka jima kánikua itsï jarhaspka, jimbosï kʼuiripu jima niáreendi para itsï atakuarhini; 24 ka imani jurhiatikuechani jimbo, nótkiksï ónhaxapti Juanuni.
25 Jimajkani Juanueri chúxapatiichaksï arhirperaspti judiu ma jingoni néneespi pímbinhasï jarhani Tata Diosïni japarini. 26 Tátsekuaksï niraspti Juanuni andarhierani ka arhisptiksï: “Jorhentpiri,* exe, ima achamasï enga tʼungini jingoni japka Jordánirhu parhikuteni, ima engari tʼu xáni uandaka, itsï ataaxati kʼuiripuechani ka iáminduechaksï imani jingoni niraxati”. 27 Juanu arhiaspti: “No nema úsïndi pʼirani ambe ma enga no auandarhu uératini intsïnhaaka. 28 Chájtsï mismu kurhaaska eskani ji uandaska ‘No jiiska Kristu, sánderu sési, axanhaska parani ji orhekupani’. 29 Nobiusï jatsiti nobiani. Joperu nobiueri amigu jémba kánikua tsípisïndi enga imani jingoni jarhajka ka enga kurhachakujka. Jimbosïni ji iásï kánikua tsípini jaka. 30 Ima jatsisti para sánderu uánikua ambe úni ka ji nóteru xánia”.
31 Ima enga karhakua uératini jurhajka, sánderu kʼéri ambeesti eska máteruecha. Ima enga echerirhu anapueka, echerirhu anapuesti ka echerirhu anapu ambe uandasïndi. Ima enga auandarhu uératini jurhajka, sánderu kʼéri ambeesti eska máteruecha. 32 Ka imani ambe uandantasïndi ambe enga exeka ka kurhaani, joperu no nema jakajkusïndi ambe enga uandantajka. 33 Ima enga jakajkujka ambe enga ima uandantaka, sési mítestia eska Tata Diosï méntkisï jurhimbikua ambe uandasïnga. 34 Jimboka ima enga Tata Diosï axaka, uandasïndi ambe enga Tata Diosï uandajka, jimboka Tata Diosï kánhachani íntspisïnga* imeeri espiritu. 35 Taati xénchasïndi Uájpani ka iámindu ambe imeeri jájkirhu jurajkusti. 36 Ima enga mintsikajka Uájpani, jatsisti tsípikua para méntkisï. Joperu ima enga no kurhajchajka Uájpani, no jatsiati indeni tsípikuani, sánderu sési, Tata Diosï ikiakuni jauati imani.