Lukasï

21 Jimajkani, enga Jesúsi eraapka, exeaspti uánikua jatsikuarheriichani, intsïmperata ambeksï jatsiraxapti sentabu jatakuecharhu. 2 Ka tátsekua exespti uarhiiti tsïndini ma enga no ma ambe jatsikuarhepka, tsimani moneda sapirhatiichani jatsiraaxapti engaksï sántku jukaparhapka* 3 ka arhiaspti: “Jíksïni sési jimbo arhisïnga eska i uarhiiti tsïndi enga no ma ambe jatsikuarheka, sánderu kánikua jatsiraska ka eska máteruecha. 4 Jimbokaksï iáminduecha intsïmpesïnga ambe engaksï pakajkujka;* joperu i uarhiiti enga no ma ambe jatsikuarheka jatsirasti na enga xáni jatsikuarhepka para nitamakuarhini”.

5 Ísï tátsekua, engaksï máru templueri ambe uandontskuarheni japka, na enga sési xarhareenga xáni sési járhati tsakapuecha jingoni ka imani ambe jingoni engaksï Tata Diosïni kéjtsïtakuenga, 6 ima arhiaspti: “Niáraati ima jurhiatikua enga no ma tsakapu tsïntsïkata pakaraaka jimini engajtsï iáiasï exeni jaka. Méntku iámindu ambe xerenhantaati”. 7 Jimajkani, imeechaksï kurhamarhispti: “Jorhentpiri, ¿na jatinimindu úkuarhia i ambe ka nénachi mítea eska sánderkusï kueratani jakaia para i ambe úkuarhini?”. 8 Ka Jesúsi arhiaspti: “Xéparini je. Asï jáma je jurajkutakuarheni paraksïni nema támisï jánhastani,* jimbokaksï uánikua juuaka juchiiti nombrini úraparini ka uandaatiksï ‘Ji jindeeska’, o ‘Janoxatiia ima jurhiatikua enga uaxastakata jakaia’. Asï jáma je nirani chúxapaani. 9 Ístu, engajtsï kurhauaka eska uarhiperanhaxaka ka no sési kámberanhani, asï jáma je chéni jimboka orheta jatsiska para i ambe ísï úkuarhini. Joperu no jirejiresï kʼamajkunhaati parhakpini”.*

10 Jimajkani arhiaspti: “Ireta ma uarhiperaati máteru ireta jingoni ka juramukua ma máteru juramukua jingoni. 11 Uinhamu jencheati, ka uápurisï kʼarhimakua ambe jauati ka kʼérati pʼamenchakuecha engaksï sóntku etsakuarhiaka. Kʼuiripuechaksï no sési jásï ambe exeati ka ístuksï kʼéri ambe exeati enga auandarhu uératini juuaka.

12 ”Joperu ante de i ambe úkuarhini, kʼuiripuechaksïni jupikaati ka no sésiksïni kámaati. Jimaksïni páati nani engaksï judiuecha tánguarhijka para Tata Diosïni kómarhini ka ónhaatiksïni. Ka juchiiti nombri jimbo, reiicha ka juramutiicha jingontsï pánhaaka. 13 I ambe marhuauati parajtsï chá aianguani imeechani ambe engajtsï jakajkujka. 14 Ísï jimbo, asï jáma je tʼuini eratseni jarhania ambe engajtsï uandaaka parajtsï kuájpekuarhini, 15 jimboka jíksïni arhiaka ambe engajtsï uandaaka ka jánhastaakaksïni, paraksïni nóteru ambe ma únia arhini imeecha engaksïni ikiachejka. 16 Ístu, chaari taatiichaksïni íntspintaati,* chaari ermanuecha, parientiicha ka ístu chaari amiguecha. Ka márujtsï uándikunhaaka. 17 Ka iámindu kʼuiripuechaksïni kurhunhiati jíndeni jimbo. 18 Joperujtsï kʼóru no ma jauiri tsïtaaka. 19 Ka engajtsï tekaantaska,* pʼímutantaakajtsï chaari tsípikuani.*

20 ”Ka engajtsï exeaka eskaksï sondaduecha méntku ma uirhipandani jauaka Jerusaléni, mítetini ja je eska no ióni jimbo kʼamajkunhaakia. 21 Jimajkani, imeecha engaksï Judea jauaka, eskaksï juátarhisï niuaka sïpakuarhini; ka imeecha engaksï Jerusaléni jauaka, eskaksï uéakuntaaka jima uératini, ka imeecha engaksï tarhetarhisï* jámani jauaka, eskaksï no inchaakuntaaka Jerusaléni. 22 Jimboka imani jurhiatikuechani jimbo, Tata Diosï niáraati xarhatani imeeri ikiatapu* paraka iámindu ambe ísï úkuarhiaka eska na karakata jaka. 23 ¡Lástima ima uarhiitiicha engaksï embarasada jámani jauaka imani jurhiatikuechani jimbo o ima uarhiitiicha engaksï útasï tʼirerani* jauaka charhakuni! Jimboka echerirhu kánikua no sési nitamakuarhinhaaka ka i iretarhu anapuechaksï kastigarinhaati. 24 Ka espada jimboksï uándikunhaati ka jupikakataksï pánhaati máteru ireteecha jimbo; ka ireteechaksï* tʼauanduntaati Jerusalénini astaka kʼamaraaka ima tiempu enga Tata Diosï uaxastaka para imeecha engaksï no Israeli anapueka.

25 ”Ístu, kʼéri ambe xarharaati jurhiatarhu, lunarhu ka jóskuecharhu. Ka echerirhu kʼuiripuechaksï kánikua no sési nitamakuarhini jauati ka nóksï jamberi jánhaskaati ambe úni enga mari xáni no sési kurhaakuarhini jauaka ka manamini. 26 Kʼuiripu mirikurhiati* xáni chéni ka xáni uandanhiani imani ambe jimbo enga echerirhu úkuarhiaka. Ka ambe enga auandarhu jaka méntku jiniani ka ixúani manatanhaati. 27 Jimajkani exeatiksï Achamasïiri Uájpani nuberisï jurhani jarhani iámu imeeri uinhapikua jingoni. 28 Ka enga na ueenakuarhiakia i ambe úkuarhini, uinhapikuarhintsï je ka asï ché je jimbokajtsï no ióni jimbo pʼímutanhantaakia”.

29 Ísï jimbo, ejemplu ma jingoni jorhendaaspti: “Exe je jígusïiri anhatapuni ka máteru anhatapuechani. 30 Engaksï tsikirhikuarhentani jarhajkia, chájtsï mismu exesïnga eska no ióni jimbo emendeuakia. 31 Májkueni, engajtsï chá exeaka eska i ambe úkuarhixakaia, mítetini ja je eska Tata Diosïiri Reinu janoxakaia. 32 Jíksïni sési jimbo arhisïnga eskaksï iásï anapu kʼuiripuecha útasï jauaka enga iámindu ambe úkuarhiaka. 33 Auanda ka echeri no méntkisï jauati, joperu ambe engani ji uandajka pakaraati para méntkisï.

34 ”Joperu chá jingontku jáma je paraka chaari mintsita no jukari uandanhiani jauaka ka jukari uékani tʼireni ka itsïmani, o jukari uandanhiani jarhani pauani pauani anapu ambe jimbo, para no ma repentku jiáni janoni ima jurhiatikua engajtsï chá no erokuarhini jauaka 35 ísï komueska trampa ma.* Jimboka iámu parhakpini anapu kʼuiripuechani niárakuauaka ima jurhiatikua. 36 Ísï jimbo, jingontku ja je ka méntkisï kómarhikuarhi je Tata Diosïni parakajtsï uaaka orhepani uérakuni imani ambe enga úkuarhiaka ka ísïjtsï úni anhandetini jarhani Achamasïiri Uájpani japarini”.

37 Ka jurhiakua, Jesúsi templurhu jorhentpisïreendi joperu chúrikuechani uéntasïreendi ka juáta Olibusïiri nirasïreendi pakarani. 38 Ka xarhentku, iámindu iretarhu anapuechaksï templurhu nirasïreendi paraksï kurhajchani Jesúsini.