Jarhuata je chaari kúnguarhikuani

Interu parhakpinirhu, uánikua kúnguarhikuechaksï jarhasti nani engaksï uánikua kʼuiripuecha tsípikua jingoni marhuakuni jaka Tata Diosï Jeobani. I kristianuechaksï kánikua jukaparharasïndi ambe engaksï jorhendanhajka ka ambe engaksï arhinhajka eskaksï jatsiska para úni ka tsípikua jingonksï jarhuajpesïndi kúnguarhikuarhu ka mámaru ambe jimbo. ¿Ísïjtsï pʼikuarherasïni chaari kúnguarhikuarhu?

1. ¿Nénajtsï uaa jarhuatani chaari kúnguarhikuani tiempu ka uinhapikua jingoni?

Iáminduechachi uaaka mámaru ambe jimbo jarhuajpeni kúnguarhikuarhu. ¿Jarhaskiksï erachicha engaksï jatirikia o engaksï pʼamenchani jaka? ¿Úpirintsï jarhuataani para tánguarhikuarhu paani? ¿Ochi úpirini máteru ambe jimbo jarhuataani komu nirani ambe ma piákuani o jarhuataani imeecheri k’umanchikuarhu? (Arhinta je Santiagu 1:27). Ístuchi úpiringa jarhuajpeni para kutsuntskantani Kʼumanchikua Reinuerini ka parachi mantenimientu íntskuni. No nemajtsïni arhisïndi eskachi afuersa jatsiska para ini ambe úni; mintsita jingonchi ísï úsïnga jimbokachi xénchasïnga Tata Diosïni ka juchaari erachichani (Salmo 110:3).

Jeobaeri testiguecha engaksï itsï atakuarhikia, ístuksï úsïndi jarhuajpeni máteru ambe jimbo. Erachicha engaksï uininharhitaaka rekisituechani enga Biblia uandaajka, úsïndiksï orhejtsïkutiri jarhuajpirini ka sánderu orhepatini, orhejtsïkutinksï. Ka iáminduecha, xáni erachicha ka pirenchicha úsïndiksï sánderu aianhpini engaksï prekursori úkuarhijka. Ístu, máru testiguechaksï jarhuajpesïndi kontstruksionirhu paraksï uaani kʼumanchikuechani nani engachi kómarhijka Tata Diosïni. Ka jarhastiksï máteruecha engaksï máteru nanisï mótsijka paraksï kúnguarhikua ma jimbo jarhani enga jarhuajperata uétarhinchani jauaka.

2. ¿Nénachi uaa jarhuatani kúnguarhikuani juchaari sentabu jingoni ka máteru ambe jingoni engachi jatsikuarheka?

Biblia uandasïndi: “Kʼéri ambe arhi Jeobani imani ambe jingoni engari jatsikuarheka” (Proverbios 3:9). Para jucha, kʼéri kóntperata máesti úrani juchaari sentabuni ka máteru ambe engachi jatsikuarheka parachi jarhuatani kúnguarhikuani ka paraka seguiriuaka aianhpinhani interu parhakpinirhu (arhinta je 2 Korintu 9:7). Ka engachi íntspijka sáni sentabu, úsïngachi jarhuajpeni ánchikuarhitarhu enga jindeeka para jarhuajpeni jiáni enga no sési ambe úkuarhijka. Uánikuaksï pʼindesïndi patsani sáni sentabu paraksï íntspini (arhinta je 1 Korintu 16:2). Uaakachi jatsirani kajitecha jimbo engaksï jima jarhajka engachi tánguarhijka o Interneti jimbo axani pájinarhu donate.jw.org. Jeobajtsïni sésikua íntskusïndi parachi úrani ambe engachi jatsikuarheka parachi xarhatani eskachi xénchasïnga.

JORHENGUARHI JE SÁNDERU AMBE

3. Uaakajtsï úrani ambe engajtsï jatsikuarheka

Jeoba ka Jesúsi xénchaasïndiksï imeechani engaksï tsípikua jingoni íntspijka. Ma xanhari, Jesúsi exesti uarhiiti tsïndini ma enga pobripka peru enga íntspipka na enga xáni úpka. Arhinta je Lukasʌ 21:1-4 ka uandontskuarhi je íri ambe:

• ¿Uétarhisïni kánikua sentabu íntspini paraka Tata Diosï Jeoba jaiapanhentaaka?

• ¿Nénaksï pʼikuarherasïni Jeoba ka Jesúsi engachi mintsita jingoni íntspijka?

Parajtsï míteni na enga úrakuarhejka sentabu engachi íntspijka, exe je BIDEUNI. Tátsekua, uandontskuarhi je íri ambe:

BIDEU: Ju je kunujkurhantani intsïmperakua ma para Jeoba (4:47)

• ¿Néna jarhuataasïni interu parhakpini anapu kúnguarhikuechani sentabu engachi íntspijka?

4. Uaakajtsï jarhuajpeni

Ióntki anapu Jeobaeri marhuarichaksï kánikua tsípikua jingoni jarhuajpesïreendi ánchikuarhita jingoni para méntkisï sési jarhani jima engaksï tánguarhienga ka no solu sentabu jingoni. Arhinta je 2 Crónicas 34:9-11 ka uandontskuarhi je íri ambe:

• ¿Ambeksï úsïreni israelitecha paraksï kuidarini ‘Jeobaeri kʼumanchikuani’, jo, jima engaksï kómarhienga Jeobani?

Parajtsï úni exeni na engaksï Jeobaeri testiguecha májkueni újka eska Biblia na uandajka, exe je BIDEUNI. Tátsekua, uandontskuarhi je íri ambe:

BIDEU: Uétarhisïndi kuidariuani Kʼumanchikuechani Reinueri (3:31)

• ¿Andisï xáni jukaparhakue eska juchaari Kʼumanchikua Reinueri méntkisï limpiu jauaka ka sési jásï?

• ¿Nénajtsï úpirini jarhuajpeni chá?

5. Erachichaksï uaati jánguarhintani paraksï sánderu ánchikuarhita intsïnhani

Biblia arhiasïndi tatakechani eskaksï jánguarhintaaka sánderu sési marhuakuni Tata Diosïni ka ísïksï úni sánderu jarhuatani kúnguarhikuani. Parajtsï míteni na enga erachi ma ísï úka, exe je BIDEUNI. Tátsekua, uandontskuarhi je íri ambe:

BIDEU: Erachicha, jánguarhintsï je sánderu sési marhuakuni Tata Diosïni (5:19)

• ¿Ambe ka ambe úspi Ryani para sánderu sési marhuakuni Tata Diosïni ka ísï úni sánderu jarhuajpeni kúnguarhikuarhu?

Biblia uandasïndi ambe ka ambe jatsiski para úni erachi ma enga uékajka orhejtsïkutiri jarhuajperiini o orhejtsïkutini. Arhinta je 1 Timoteo 3:1-13 ka uandontskuarhi je íri ambe:

• ¿Ambeksï jatsiski para úni ima erachicha engaksï uékajka orhejtsïkutiri jarhuajperiini o orhejtsïkutini?

• ¿Ambe jatsiski para úni imeecheri familia? (Exea je bersikuluechani 4 ka 11).

• Engaksï erachicha jánguarhintajka iámindu ini ambe úni, ¿néna marhuakua i ambe kúnguarhikuani?

AMBE ENGACHI JORHENGUARHIKA

Jeoba kánikua jukaparharasïndi engachi jucha jánguarhintajka parachi jarhuatani kúnguarhikuani juchaari tiempu jingoni, uinhapikua ka imani ambe jingoni engachi jatsikuarheka.

Ambejtsï jorhenguarhiski

• ¿Nénachi uaa jarhuatani kúnguarhikuani juchaari tiempu ka uinhapikua jingoni?

• ¿Nénachi uaa jarhuatani kúnguarhikuani imani ambe jingoni engachi jatsikuarheka?

• ¿Nénajtsï tsitipirini jarhuatani kúnguarhikuani?

ÍSTU EXE JE INI AMBE

Jorhenguarhi je andisï Tata Diosï nóteru kurhajkuarhijkia diesmu.

“¿Ambe uandasïni Biblia diesmueri ambe?” (Artikulu ma enga jw.org jimbo jaka)

Biblia íntskuasïndi máru responsabilidadiichani imani tatakeechani engaksï itsï atakuarhikia. Joperu enga nanaka máejkia enga jatsijka para úni máru ambe, ¿ambe úsïni?

“Juramukua kúnguarhikuarhu” (Aianhpiri, febreru de 2021)

Mítea je máru Jeobaeri testiguechani engaksï uánikua ambe újka parakaksï imeeri erachicha jatsiauaka publikasionichani.

Etsakunhasïndiksï publikasionicha engaksï Bibliarhu pʼitakata jaka, jini Congo (4:25)

Jorhenguarhi je eska sentabu enga úrakuarhejka para Jeobaeri testiguecheri ánchikuarhitani úni no ísï tánakuarhisïnga eskaksï na tánajka máteru relijionicha.

“¿Náki tumina jingoni úkuarhisïni ánchikuarhita Jeobaeri testiguecheri?” (Artikulu ma enga jw.org jimbo jaka)