Kolosasi
3 Joperu engajtsï chá Kristu jingoni tsítanhantaka,* seguirii je jirinhani auandarhu anapu ambe, jima enga Kristu uaxakatini jaka Tata Diosïiri jurhijkandani jimbo. 2 Chá méntku eratseni ja je auandarhu anapu ambe ka no echerirhu anapu ambe. 3 Jimbokajtsï chá uarhiska ka chaari tsípikua Kristu jingoni jískakata jarhasti jimboka Tata Diosï ísï uékaska. 4 Jiáni enga Kristu, enga jindeeka juchaari tsípikua, xarhataaka na enga xáni uinhapitiika,* chájtujtsï xarhataaka na enga xáni uinhapitiika ima.
5 Ísï jimbo, uándiku je chaari kuerpurhu anapu ambe enga parhakpinirhu jaka ka enga tsitijka ísku jándikua ambe niátani,* ikichakueni jásï ambe úni, relasioni seksuali únchani ka méntku no sáni pʼíngukuarhini, no sési ambe únchani ka tsititspeni jámani, enga ísïika komueska diosï úkateechani kómarhiani. 6 Ini ambe jimbosï Tata Diosï xarhataati na enga xáni ikiani jaka. 7 Chájtujtsï ióntki ísï jámasïreenga.* 8 Joperu iásï, ásteru jámia je ikiani, no sési jásï ikiani, no sési ambe niátani, no sési pʼikuastpeni chaari uandakuecha jingoni, ka ístu, ásteru jámia je ikichakueni jásï ambe uandani. 9 Asï jáma je chkuanderakuni máteru nemani, ásteru ísï jámia je eskajtsï ióntki na jámeenga,* ísï ú je enajkijtsï xukuparhakua ambe pʼíntapirini ka ásteru ú jeia ambe engajtsï ióntki xáni ueenga. 10 Sánderu sési, jatsiskajtsï para jimbanhi kʼuiripu máeni;* ísï ú je enajkijtsï xukuparhakua ambe jukantapirini, inde jimbanhi kʼuiripu ísï kueraakata jarhasti eska Tata Diosï na uéjka. Ísï jimbo, engajtsï sánhani arini jauaka sánderu sési míteni Tata Diosïni, seguiriini jauakajtsï sánderu jimbanhintani. 11 Para jimbanhi kʼuiripu máeni,* iáminduechaksï májkueniisti, grieguecha, judiuecha, imeecha engaksï pasïri pʼikujtsïkujka tsʼiuerakuani,* imeecha engaksï no pʼikujtsïkujka, imeecha engaksï uérakua anapueka, imeecha engaksï no sési jámajka,* imeecha engaksï jántspiriika ka imeecha engaksï no jántspiriika; Kristusï iámindu ambeeti para jucha ka iáminduechachi imani jingoni jarhaska.
12 Tata Diosïksïni chánksïni erakusti ka chájtsï pímbinhasïiska ka imaksïni kánikua xénchasïndi, ísï jimbo, ísï komueska xukuparhakua ambe jukantani, jánguarhinta je xénchpeni ka pʼamojpeni, sési kámpini, kaxumbitiini, iatsitakuarhu jámani* ka tekaantani. 13 Seguirii je tekaatsperantani ka mintsita jingoni* puátsperanta je nájkirukaksïni nema no sési pʼikuastaaka. Tata Diosï Jeobaksïni mintsita jingoni puáchentasti chánksïni, ísï jimbo chájtu májkueni ú je. 14 Joperujtsï ístu jatsiska para uékpini, ísï ú je enajkijtsï xukuparhakua ambe jukantapirini, jimboka uékperakuasï újka eskaksï iáminduecha uaaka sési pájperani.*
15 Ka eska inde pínandikua enga Kristu íntspijka chaari mintsitarhu jauaka,* jimbokajtsï chá ióarhinhaska parajtsï indeni pínandikuani intsïnhani ka ísïjtsï májku kuerpueni. Ístu, méntkisï diosmaiamukua arhijpi je. 16 Eska Kristueri uandakua chaari mintsitarhu jauaka parajtsï chá kánikua jánhaskani. Pirea je salmuechani, k’éri ambe arhi je Tata Diosïni, pireku je Tata Diosïni para k’éri ambe arhini ka parajtsï diosmaiamukua íntskuntani, ka ísïjtsï uaaka jorhentperani ka uinhaperperantani* iáminduecha. Pireku je Tata Diosï Jeobani chaari mintsitarhu. 17 Ambe uéjkijtsï úni jarhani o ambe uéjkijtsï uandani, méntkisï Jesúsiiri* nombri jimbo ú je, ka ístu imani jimbo diosmaiamukua arhi je Tata Diosïni enga jindeeka Taati.
18 Uarhiitiicha, jatsiskajtsï para méntkisï kurhajchaani chaari acheetiichani ísï eska na kʼuanijka eskaksï uaaka imeecha engaksï Tatani chúxapajka. 19 Acheetiicha, xénchaa je méntkisï chaari uarhiitiichani ka asï jáma je ikiakuani.* 20 Sapiicha, méntkisï kurhajchaa je chaari taatiichani, jimboka inde ambe sési pʼikuastasïnga Tatani. 21 Taatiicha,* asï ikiataa je* chaari sapiichani paraksï ima no kómu pʼikuarherani.* 22 Chá engajtsï jántspini jámajka, jatsiskajtsï para méntkisï kurhajchaani chaari patroniichani, joperu no jiántku engaksïni imeecha exeni jauaka* nomasi parajtsï sési pakarani kʼuiripuechani jingoni. Sánderu sési, mintsita jingoni kurhajchaa je jimbokajtsï chénharhisïnga* Tata Diosï Jeobani. 23 Ambe uéjkijtsï úni jarhani, iámu chaari mintsita ka iámu chaari uinhapikua jingoni* ú je, ísï ú je enajkijtsï Tata Diosï Jeobani jimbo úni jaki ka no kʼuiripuechani jimbo. 24 Jimbokajtsï míteska eskaksïni Tata Diosï Jeobasï íntskuaka indeni erensia enga míndakata jaka para chá. Kristuni jántspiku je jimboka imasï chaari Patroniika. 25 Ima enga no sési ambe niátaaka, jatsiati para maiampintani enga no sési uaaka, ka iáminduechaksï májkueni kánhaati.